35 ఏళ్ల క్రితం ల్యాండ్ అయింది.. ఇప్పటికీ కదల్లేదు! ఈ విమానం వింత కథేంటో తెలుసా?

1991 Emergency Landing: నాగ్‌పూర్ అంతర్జాతీయ విమానాశ్రయంలో ఓ పాత విమానం ఏళ్ల తరబడి కదలకుండా అలాగే ఉండిపోయింది. సాధారణంగా విమానాలు వచ్చి కొంతసేపటికి వెళ్లిపోతాయి. కానీ, ఈ విమానం మాత్రం ఏకంగా 35 ఏళ్లుగా అదే విమానాశ్రయంలో ఉండిపోయింది. ఇప్పుడు దాని పరిస్థితి రిపేర్లకు కూడా పనికిరాదని నిపుణులు చెబుతున్నారు. అంతేకాదు.. విమానాన్ని అక్కడి నుంచి తరలించాలంటే భారీ మొత్తంలో పార్కింగ్ ఫీజు చెల్లించాల్సిన పరిస్థితి ఏర్పడింది.

1991లో అత్యవసర ల్యాండింగ్

1960ల కాలానికి చెందిన బోయింగ్ 720 విమానం 1991లో నాగ్‌పూర్ విమానాశ్రయంలో అత్యవసరంగా ల్యాండ్ అయింది. సాంకేతిక సమస్య కారణంగా విమానం అక్కడ దిగిన తర్వాత తిరిగి గాల్లోకి ఎగరలేదు. విమానం మరమ్మతులు చేసి మళ్లీ నడిపించాలా? లేక అక్కడి నుంచి తరలించాలా? అనే విషయంలో అప్పట్లో స్పష్టమైన నిర్ణయం తీసుకోలేకపోయారు. క్రమంగా సంవత్సరాలు గడిచిపోయాయి. చివరకు ఆ విమానం విమానాశ్రయంలోనే శాశ్వతంగా ఉండిపోయినట్టయింది.

యజమాని, అధికారులు పట్టించుకోకపోవడంతో..

ఈ విమానానికి యజమాని సామ్ వర్మ. సాంకేతిక సమస్యలు, విమానాన్ని అక్కడ ఉంచడానికి పెరుగుతున్న అద్దె లాంటి కారణాలతో విమానాన్ని తరలించేందుకు ఆయన ప్రయత్నాలు చేయలేదు. మరోవైపు విమానాశ్రయ అధికారుల నుంచి కూడా దీనిపై పెద్దగా చర్యలు లేకపోవడంతో విమానం అక్కడే ఉండిపోయింది. మొదట్లో సాధారణంగా కనిపించిన ఈ విషయం కాలం గడిచేకొద్దీ పెద్ద సమస్యగా మారింది. దశాబ్దాలుగా ఎండ, వానకు గురవుతూ ఉండటంతో విమానం పూర్తిగా పాడైపోయింది. ఒకప్పుడు ప్రయాణికులను వేల కిలోమీటర్లు తీసుకెళ్లిన ఈ బోయింగ్ 720 ఇప్పుడు కదలడానికి కూడా వీలులేని స్థితికి చేరుకుంది. నిపుణులు కూడా విమానం పరిస్థితిని పరిశీలించిన తర్వాత దాన్ని తిరిగి రిపేర్ చేసి వినియోగంలోకి తీసుకురావడం సాధ్యం కాదని చెబుతున్నారు. దీంతో విమానం భవిష్యత్తుపై ప్రశ్నలు తలెత్తుతున్నాయి.

రూ.7 కోట్ల పార్కింగ్ ఫీజు!

ఇక్కడే అసలు ట్విస్ట్ ఉంది. ఇన్నేళ్లుగా విమానం విమానాశ్రయంలోనే ఉండిపోవడంతో పార్కింగ్, ఇతర బకాయిలు భారీగా పేరుకుపోయాయి. ఇప్పటికైనా యజమాని విమానాన్ని అక్కడి నుంచి తరలించాలని అనుకుంటే, ముందుగా సుమారు రూ.7 కోట్ల వరకు పార్కింగ్ ఫీజు చెల్లించాల్సి ఉంటుంది. అంటే విమానాన్ని తరలించడం కంటే దానికి సంబంధించిన బకాయిలే పెద్ద భారంగా మారాయి.

విమానయాన చరిత్రకు గుర్తుగా..

ఈ బోయింగ్ 720 ఇప్పుడు ఎగరలేకపోయినా, విమానయాన చరిత్రలో మాత్రం ప్రత్యేకమైన గుర్తుగా నిలిచింది. 1960ల నాటి విమానం కావడంతో దానికి చారిత్రక ప్రాధాన్యత కూడా ఉంది. అయితే, ఇన్నేళ్లుగా నిర్లక్ష్యంగా ఉండిపోవడంతో ఇప్పుడు అది శిథిలంగా మారింది. దాన్ని స్క్రాప్‌గా తొలగించాలా? లేక ఏదైనా మ్యూజియం కోసం ఉపయోగించాలా? అనే అంశంపై భవిష్యత్తులో నిర్ణయం తీసుకోవాల్సి ఉంటుంది. ఒక విమానం అత్యవసరంగా ల్యాండ్ అయి.. మళ్లీ టేకాఫ్ కాకుండా ఏకంగా మూడు దశాబ్దాలకు పైగా విమానాశ్రయంలోనే ఉండిపోవడం ఇప్పుడు ఆసక్తికరమైన విమానయాన కథగా మారింది.