భారత్‌లోనే CB500 తయారీ.. విదేశాలకు ఎగుమతి చేసేందుకు హోండా ప్లాన్!

Honda CB500 India Production: హోండా మోటార్‌ సైకిల్ అండ్ స్కూటర్ ఇండియా భారత మార్కెట్‌ లో తన కార్యకలాపాలను మరింత విస్తరించేందుకు రెడీ అవుతోంది. ఇందులో భాగంగా కొత్తగా తీసుకొస్తున్న CB500 బైక్ కు సంబంధించిన ఇంజిన్‌ను భారత్‌లోనే తయారు చేయాలని కంపెనీ నిర్ణయించింది. అంతేకాకుండా, భారత్‌లో తయారైన CB500 బైక్‌లను విదేశీ మార్కెట్లకు ఎగుమతి చేసే అవకాశాలను కూడా పరిశీలిస్తోంది. 2027లో మరిన్ని కొత్త బైక్ లను విడుదల చేయనున్నట్లు కంపెనీ వెల్లడించింది.

భారత్‌లోనే CB500 ఇంజిన్ తయారీ

హోండా ఇప్పటికే భారత్‌లో CB350 శ్రేణికి సంబంధించిన ఇంజిన్లను స్థానికంగా తయారు చేస్తోంది. ఇప్పుడు CB500 ఇంజిన్ తయారీని కూడా స్థానికంగా చేపట్టే ప్రణాళికలు రూపొందిస్తోంది. దీనివల్ల కంపెనీ భారత్‌లో తన తయారీ సామర్థ్యాన్ని మరింత పెంచుకోవాలని చూస్తోంది.

విదేశాలకు ఎగుమతి చేసే అవకాశం

భారత్‌లో తయారైన CB500 బైక్ లను ఇతర దేశాలకు ఎగుమతి చేసే అంశాన్ని కూడా హోండా పరిశీలిస్తోంది. ప్రస్తుతం దీనిపై తుది నిర్ణయం తీసుకోలేదు. ఇప్పటికే హోండా తన CB350 ఆధారిత మోడల్‌ ను విదేశాల్లో GB350 పేరుతో విక్రయిస్తోంది. యూకే, జపాన్ వంటి మార్కెట్లలో ఈ మోడల్ అందుబాటులో ఉంది. ఇదే తరహాలో CB500 కూడా ఎగుమతి మార్కెట్లలోకి వెళ్లే అవకాశాలు ఉన్నాయి.

2027లో కొత్త బైక్‌లు

భారత మార్కెట్‌ లో మరిన్ని మోడళ్లను తీసుకురావడంపై కూడా హోండా దృష్టి పెట్టింది. 2027లో కొత్త మోటార్‌ సైకిళ్లను విడుదల చేయనున్నట్లు కంపెనీ వెల్లడించింది. అయితే, ఏ మోడళ్లను తీసుకొస్తారు? ఎన్ని బైక్‌ లను విడుదల చేస్తారు? అనే వివరాలను వెల్లడించలేదు. హోండా అంతర్జాతీయ పోర్ట్‌ ఫోలియోలో ఉన్న మోడళ్లను భారత మార్కెట్‌కు అనుగుణంగా తీసుకురావచ్చని కంపెనీ భావిస్తోంది. అయితే, వినియోగదారుల డిమాండ్, స్థానిక సరఫరా వ్యవస్థ సామర్థ్యాలను బట్టి మోడళ్ల ఎంపిక ఉంటుందని స్పష్టం చేసింది. NX500 వంటి ఇతర మోడళ్ల స్థానికీకరణపై కూడా ఇంకా తుది నిర్ణయం లేదు.

తయారీ సామర్థ్యం 80 లక్షలకు పెంపు

హోండా 2028 నాటికి తన వార్షిక తయారీ సామర్థ్యాన్ని ప్రస్తుత 62.5 లక్షల నుంచి 80 లక్షల ద్విచక్ర వాహనాలకు పెంచాలని లక్ష్యంగా పెట్టుకుంది. ఇందుకోసం ఇప్పటికే ఉన్న తయారీ కేంద్రాల్లో అదనపు ఉత్పత్తి లైన్లను ఏర్పాటు చేయాలని యోచిస్తోంది.

CB500 ధర, ఇంజిన్ వివరాలు

భారత్‌లో ప్రదర్శించిన CB500లో 501cc సింగిల్ సిలిండర్ ఇంజిన్ ఉంది. ఇది 28hp పవర్, 43.3Nm టార్క్‌ ను ఉత్పత్తి చేస్తుంది. అల్లాయ్ వీల్ వేరియంట్ ఎక్స్‌ షోరూమ్ ధర రూ.2.75 లక్షల నుంచి ప్రారంభమవుతుంది. ట్యూబ్‌ లెస్ స్పోక్ వీల్ వేరియంట్ ధర రూ.3.02 లక్షల వరకు ఉంటుంది.