నిద్రలేవగానే ఒళ్లు నొప్పులా ? మీరు చేస్తున్న ఈ 5 తప్పులే కారణం!

Morning body pain causes: ఉదయం నిద్రలేవగానే ఉత్సాహంగా ఉండాల్సింది పోయి. ఒళ్లు నొప్పులు, నడుము పట్టేయడం లేదా మెడ నొప్పితో సతమతమవుతున్నారా? అయితే మీరు రాత్రి పడుకునే ముందు లేదా నిద్రలో చేసే కొన్ని అలవాట్లే ఇందుకు కారణం కావచ్చు. చాలా మంది ఈ నొప్పులను వయసు రీత్యా వచ్చేవిగా లేదా పని ఒత్తిడి వల్ల కలిగేవిగా భావిస్తారు. కానీ.. మన రోజువారీ జీవితంలో మనకు తెలియకుండానే చేసే 5 అలవాట్లు మన వెన్నెముక, కండరాలపై తీవ్ర ప్రభావం చూపుతాయి. ఆ అలవాట్లు ఏమిటో తెలుసుకుని సరిదిద్దుకుంటే ప్రతి ఉదయం హాయిగా మారుతుంది.

ఉదయం ఒళ్లు నొప్పులకు కారణమయ్యే 5 సాధారణ అలవాట్లు :

రాత్రి పడుకున్నప్పుడు మన శరీరం రిపేర్ మోడ్‌లో ఉంటుంది. అంటే కండరాలు విశ్రాంతి తీసుకుని మరుసటి రోజుకు సిద్ధమవుతాయి. కానీ.. మన తప్పుడు అలవాట్ల వల్ల శరీరం విశ్రాంతికి బదులు ఒత్తిడికి గురవుతుంది. అవేంటో ఇప్పుడు చూద్దాం..

1.తప్పుడు స్లీపింగ్ పొజిషన్:
చాలా మంది బోర్లా పడుకుంటారు (కడుపుపై ఒత్తిడి పడేలా). ఇది వెన్నెముకపై విపరీతమైన ఒత్తిడిని పెంచుతుంది. ఇలా పడుకోవడం వల్ల మెడ ఒక వైపుకు తిరిగి ఉంటుంది, దీనివల్ల ఉదయం లేవగానే మెడ పట్టేయడం లేదా భుజాల నొప్పులు వస్తాయి. అలాగే.. వెల్లకిలా పడుకున్నప్పుడు కాళ్ల కింద చిన్న దిండు లేకపోయినా నడుము నొప్పి వచ్చే అవకాశం ఉంది.

2. నాణ్యత లేని పరుపు, దిండు:
మీరు వాడే పరుపు మరీ మెత్తగా ఉన్నా లేదా మరీ గట్టిగా ఉన్నా వెన్నెముక యొక్క సహజమైన ఆకృతి దెబ్బతింటుంది. పరుపు పాతదైపోయి మధ్యలో గుంటలు పడితే.. అది మీ కండరాలకు సరైన సపోర్ట్ ఇవ్వదు. అలాగే.. చాలా ఎత్తైన దిండు వాడటం వల్ల మెడ ఎముకలపై ఒత్తిడి పెరిగి తీవ్రమైన తలనొప్పికి కూడా దారి తీస్తుంది.

3. డీహైడ్రేషన్ :
వినడానికి ఆశ్చర్యంగా ఉన్నా.. శరీరంలో నీటి శాతం తగ్గడం వల్ల కూడా కండరాల నొప్పులు వస్తాయి. మన కండరాలు, కీళ్ల మధ్య ఉండే ద్రవం సరిగ్గా ఉండాలంటే నీరు అవసరం. రాత్రి పూట తగినంత నీరు తాగకుండా పడుకుంటే.. కండరాలు బిగుసుకుపోయి ఉదయం లేవగానే నొప్పిగా అనిపిస్తుంది.

4.పడుకునే ముందు ఫోన్ వాడటం :
పడుకునే ముందు గంటల తరబడి ఫోన్ చూడటం వల్ల మెడ వంగి ఉంటుంది. దీనిని ‘టెక్ నెక్’అంటారు. ఈ పొజిషన్‌లో ఎక్కువ సేపు ఉండటం వల్ల మెడ, వెన్ను పైభాగంలోని కండరాలు అలసిపోతాయి. నిద్రలో కూడా ఆ ఒత్తిడి అలాగే ఉండి.. ఉదయం లేవగానే తీవ్రమైన అసౌకర్యాన్ని కలిగిస్తుంది.

Also Read: ఆల్కహాల్‌తో కలిపి పొరపాటున కూడా.. ఈ స్నాక్స్ తినొద్దు

5. వ్యాయామం లేకపోవడం లేదా విపరీతమైన ఒత్తిడి :
రోజంతా ఒకే చోట కూర్చుని పని చేసే వారిలో కండరాలు దృఢత్వాన్ని కోల్పోతాయి. కండరాలు ఫ్లెక్సిబుల్‌గా లేనప్పుడు.. నిద్రలో చిన్నపాటి కదలికలకే అవి పట్టేస్తాయి. అలాగే.. మానసిక ఒత్తిడి ఎక్కువగా ఉన్నప్పుడు మనం తెలియకుండానే నిద్రలో దవడలను, కండరాలను బిగబడతాము. ఇది ఉదయం బాడీ పెయిన్స్‌కు ప్రధాన కారణం అవుతుంది.

పరిష్కారం ఏంటి?

1.వీలైనంత వరకు పక్కకు తిరిగి పడుకోండి, మోకాళ్ల మధ్య చిన్న దిండు ఉంచుకోవడం వల్ల వెన్నెముకపై ఒత్తిడి తగ్గుతుంది.

2.ప్రతి 7-8 ఏళ్లకు ఒకసారి మీ పరుపును మార్చండి.

3.పడుకునే ముందు తేలికపాటి స్ట్రెచింగ్ వ్యాయామాలు చేయండి.

4. రోజుకు కనీసం 3-4 లీటర్ల నీరు తాగండి.

Share

• 
• 
• 
• 
• 
•