హోండా To BMW.. జూన్‌ లో మార్కెట్ లోకి అడుగు పెట్టబోతున్న 7 కొత్త కార్లు ఇవే!

June 2026 Car Launches in India: ఇండియన్ ఆటోమొబైల్ మార్కెట్‌ లో జూన్ లో సందడిగా మారబోతోంది. సాధారణ కార్ల నుంచి లగ్జరీ మోడళ్ల వరకు మొత్తం ఏడు కొత్త కార్లు ఈ నెలలో వినియోగదారుల ముందుకు రానున్నాయి. టాటా మోటార్స్, హోండా, BYD, స్కోడా, BMW, MINI, మెర్సిడెస్ బెంజ్ లాంటి ప్రముఖ కంపెనీలు కొత్త మోడళ్లను విడుదల చేసేందుకు రెడీ అయ్యాయి. ఇంతకీ ఆ మోడల్స్ ఏవనేది ఇప్పుడు తెలుసుకుందాం..

⦿ సియెర్రా EV

మాస్ మార్కెట్ విభాగంలో టాటా మోటార్స్ అత్యంత ఆసక్తిగా ఎదురుచూస్తున్న సియెర్రా EVను పరిచయం చేసే అవకాశం ఉంది. ఈ ఎలక్ట్రిక్ SUV ఒక్కసారి ఛార్జ్ చేస్తే సుమారు 600 కిలోమీటర్ల వరకు ప్రయాణించనుంది. రియర్ వీల్ డ్రైవ్, ఆల్ వీల్ డ్రైవ్ వేరియంట్లలో అందుబాటులోకి రానుంది. హ్యుందాయ్ క్రెటా EV, MG ZS EV, మహీంద్రా BE 6 లాంటి మోడళ్లకు ఇది పోటీగా నిలవనుంది.

⦿ BYD ప్లగ్ ఇన్ హైబ్రిడ్ SUV

చైనా కంపెనీ BYD కూడా ఈ నెలలో కొత్త ప్లగ్ ఇన్ హైబ్రిడ్ SUVను తీసుకురానుంది. ఇది సీలియన్ 6గా ముందుకు రానుంది. ఈ SUV కేవలం 5.5 సెకన్లలో గంటకు 100 కిలోమీటర్ల వేగాన్ని అందుకుంటుంది. 140 కిలోమీటర్ల వరకు ఎలక్ట్రిక్ రేంజ్‌ ను అందిస్తుందని కంపెనీ చెబుతోంది.

⦿ హోండా ప్రీమియం SUV

హోండా కూడా ప్రీమియం SUV విభాగంలోకి తిరిగి అడుగుపెట్టనుంది. కంపెనీ ZR-V హైబ్రిడ్ SUVని భారత మార్కెట్లో ప్రవేశపెట్టనుంది. 22.8 కిలోమీటర్ల వరకు మైలేజ్ అందించే ఈ మోడల్ కేవలం 7.9 సెకన్లలో 100 కిలోమీటర్ల వేగాన్ని అందుకుంటుంది.

⦿ స్కోడా కోడియాక్ RS

స్కోడా కోడియాక్ RSను ఈ నెలలో విడుదల చేయనుంది. 7 సీటర్ వెర్షన్‌ లో వచ్చే ఈ SUV కేవలం 6.3 సెకన్లలో 0-100 కిలోమీటర్ల వేగాన్ని అందుకుంటుంది. గరిష్టంగా 231 కిలోమీటర్ల వేగంతో ప్రయాణించే సామర్థ్యం దీనికి ఉంది.

⦿ BMW X6 M60i

లగ్జరీ విభాగంలో BMW X6 M60i మళ్లీ భారత మార్కెట్లోకి రానుంది. 4.4 లీటర్ ట్విన్ టర్బో పెట్రోల్ ఇంజిన్‌ తో కూడిన ఈ SUV కూపే 4.3 సెకన్లలో 100 కిలోమీటర్ల వేగాన్ని అందుకుంటుంది. BMW ఇప్పటికే ఈ మోడల్‌ కు బుకింగ్స్ ప్రారంభించింది.

⦿ మినీ కంట్రీమాన్ సి

జూన్ 17న మినీ కంట్రీమాన్ సి విడుదల కానుంది. 1.5 లీటర్ టర్బో పెట్రోల్ ఇంజిన్‌ తో వచ్చే ఈ SUVకి 7-స్పీడ్ డ్యూయల్ క్లచ్ ఆటోమేటిక్ గేర్‌ బాక్స్‌ ను అందిస్తున్నారు.

⦿ బెంజ్ ఎస్ క్లాస్ ఫేస్‌లిఫ్ట్

ఇక ఈ నెలలో అత్యంత ఖరీదైన లాంచ్‌గా మెర్సిడెస్-బెంజ్ కొత్త ఎస్ క్లాస్ ఫేస్‌ లిఫ్ట్ నిలవనుంది. జూన్ 15న విడుదల కానున్న ఈ లగ్జరీ సెడాన్‌లో అత్యాధునిక డిజిటల్ హెడ్‌ ల్యాంప్స్, పెద్ద టచ్‌ స్క్రీన్లు, కొత్త MBUX సూపర్‌ స్క్రీన్ లాంటి ఫీచర్లు ఉంటాయి.