జాతీయ స్థాయిలో సత్తా చాటిన తెలంగాణ పంచాయతీలు.. ఆ గ్రామాలు ఇవే, మంత్రి సీతక్క హర్షం

తెలంగాణ గ్రామీణ ప్రాంతాల అభివృద్ధికి జాతీయ స్థాయిలో భారీ గుర్తింపు లభించింది. కేంద్ర ప్రభుత్వం ప్రకటించిన దీన్ దయాళ్ ఉపాధ్యాయ పంచాయత్ సతత్ వికాస్ పురస్కారాల్లో రాష్ట్రం రెండు కీలక అవార్డులను కైవసం చేసుకుంది. పారదర్శక పాలనతో పాటు మహిళల సంక్షేమం కోసం చేపట్టిన వినూత్న కార్యక్రమాలు ఈ విజయానికి బాటలు వేశాయి. దేశవ్యాప్తంగా ఉన్న వేల పంచాయతీలతో పోటీపడి తెలంగాణ గ్రామాలు సత్తా చాటడం విశేషం.

జాతీయ స్థాయిలో మెరిసిన మోతుకుపల్లి.. 

వికారాబాద్ జిల్లా కోటేపల్లి మండలంలోని మోతుకుపల్లి గ్రామ పంచాయతీ ‘గుడ్ ఫర్ గవర్నెన్స్’ విభాగంలో జాతీయ పురస్కారాన్ని దక్కించుకుంది. పాలనలో పారదర్శకతను పాటిస్తూ ప్రజల భాగస్వామ్యంతో అభివృద్ధి పనులు చేపట్టడం వల్ల ఈ అవార్డు వరించింది. నిధుల వినియోగం.. రికార్డుల నిర్వహణ.. ప్రభుత్వ పథకాల అమలులో ఈ గ్రామం దేశానికి ఆదర్శంగా నిలిచింది. గ్రామ స్థాయిలోనే ప్రజల సమస్యలను పరిష్కరించే వ్యవస్థను బలోపేతం చేయడం మోతుకుపల్లి ప్రత్యేకత. పంచాయతీ సిబ్బందితో పాటు ప్రజాప్రతినిధుల సమష్టి కృషి ఈ ఫలితాన్ని అందించింది.

విమెన్ ఫ్రెండ్లీ పంచాయతీగా ఫసల్వాడీ..

సంగారెడ్డి జిల్లా ఫసల్వాడి గ్రామ పంచాయతీ ‘విమెన్ ఫ్రెండ్లీ పంచాయతీ’ విభాగంలో జాతీయ స్థాయిలో ఎంపికైంది. మహిళల భద్రత.. వారి ఆర్థిక స్వావలంబన.. ఆరోగ్యం కోసం ఈ గ్రామం చేపట్టిన కార్యక్రమాలు ప్రశంసలందుకున్నాయి. గ్రామంలోని మహిళలకు మెరుగైన జీవనోపాధి కల్పించడంతో పాటు నిర్ణయాల్లో వారిని భాగస్వామ్యం చేయడం వల్ల ఈ ఘనత సాధ్యమైంది. మహిళా సంక్షేమ పథకాలను క్షేత్రస్థాయిలో విజయవంతంగా అమలు చేయడంలో ఫసల్వాడి కీలక పాత్ర పోషించింది.

మంత్రి సీతక్క హర్షం

తెలంగాణ గ్రామాలకు జాతీయ పురస్కారాలు రావడం పట్ల పంచాయతీరాజ్ గ్రామీణాభివృద్ధి శాఖ మంత్రి సీతక్క ప్రత్యేక అభినందనలు తెలిపారు. రాష్ట్ర ప్రభుత్వ కృషికి.. గ్రామస్థుల పట్టుదలకు ఈ అవార్డులే నిదర్శనమని ఆమె పేర్కొన్నారు. అవార్డులు సాధించిన మోతుకుపల్లి.. ఫసల్వాడి గ్రామాలను స్ఫూర్తిగా తీసుకుని రాష్ట్రంలోని ఇతర పంచాయతీలు కూడా అభివృద్ధి బాటలో నడవాలని ఆకాంక్షించారు. ప్రజాప్రతినిధులు.. అధికారులు.. గ్రామ స్థాయి సిబ్బంది అంకితభావంతో పనిచేయడం వల్లే తెలంగాణకు ఈ గౌరవం దక్కిందని ఆమె కొనియాడారు. భవిష్యత్తులో మరిన్ని గ్రామాలు జాతీయ స్థాయి అవార్డులను గెలుచుకునేలా ప్రణాళికలు రూపొందిస్తున్నట్లు వెల్లడించారు.

ALSO READ: మహిళలే యజమానులు.. ప్రతి మండలానికి ఆర్టీసీ బస్సు.. జూన్ 2 నుంచి కొత్త ప్రయాణం!