Vehicle Sales:దేశంలో వాహనాల అమ్మకాలు జోరుగా సాగుతున్నాయి. కార్లు, బైకులే కాదు… బిజినెస్ వెహికల్స్, ట్రాక్టర్స్.. ఇలా అన్ని విభాగాల వాహనాల విక్రయాల్లోనూ భారీ వృద్ధి నమోదైంది. గత జనవరిలో అన్ని రకాల వాహనాల అమ్మకాలు 14 శాతం పెరిగి… 18,26,669 యూనిట్లకు చేరాయి. వీటిలో త్రిచక్ర వాహనాల అమ్మకాలు అత్యధికంగా 59 శాతం పెరిగాయి.
కార్ల అమ్మకాలు 2022 జనవరితో పోలిస్తే… ఈ ఏడాది జనవరిలో 22 శాతం పెరిగి 3.4 లక్షలకు చేరాయి. టూ వీలర్స్‌ అమ్మకాలు 10 శాతం పెరిగి 12.65 లక్షలకు చేరాయి. కార్ల కంపెనీల్లో మారుతీ సుజుకీ, టాటా మోటార్స్, ఎంఅండ్‌ఎం, టయోటా, కియా ఇండియా, హ్యుందాయ్‌ జనవరిలో భారీగానే కార్లు అమ్మాయి. మారుతీ 12 శాతం వృద్ధితో అత్యధికంగా 1,72,535 వాహనాలను అమ్మగా… మహీంద్రా అండ్ మహీంద్రా 37 శాతం వృద్ధితో 64,335 వాహనాలను విక్రయించింది. టాటా మోటార్స్ కార్ల అమ్మకాలు కూడా 6 శాతం పెరిగి 81,069 యూనిట్లకు చేరాయి. టయోటా కార్ల అమ్మకాలు ఏకంగా 175 శాతం పెరిగి 12,835 యూనిట్లుగా నమోదయ్యాయి. కియా ఇండియా విక్రయాలు 48 శాతం పెరిగి 28,634 యూనిట్లకు చేరాయి. హ్యుండాయ్‌ 17 శాతం వృద్ధితో 62,276 వాహనాలు అమ్మింది.
ఇక త్రిచక్ర వాహనాల విక్రయాలు 59 శాతం పెరిగి 65,796 యూనిట్లకు చేరాయి. వాణిజ్య వాహనాల అమ్మకాలు 16 శాతం పెరిగి 82,428 యూనిట్లకు చేరాయి. ట్రాక్టర్లు 8 శాతం వృద్ధితో 73,156 యూనిట్లు అమ్ముడుపోయాయి. చైనాలో పారిశ్రామిక కార్యకలాపాలు మళ్లీ పుంజుకోవడం… వాహన విడిభాగాలు, సెమీ కండక్టర్ల కొరత తగ్గుతుండటంతో… వాహనాల అమ్మకాలు జోరుగా సాగుతున్నట్లు నిపుణులు చెబుతున్నారు. భవిష్యత్‌లో వాహనాల కోసం వేచి చూసే సమయం కూడా తగ్గిపోతుందని… కార్ల విక్రయాలు మరింతగా దూసుకెళ్తాయని అంచనా వేస్తున్నారు.
Share
Nagababu: సినీ విమ‌ర్శ‌కుల‌పై నాగ‌బాబు ఫైర్.. ఆర్జీవీ సపోర్ట్
Spy Balloon:గాలిలో స్పై బెలూన్.. చైనా కొత్త వ్యూహం..!
