Goupitan Dam: సాధారణంగా పడవలు, భారీ ఓడలు అంటే నీటిలో ప్రయాణిస్తాయనే మనందరికీ తెలుసు. కానీ కొండల మీద, ఆకాశమంత ఎత్తులో ఓడలు ప్రయాణించడం ఎప్పుడైనా చూశారా? వినడానికి ఇది ఏదో సైన్స్ ఫిక్షన్ సినిమా సీన్ లా అనిపించినా.. చైనాలోని ‘గౌపిటాన్ ఆనకట్ట’ వద్ద ఇది నిజంగా జరుగుతోంది. గైజౌ ప్రావిన్స్లోని వూ నదిపై నిర్మించిన ఈ షిప్ లిఫ్ట్ వ్యవస్థను చూస్తే ఎవరైనా సరే నోరెళ్లబెట్టాల్సిందే. ఇంజనీరింగ్ అద్భుతానికి నిలువెత్తు సాక్ష్యంగా నిలిచే ఈ ప్రాజెక్ట్ గురించి మరిన్ని ఆసక్తికర విశేషాలు ఇప్పుడు తెలుసుకుందాం.
చైనా తన అవసరాల కోసం నదులపై భారీ ఆనకట్టలు నిర్మించింది. దీనివల్ల నీటి మట్టాల్లో భారీ తేడాలు వచ్చాయి. ఒకవైపు నీరు చాలా తక్కువ ఎత్తులో ఉంటే.. ఆనకట్ట అవతలి వైపు నీరు వందల మీటర్ల ఎత్తులో ఉంటుంది. ఇలాంటి చోట పడవలు ఒక వైపు నుంచి మరోవైపు వెళ్లడం అసాధ్యంగా మారింది. పాత పద్ధతిలో లాకులు నిర్మించడం వల్ల సమయం చాలా వృధా అవుతుంది. అందుకే చైనా ఇంజనీర్లు వినూత్నంగా ఆలోచించి, భారీ ఓడలను నేరుగా పైకి లేపే ఈ భారీ ఎలివేటర్ వ్యవస్థను రూపొందించారు.
ఈ వ్యవస్థలో అత్యంత ఆశ్చర్యపరిచే విషయం ఏమిటంటే.. ఇక్కడ ఓడలు కేవలం లిఫ్టులోనే కాదు, భూమికి వందల అడుగుల ఎత్తులో నిర్మించిన నీటి వంతెనల మీద కూడా ప్రయాణిస్తాయి. కింద లోతైన లోయలు, పచ్చని కొండలు కనిపిస్తుంటే.. వాటి పైన సిమెంట్ వంతెనలో నింపిన నీటిపై ఓడలు వెళ్తుంటే అదంతా ఏదో మ్యాజిక్లా కనిపిస్తుంది. దాదాపు 60 అంతస్తుల భవనం ఎత్తుకు ఈ ఓడలను ఎలివేటర్ల సాయంతో మూడు దశల్లో పైకి చేరుస్తారు.
Also Read: కుక్కలు మల విసర్జనకు ముందు గుండ్రంగా ఎందుకు తిరుగుతాయి?
ఈ మొత్తం ప్రాజెక్టులో రెండవ దశ అత్యంత కీలకం. ఇది ఏకంగా 127 మీటర్ల ఎత్తుకు ఓడను నిలువుగా తీసుకెళ్తుంది. ప్రపంచంలోనే ఒకే దశలో ఇంత ఎత్తుకు ఓడను తీసుకెళ్లే ఏకైక లిఫ్ట్ ఇదే. భారీ వెయిట్లు, హైడ్రాలిక్ యంత్రాల సాయంతో 500 టన్నుల బరువున్న నౌకలను కూడా చాలా సులువుగా పైన ఉన్న కాలువలోకి పంపిస్తారు. ఈ ప్రయాణం చేస్తున్నప్పుడు ఓడలో ఉన్నవారికి తాము ఆకాశంలో విహరిస్తున్నామనే అనుభూతి కలుగుతుంది.
చూడటానికి ఇది చాలా భయంకరంగా అనిపించినా.. దీని నిర్మాణం వెనుక అత్యున్నత భద్రతా ప్రమాణాలు ఉన్నాయి. భూకంపాలను తట్టుకునేలా, బలమైన గాలి ఒత్తిడికి ఆగకుండా ఉండేలా దీనిని డిజైన్ చేశారు. ఓడ ఎలివేటర్ బాక్సులోకి వెళ్లిన తర్వాత, అది చాలా నిలకడగా పైకి కదులుతుంది. లోపల ఉన్న ప్రయాణికులకు కూడా ఎలాంటి కుదుపులు తెలియకుండా ప్రయాణం సాగుతుంది. సుమారు 2.3 కిలోమీటర్ల పొడవున్న ఈ మార్గం గుండా ఓడలు దాటడానికి చాలా తక్కువ సమయం పడుతుంది.
ఈ షిప్ లిఫ్ట్ కేవలం పర్యాటక ఆకర్షణ మాత్రమే కాదు.. చైనా ఆర్థిక వ్యవస్థలో కూడా కీలక పాత్ర పోషిస్తోంది. మారుమూల కొండ ప్రాంతాల్లో ఉండే వస్తువులను ఇతర నగరాలకు చేరవేయడానికి ఇదొక గొప్ప రవాణా మార్గంగా మారింది. ప్రతి ఏటా లక్షలాది టన్నుల సరుకు రవాణా దీని ద్వారా జరుగుతోంది. ప్రకృతిని ఇబ్బంది పెట్టకుండా, ఆధునిక సాంకేతికతను జోడించి ఇలాంటి అద్భుతాలు చేయడం ఒక్క చైనానికే సాధ్యమని ఈ ప్రాజెక్ట్ నిరూపిస్తోంది.
ప్రస్తుతం ఈ ప్రాంతం ప్రపంచవ్యాప్తంగా పర్యాటకులను విశేషంగా ఆకర్షిస్తోంది. ఆకాశంలో ఓడలు నడవటం అనే వింతను చూడటానికి వేలాది మంది ఇక్కడికి వస్తున్నారు. భారీ కాంక్రీటు స్తంభాల మధ్య నుంచి ఓడలు మెల్లగా పైకి వెళ్తుంటే ఆ దృశ్యం జీవితాంతం గుర్తుండిపోతుంది. మీరు కూడా సాహసోపేతమైన ప్రయాణాలను ఇష్టపడే వారైతే.. చైనాలోని ఈ అద్భుతమైన గౌపిటాన్ షిప్ లిఫ్ట్ను సందర్శించవచ్చు.
Also Read: మనుషులకే కాదు.. ఈ జంతువులకూ ఉన్నాయి కమ్యూనికేషన్ స్కిల్స్!
Share
Kanthara: హీరో - హీరోయిన్ మధ్య విభేదాలా? రుక్మిణీనీ అన్ ఫాలో చేసిన రిషబ్?
Zojila Avalanche: జోజిలాలో మృత్యు మంచు.. 15 వాహనాలు సమాధి.. ఏడుగురు బలి!
