స్క్రాప్‌ తో సోలార్ కారు తయారీ, ఈ కామన్ మ్యాన్ క్రియేటివిటీకి హ్యాట్సాఫ్ చెప్పాల్సిందే!

Solar Car Made from Scrap Goes Viral: ఇంధన ధరలు రోజురోజుకూ పెరుగుతున్న నేపథ్యంలో చాలా మంది ప్రత్యామ్నాయ మార్గాల కోసం ప్రయత్నిస్తున్నారు. ఈ నేపథ్యంలో గుజరాత్‌కు చెందిన ఓ సాధారణ గ్రామస్తుడు తన తెలివి తేటలతో అద్భుతాన్ని సృష్టించాడు. ఆయన పేరు సాధుల్‌ భాయ్ చావడా. తన తెలివితో ఇతడు పూర్తిగా సౌరశక్తితో నడిచే కారును స్వయంగా తయారు చేశాడు. అదీ అవసరం లేని పాత ఇనుమసామానుతో. ఇంతకీ ఆయన తయారు చేసిన కారు ప్రత్యేకతలు ఏంటంటే..

సూర్యరశ్మితో నడిచే కారు

ఈ కారుకు పెట్రోల్ అవసరం లేదు. సాధారణ ఎలక్ట్రిక్ వాహనాల్లా ఛార్జింగ్ ఖర్చులు కూడా ఉండవు. ఎందుకంటే ఈ వాహనం పూర్తిగా సోలార్ పవర్ తో నడుస్తుంది. కారు మీద అమర్చిన సోలార్ ప్యానెల్స్ ద్వారా సూర్యకాంతి విద్యుత్తుగా మార్చుకుని నడుస్తుంది. ముఖ్యంగా, కారు ప్రయాణిస్తున్న సమయంలో కూడా ఈ ప్యానెల్స్ పని చేస్తూ బ్యాటరీని ఛార్జ్ చేస్తాయి. అందువల్ల అదనంగా ఎక్కడైనా ఛార్జింగ్ కోసం ఆగాల్సిన అవసరం ఉండదు.

రోజుకు 60 కిలో మీటర్ల ప్రయాణం

ఈ వాహనం రోజుకు సుమారు 50 నుంచి 60 కిలోమీటర్ల వరకు సులభంగా ప్రయాణిస్తుంది. గ్రామీణ ప్రాంతాల్లో ఇది చాలా ఉపయోగకరంగా ఉంటుంది. రోజువారీ పనులు, తక్కువ దూర ప్రయాణాలకు చక్కగా ఉపయోగపడుతుంది. ఇంకా ఆశ్చర్యకరమైన విషయం ఏమిటంటే, ఈ కారును తయారు చేయడానికి పెద్దగా ఖర్చు కాలేదు. కేవలం రూ. 30,000తోనే సాధుల్‌ భాయ్ ఈ కారును తయారు చేశాడు. అంతేకాదు, ఈ కారులో ఉపయోగించిన చాలా భాగాలు స్క్రాప్ నుంచి తీసుకున్నాడు. పాత వాహన భాగాలు, ఉపయోగం లేని వస్తువులను వినియోగించి ఈ కారును తయారు చేయడం విశేషం.

While fuel prices keep rising, a villager in Gujarat quietly built his own solution.

Sadhulbhai Chawda’s solar-powered car runs with zero petrol, zero charging cost, and is made entirely from scrap.

With panels charging even on the move, it covers 50–60 km daily.

Built for… pic.twitter.com/UtnPkRDmlZ

— The Better India (@thebetterindia) April 8, 2026

సాధుల్ భాయ్ పై స్థానికుల ప్రశంసలు

ఈ కారు తయారు చేసిన సాధుల్ భాయ్ పై స్థానికులు ప్రశంసలు కురిపిస్తున్నారు. అంతగా టెక్నికల్ నాలెడ్జ్ లేకపోయినా, ఈ కారును అద్భుతంగా తయారు చేశారని అభినందిస్తున్నారు. ఈ ప్రయత్నం కేవలం ఒక ప్రయోగం మాత్రమే కాదు, భవిష్యత్తులో ఇంధన సమస్యలకు ఒక సాధ్యమైన పరిష్కారం చూపించబోతుందని అభినందిస్తున్నారు. పెట్రోల్, డీజిల్ లాంటి ఇంధనాలపై ఆధారపడకుండా, సూర్యశక్తిని ఉపయోగించడం అద్భుతం అంటున్నారు. అంతేకాదు, సాధుల్‌భాయ్ చావడా చేసిన ఈ ఆవిష్కరణ చాలా మందికి స్ఫూర్తినిస్తోంది. తక్కువ ఖర్చుతో, అందుబాటులో ఉన్న వనరులతో కూడా కొత్త ఆలోచనలు అమలు చేయవచ్చని ఆయన నిరూపించాడు. గ్రామీణ స్థాయిలోని ఇలాంటి సృజనాత్మక ఆలోచనలు దేశ అభివృద్ధికి దోహదపడతాయని చాటి చెప్పాడు. ఈ సౌరశక్తితో నడిచే కారు ఒక సాధారణ వ్యక్తి చేసిన అసాధారణ ప్రయత్నం. ఇది కేవలం ఒక వాహనం కాదు, భవిష్యత్తు కోసం ఒక మార్గదర్శకం కూడా.