Bike Engine Oil Change: సింపుల్ గా ఇంట్లోనే బైక్ ఇంజిన్ ఆయిల్ మార్చుకోవచ్చు, మెకానిక్ అవసరం లేదు!

బైక్ ఎలాంటి ఇబ్బంది లేకుండా చక్కగా నడవాలంటే టైమ్ టు టైమ్ సర్వీసింగ్ చేయించాలి. ముఖ్యంగా పద్దతి ప్రకారం ఆయిల్ ఛేంజ్ చేయాలి. అయితే, చాలా మంది ఆయా పనుల కారణంగా సర్వీసింగ్ టైమ్ అయినా, సర్వీసింగ్ సెంటర్ కు తీసుకెళ్లలేకపోతుంటారు. అలాంటి వారికి గుడ్ న్యూస్. ఇకపై ఎలాంటి మెకానిక్ అవసరం లేకుండా. ఇంటి దగ్గరే అరగంటలో బైక్ ఇంజిన్ ఆయిల్ మార్చుకోవచ్చు. ఎలాగో ఇప్పుడు తెలుసుకునే ప్రయత్నం చేద్దాం..

ఇంజన్ ఆయిల్ ఎందుకు ముఖ్యమైనది?

ఇంజన్ ఆయిల్ బైక్ కు జీవనాడి లాంటి. ఇది కదిలే భాగాలను లూబ్రికేట్ చేస్తుంది. ఇంజిన్ ఉష్ణోగ్రతలను కంట్రోల్ చేస్తుంది. దుమ్ము, లోహ కణాలను శుభ్రపరుస్తుంది. గేర్లు సజావుగా మారడానికి సహాయపడుతుంది. ఇండియాలోని ట్రాఫిక్, వేడి, ధూళి కారణంగా ఆయిల్ చాలా ప్రభావితం అవుతుంది. ఆయిల్ మార్పులను ఆలస్యం చేయడం వల్ల ఇంజిన్ శబ్దం చేస్తుంది. అదే సమయంలో మైలేజ్ తగ్గుతుంది. అలాగే బైక్ నడిపిస్తే, ఇంజిన్ చెడిపోయే అవకాశం ఉంటుంది.

ఇంట్లోనే ఇంజిన్ ఆయిల్ ఎలా ఛేంజ్ కోసం ఏం కావాలి?

ఇంట్లో ఇంజిన్ ఆయిల్ ఛేంజ్ చేసుకోవాలంటే, ముందుగా అవసరం అయిన అన్ని సామాగ్రిని రెడీగా ఉంచుకోవాలి. బైక్‌కు సరైన ఇంజిన్ ఆయిల్ గ్రేడ్, అంటే సిఫార్సు చేయబడిన JASO రేటింగ్‌తో 10W-30, 10W-40 వంటివి తెచ్చుకోవాలి. కొత్త ఆయిల్ ఫిల్టర్ తెచ్చుకోవాలి. పాత ఆయిల్‌ను తీసేయడానికి డ్రెయిన్ పాన్ సిద్ధంగా ఉంచుకోవాలి. డ్రెయిన్ బోల్ట్ కోసం స్పానర్, సాకెట్ రెడీగా ఉంచుకోవాలి. ఫన్నెల్, గ్లౌవ్స్, డ్రెయిన్ బోల్ట్ కోసం కొత్త క్రష్ వాషర్ రెడీగా పెట్టుకోవాలి.

ఇంజిన్ ఆయిల్ ఎలా ఛేంజ్ చేసుకోవాలి?

కాసేపు బైక్ స్టార్ట్ చేసి ఉంచాలి. ఇంజిన్ కాస్త వేడికావాలి. వెచ్చని ఆయిల్ త్వరగా బయటకు వస్తుంది. బైక్‌ను చదునైన ప్రదేశంలో ఉంచాలి. పాత ఆయిల్‌ను తీసివేయాలి. ముందుగా టాప్ ఆయిల్ ఫిల్లర్ క్యాప్‌ను తెరవండి. తర్వాత ఇంజిన్ దిగువన ఉన్న డ్రెయిన్ బోల్ట్‌ ను విప్పాలి. ఆయిల్ డ్రెయిన్ పాన్‌ లోకి వచ్చేలా చూడాలి. పూర్తిగా బయటకు పోయే వరకు వేచి చూడాలి.

ఆయిల్ ఫిల్టర్‌ను మార్చండి!

పాత ఆయిల్ ఫిల్టర్‌ను తీసివేయండి. కొత్తదాన్ని ఇన్‌ స్టాల్ చేసే ముందు, దాని రబ్బరు సీల్‌ను తాజా ఆయిల్ తో తేలికగా పూత పూయండి. ఇది గట్టి సీలింగ్‌ను నిర్ధారిస్తుంది. లీక్‌లను నివారిస్తుంది.

ఆయిల్‌ను తిరిగి నింపండి

ఒక ఫన్నెల్‌ని ఉపయోగించి సిఫార్సు చేయబడిన తాజా ఇంజిన్ ఆయిల్‌ను పోయాలి. ఫిల్లర్ క్యాప్‌ ను మూసివేసి, ఇంజిన్‌ను ఒక నిమిషం ఆన్ చేయండి. దాన్ని స్విచ్ ఆఫ్ చేసి, డిప్‌ స్టిక్, సైట్ గ్లాస్ ఉపయోగించి ఆయిల్ లెవెల్‌ను చెక్ చేయాలి. చివరగా, ఉపయోగించిన ఆయిల్ ను సీలు చేసిన కంటైనర్‌లో సేకరించి సురక్షితంగా పారవేయండి.