కొడుకు కోసం 24 ఏళ్ల వెతుకులాట.. ఈ తండ్రి కథ తెలిస్తే కన్నీళ్లు ఆగవు!

China Father Son Reunion: కన్న కొడుకు కనిపించకుండా పోతే తండ్రి గుండె ఎంతలా విలవిలలాడుతుందో మాటల్లో చెప్పలేం. తన బిడ్డ ఎక్కడున్నాడో తెలియకపోయినా.. ఎప్పటికైనా తిరిగి వస్తాడనే ఆశతో ఎదురుచూడటం ఎంత కష్టమో ఊహించలేం. చైనాకు చెందిన ఓ తండ్రి మాత్రం కొడుకు కోసం ఏకంగా 24 ఏళ్ల పాటు వెతికాడు. ఎన్నో కష్టాలు పడ్డాడు. దేశమంతా తిరిగాడు. చివరకు తన బిడ్డను కలుసుకున్నాడు. ఆ తండ్రీకొడుకుల కథ తెలిస్తే ఎవరికైనా కన్నీళ్లు ఆగవు.

రెండేళ్ల వయసులోనే తప్పిపోయిన కొడుకు

చైనాలోని షాండాంగ్ ప్రాంతానికి చెందిన గువో గాంగ్‌టాంగ్ అనే వ్యక్తికి 1997లో ఊహించని ఘటన జరిగింది. ఆయన రెండేళ్ల కుమారుడు గువో జిన్‌జెన్ ఇంటి సమీపంలో ఆడుకుంటుండగా కిడ్నాప్‌కు గురయ్యాడు. ఆ తర్వాత ఆ చిన్నారిని మరో ప్రాంతానికి తీసుకెళ్లి విక్రయించారు. కళ్లముందే ఉండాల్సిన కొడుకు ఒక్కసారిగా కనిపించకుండా పోవడంతో ఆ కుటుంబం తీవ్ర విషాదంలో మునిగిపోయింది. బిడ్డ కోసం మొదట కుటుంబ సభ్యులు, స్థానికులు వెతికారు. అయినా, ఎలాంటి సమాచారం దొరకలేదు. రోజులు గడిచాయి.. నెలలు గడిచాయి.. కానీ, కొడుకు ఆచూకీ మాత్రం తెలియలేదు.

కొడుకు ఫొటోతో దేశమంతా ప్రయాణం

తన బిడ్డను ఎలాగైనా వెతికి తీసుకురావాలని గువో గాంగ్‌టాంగ్ నిర్ణయించుకున్నాడు. కొడుకు ఫొటోతో కూడిన బ్యానర్లను బైక్ కు కట్టుకుని చైనా అంతటా ప్రయాణం ప్రారంభించాడు. ఒక ప్రాంతం నుంచి మరో ప్రాంతానికి వెళ్తూ కొడుకు గురించి ఆరా తీశాడు. ఎక్కడైనా చిన్న సమాచారం దొరికినా వెంటనే అక్కడికి వెళ్లేవాడు. తన దగ్గరున్న డబ్బులు ఖర్చయ్యాయి. ప్రయాణంలో ఎన్నో ఇబ్బందులు ఎదురయ్యాయి. ప్రమాదాల్లో గాయపడ్డాడు. చివరకు పది బైక్ లు కూడా మార్చాల్సి వచ్చింది. అయినా ఆయన వెనక్కి తగ్గలేదు. కొడుకు ఫొటోను చూపిస్తూ.. ఎవరైనా తన బిడ్డను గుర్తుపడతారేమోనని ఆశగా ఎదురుచూశాడు. దాదాపు 5 లక్షల కిలోమీటర్లు ప్రయాణిస్తూ 24 ఏళ్ల పాటు అన్వేషణ కొనసాగించాడు.

24 ఏళ్ల తర్వాత దొరికిన ఆచూకీ

ఏళ్లు గడుస్తున్నా కొడుకు దొరుకుతాడనే ఆశను గువో వదులుకోలేదు. చివరకు 2021లో పోలీసులకు కీలకమైన ఆధారం లభించింది. చైనాలోని హెనాన్ ప్రాంతంలో ఉన్న ఓ వ్యక్తి వివరాలను పరిశీలించారు. డీఎన్‌ఏ పరీక్షల ద్వారా అతడు గువో గాంగ్‌టాంగ్ తప్పిపోయిన కొడుకేనని నిర్ధారించారు. అప్పటికి గువో జిన్‌జెన్ వయసు 26 ఏళ్లు. చిన్నప్పుడు తనను కోల్పోయిన తల్లిదండ్రులను తిరిగి కలుసుకునే సమయం వచ్చింది.

కన్నీళ్లు పెట్టించిన తండ్రీకొడుకుల కలయిక

24 ఏళ్ల నిరీక్షణకు తెరపడింది. కొడుకు దొరికాడనే వార్త తెలియగానే గువో కుటుంబంలో ఆనందం వెల్లివిరిసింది. తండ్రి, తల్లి తమ బిడ్డను చూసి భావోద్వేగానికి గురయ్యారు. ఇన్నేళ్ల బాధను కన్నీళ్ల రూపంలో బయటపెట్టారు. తన బిడ్డను వెతుకుతూ గడిపిన ప్రతి రోజూ గుర్తుకొచ్చిందేమో.. కొడుకును దగ్గరకు తీసుకున్న ఆ క్షణం ఆ తండ్రికి జీవితంలోనే మరిచిపోలేని అనుభూతిగా మిగిలిపోయింది.

ఈ కథలో మరో గొప్ప విషయం ఏమిటంటే.. తన కొడుకు కోసం వెతుకుతున్న సమయంలో గువో ఇతర కుటుంబాలకు కూడా సహాయం చేశాడు. తప్పిపోయిన పిల్లలను వారి తల్లిదండ్రుల వద్దకు చేర్చేందుకు కృషి చేశాడు. కొడుకు కోసం 24 ఏళ్ల పాటు వెతికిన గువో గాంగ్‌టాంగ్ కథ ప్రపంచవ్యాప్తంగా ఎంతోమందిని కదిలించింది. ఆయన అనుభవాల ఆధారంగా 2015లో ‘లాస్ట్ అండ్ లవ్’ అనే సినిమా కూడా తెరకెక్కింది. కాలం ఎంత గడిచినా.. దూరం ఎంత పెరిగినా.. కన్న బిడ్డపై తల్లిదండ్రుల ప్రేమ తగ్గదని ఈ కథ నిరూపించింది. 24 ఏళ్ల నిరీక్షణ తర్వాత తన కొడుకును తిరిగి కలుసుకున్న ఆ తండ్రి కథ.. నిజంగా కన్నీళ్లు పెట్టించే ఓ మానవీయ గాథగా మిగిలిపోయింది!