పెట్రోల్ vs సీఎన్జీ.. రోజు వారీ ప్రయాణాలకు ఏ కారు బెస్ట్?

CNG vs Petrol Cars: కొత్త కారు కొనాలని భావించే వారికి ఎదురయ్యే ఫస్ట్ డౌట్.. పెట్రోల్ కారు తీసుకోవాలా? లేక సీఎన్జీ కారు కొనాలా?. ముఖ్యంగా ప్రతి రోజూ ఆఫీస్, కాలేజీ, బిజినెస్ పనులు, కుటుంబ అవసరాల కోసం కారును ఎక్కువగా ఉపయోగించే వారికి ఈ నిర్ణయం చాలా ముఖ్యం. ఎందుకంటే, కారు ధరతో పాటు నెలవారీ ఫ్యూయల్ ఖర్చు, మెయింటెనెన్స్, డ్రైవింగ్ సౌకర్యం లాంటి అంశాలను కూడా పరిగణలోకి తీసుకోవాలి.

పెట్రోల్ కారు ఎందుకు?

పెట్రోల్ కార్లకు దేశ వ్యాప్తంగా మంచి డిమాండ్ ఉంది. దాదాపు ప్రతి ప్రాంతంలోనూ పెట్రోల్ బంకులు అందుబాటులో ఉండటం పెద్ద ప్లస్ పాయింట్. ఎక్కడికైనా వెళ్లినా ఫ్యూయల్ గురించి ఎక్కువగా ఆలోచించాల్సిన అవసరం ఉండదు. అంతేకాదు.. పెట్రోల్ కార్లు సాధారణంగా సీఎన్జీ కార్లతో పోలిస్తే కొంత మంచి పికప్, డ్రైవింగ్ రిఫైన్‌మెంట్ అందిస్తాయి. హైవేపై ఎక్కువగా ప్రయాణించే వారికి కూడా పెట్రోల్ కారు సౌకర్యంగా ఉంటుంది. మరో ముఖ్యమైన విషయం ఏమిటంటే.. పెట్రోల్ కార్లలో బూట్ స్పేస్ విషయంలో పెద్దగా ఇబ్బంది ఉండదు. సీఎన్జీ కిట్ కోసం ప్రత్యేక ట్యాంక్ ఉండటంతో పోలిస్తే సామాను పెట్టుకునే స్థలం ఎక్కువగా లభించే అవకాశం ఉంటుంది.

సీఎన్జీ కారుతో ఖర్చు తగ్గుతుందా?

రోజూ ఎక్కువ దూరం ప్రయాణించే వారికి సీఎన్జీ కారు బెస్ట్ ఆప్షన్ గా ఉంటుంది. సాధారణంగా సీఎన్జీ ఇంధనం పెట్రోల్ కంటే తక్కువ ధరకు లభించడంతో కిలోమీటర్‌కు అయ్యే ఖర్చు తగ్గే అవకాశం ఉంటుంది. ప్రతిరోజూ 30 నుంచి 50 కిలోమీటర్లు, అంతకంటే ఎక్కువ ప్రయాణించే వ్యక్తి నెలవారీ ఇంధన ఖర్చులో కొంత ఆదా కనిపించవచ్చు. అయితే, సీఎన్జీ వాహనాల్లో కొన్ని విషయాలను గుర్తుంచుకోవాలి. సీఎన్జీ స్టేషన్లు పెరుగుతున్నప్పటికీ ప్రతి ప్రాంతంలో పెట్రోల్ బంకులంత విస్తృతంగా ఉండకపోవచ్చు. అందువల్ల సుదూర ప్రయాణాలు చేసేవారు తమ రూట్‌ లో సీఎన్జీ దొరుకుతుందా? లేదా? అనేది చూసుకోవడం మంచిది.

పనితీరులో తేడా ఎంత?

పెట్రోల్, సీఎన్జీ కార్ల మధ్య పనితీరులో కూడా కొంత తేడా ఉంటుంది. సాధారణంగా పెట్రోల్ మోడ్‌ లో ఇంజిన్ స్పందన కొంత చురుగ్గా అనిపిస్తుంది. సీఎన్జీ మోడ్‌ ముఖ్య ఉద్దేశం తక్కువ ఖర్చుతో ఎక్కువ దూరం ప్రయాణించడం. అందుకే స్పోర్టీ డ్రైవింగ్, తరచూ హైవే ప్రయాణాలు చేసేవారు పెట్రోల్ వైపు మొగ్గు చూపవచ్చు. సిటీలో ప్రశాంతంగా రోజువారీ ప్రయాణాలు చేసే వారికి సీఎన్జీ మరింత ఉపయోగకరంగా ఉండొచ్చు.

మరి ఏది బెస్ట్?

రోజుకు ఎక్కువ కిలోమీటర్లు ప్రయాణిస్తూ ఇంధన ఖర్చును తగ్గించుకోవాలనుకునే వారికి సీఎన్జీ మంచి ఆప్షన్ కావచ్చు. ముఖ్యంగా రోజువారీ సిటీ కమ్యూట్ ఎక్కువగా ఉన్నవారికి ఉపయోగపడుతుంది. అదే సమయంలో తక్కువ దూరం మాత్రమే ప్రయాణించే వారు, తరచూ లాంగ్ డ్రైవ్‌లు చేసే వారు, సీఎన్జీ స్టేషన్లు అందుబాటులో లేని ప్రాంతాల్లో ఎక్కువగా తిరిగేవారు పెట్రోల్ కారును తీసుకోవచ్చు.