YouTuber Nandana:యూట్యూబ్లో వీడియోలు చేస్తూ వేలాది మంది సబ్స్క్రైబర్లను సంపాదించుకున్న ప్రముఖ యూట్యూబర్ నందన ఊహించని వివాదంలో చిక్కుకున్నారు. ‘నందూస్ వరల్డ్’ ఛానల్ ద్వారా నెటిజన్లకు సుపరిచితమైన ఆమెను, శంషాబాద్ అంతర్జాతీయ విమానాశ్రయంలో పోలీసులు అదుపులోకి తీసుకోవడం తీవ్ర కలకలం రేపింది. విదేశాల్లో ఉద్యోగాలు, స్పాన్సర్షిప్ల పేరుతో అమాయకుల నుంచి కోట్లాది రూపాయలు వసూలు చేసి మోసం చేశారనే తీవ్రమైన ఆరోపణల నేపథ్యంలో ఈ అరెస్ట్ జరిగింది. వివరాల్లోకి వెళితే..
నందన మరియు ఆమె భర్త మధుకర్ కలసి ‘డెస్టినీ కన్సల్టెన్సీ’ పేరుతో ఒక సంస్థను నడిపేవారని సమాచారం. లండన్ వంటి విదేశాలలో మంచి ఉద్యోగాలు ఇప్పిస్తామని, వీసా రెన్యూవల్స్ చేయిస్తామని నమ్మించి దాదాపు 100 మంది నిరుద్యోగుల నుంచి భారీగా డబ్బులు వసూలు చేశారని బాధితులు ఆరోపిస్తున్నారు. ఇక ఒక్కొక్కరి వద్ద నుంచి సుమారు 15 నుంచి 20 లక్షల రూపాయల వరకు తీసుకుని, ఆ తర్వాత హ్యాండ్ ఇవ్వడంతో బాధితులు పోలీసులను ఆశ్రయించారు.
విదేశీ ఉద్యోగాల మోసంపై కేసు నమోదు కావడంతో, గతంలోనే పోలీసులు నందన దంపతులపై లుకౌట్ సర్క్యులర్ జారీ చేశారు. ఈ క్రమంలో శంషాబాద్ ఎయిర్పోర్ట్లో ప్రయాణించేందుకు వచ్చిన ఆమెను ఇమ్మిగ్రేషన్ అధికారులు గుర్తించి వెంటనే అదుపులోకి తీసుకున్నారు. ఇక ప్రస్తుతం ఆర్జీఐఏ పోలీసులు ఆమెను విచారిస్తున్నారు. ఆ తర్వాత తదుపరి చట్టపరమైన చర్యల కోసం ఎన్టీఆర్ జిల్లా ఇబ్రహీంపట్నం పోలీసులకు అప్పగించనున్నారు.
ALSO READ:ఘనంగా చంద్రబోస్ కొడుకు పెళ్లి.. హాజరైన సెలబ్రిటీస్ వీరే!
యూట్యూబ్లో నిరంతరం ట్రావెల్, లైఫ్స్టైల్ వీడియోలు చేస్తూ పాపులర్ అయిన నందన, ఇటీవల ‘మన శంకర వరప్రసాద్ గారు’ సినిమాలో కూడా నటించి ప్రేక్షకులను ఆకట్టుకున్నారు. సోషల్ మీడియాలో అంతటి ఫాలోయింగ్ ఉన్న ఒక సెలబ్రిటీ ఇలా కోట్లాది రూపాయల జాబ్ స్కామ్లో అరెస్ట్ అవ్వడం అందరినీ ఆశ్చర్యానికి గురిచేస్తోంది. ఇక నమ్మకం పేరుతో నిరుద్యోగుల జీవితాలతో ఆడుకున్నారని నెటిజన్లు తీవ్ర ఆగ్రహం వ్యక్తం చేస్తున్నారు.
సోషల్ మీడియాలో కనిపించే గ్లామర్, ఫాలోయింగ్ చూసి గుడ్డిగా నమ్మేస్తే ఎలాంటి ప్రమాదాల్లో పడతామో ఈ ఉదంతం స్పష్టం చేస్తోంది. విదేశీ ఉద్యోగాల పేరుతో వచ్చే ఆఫర్ల పట్ల ప్రతి ఒక్కరూ అప్రమత్తంగా ఉండాలి. ప్రభుత్వం గుర్తించిన అధికారిక ఏజెన్సీల ద్వారా మాత్రమే వీసా లేదా ఉద్యోగ ప్రయత్నాలు చేసుకోవాలి. ఇక ప్రస్తుతం శంషాబాద్ ఎయిర్పోర్టులో అదుపులోకి తీసుకున్న నందన కేసులో విచారణ ముమ్మరం కాగా, మరిన్ని ఆధారాలు బయటకు వచ్చే అవకాశం ఉంది.
Share
432 కి.మీ రేంజ్.. అరగంటలో ఛార్జింగ్.. 11 వేల కి.మీ నడిపిన తర్వాత క్రెటా EV రివ్యూ!
అధ్యక్షా మిమ్మల్నే తిడతారా.. అసెంబ్లీలో తాతా మధుపై సీఎం రేవంత్ ఫైర్!
