ఎమిరేట్స్ క్యాబిన్ క్రూ సాలరీ.. నెలకు ఎంతో తెలిస్తే షాకవ్వాల్సిందే!

ప్రపంచంలోని ప్రముఖ విమానయాన సంస్థల్లో ఒకటైన ఎమిరేట్స్‌ లో క్యాబిన్ క్రూ జీతాలకు సంబంధించి తాజాగా సోషల్ మీడియాలో వైరల్ అవుతున్న పోస్టు ఆసక్తి కలిగిస్తోంది. ఇందులో ఫ్లైట్ అటెండెంట్లకు జీతం ఎలా ఇస్తారు? నెలకు ఎంత వరకు సంపాదించే అవకాశం ఉంటుందనే వివరాలు ఉండటంతో నెటిజన్లు ఆసక్తిగా చర్చించుకుంటున్నారు.

మూడు విధాలుగా క్యాబిన్ క్రూ సాలరీ

ఇన్‌స్టాగ్రామ్‌ లో షేర్ చేసిన వివరాల ప్రకారం, ఎమిరేట్స్ క్యాబిన్ సిబ్బంది నెలవారీ జీతం మూడు అంశాల మీద ఆధారపడి ఉంటుంది. అందులో ఒకటి బేసిక్ సాలరీ, రెండు ఫ్లైయింగ్ అవర్స్ ఆధారంగా ఇచ్చే అదనపు చెల్లింపు, విదేశీ లే ఓవర్స్ టైమ్ లో అందించే మీల్ అలవెన్సులు. క్యాబిన్ సిబ్బందికి ప్రతి నెల బేసిక్ పే అనేది AED 4,980గా ఉంటుంది. అంటే, భారతీయ కరెన్సీలో ఇది సుమారుగా రూ.1.3 లక్షల వరకు ఉంటుంది. ఉద్యోగి ఎన్ని గంటలు ప్రయాణించినా ఈ మొత్తాన్ని కంపెనీ అందిస్తుంది.

ఇక రెండో భాగం ఫ్లయింగ్ పే. విమానంలో పని చేసిన ప్రతి గంటకు AED 69.6 చొప్పున అడిషనల్ పే అందిస్తారు. సాధారణంగా ఒక క్యాబిన్ సిబ్బంది నెలకు 80 నుంచి 100 గంటల వరకు విమానాల్లో పని చేస్తారు. అందువల్ల వారి మొత్తం జీతం నెలనెలా మారుతూ ఉంటుంది. ఇక మూడో భాగంగా విదేశాల్లో లే ఓవర్ సమయంలో మీల్ అలవెన్స్ లభిస్తుంది. ఏ దేశానికి వెళ్లారు? అక్కడ ఎంతసేపు బస చేశారు? అనే అంశాలపై ఈ భత్యం ఆధారపడి ఉంటుంది. జీతానికి అదనంగా మరికొంత ఆదాయం లభిస్తుంది.

నెలకు సుమారు రూ. 3 లక్షల సంపాదన

ఈ మూడు అంశాలను కలిపి చూస్తే, ఎమిరేట్స్ క్యాబిన్ సిబ్బంది సగటున నెలకు AED 11,244 వరకు సంపాదించే అవకాశం ఉంటుంది. భారతీయ కరెన్సీలో దాదాపు రూ.3 లక్షలకు పైగా ఉండొచ్చు. ఫ్లయింగ్ గంటలు ఎక్కువైతే ఆదాయం కూడా పెరుగుతుంది. అంతేకాకుండా, కొందరు సిబ్బంది కంపెనీ అందించే వసతి సౌకర్యాన్ని ఉపయోగించకుండా సొంత ఇంట్లో ఉంటే, అదనపు అలవెన్సులు కూడా పొందే అవకాశం ఉంటుంది. అంతేకాదు, ట్రాన్స్‌ పోర్ట్ అలవెన్స్ కూడా లభిస్తుంది.

క్యాబిన్ క్రూ సాలరీపై జోరుగా చర్చ

ఈ వివరాలు బయటకు రావడంతో క్యాబిన్ క్రూ జీతాలపై సోషల్ మీడియాలో పెద్ద ఎత్తున చర్చ జరుగుతోంది. క్యాబిన్ సిబ్బంది ఉద్యోగం కేవలం ప్రయాణాలకు మాత్రమే పరిమితం కాదని, అందులో మంచి జీతభత్యాలు, ఇతర ప్రయోజనాలు కూడా ఉన్నాయని చాలామంది అభిప్రాయపడుతున్నారు. అదే సమయంలో విమానయాన రంగంలో కెరీర్ కొనసాగించాలనుకునే యువతకు ఈ సమాచారం మరింత ఆసక్తిని కలిగిస్తోంది.