డైటింగ్ చేస్తున్నా.. బరువు తగ్గకపోవడానికి గల అసలు కారణాలు ఇవే!

Weight Gain On Low Calorie Diet: బరువు తగ్గాలనే ప్రయాణంలో చాలా మంది చేసే మొదటి పని ‘తక్కువ క్యాలరీలు తీసుకోవడం. కానీ, ఆశ్చర్యకరంగా కొంత మంది డైటింగ్ చేస్తున్నా బరువు తగ్గకపోగా.. ఇంకా పెరుగుతుంటారు. ఇది వినడానికి వింతగా అనిపించినా, దీని వెనక బలమైన శారీరక, హార్మోన్ల కారణాలు ఉన్నాయి. మనం తీసుకునే క్యాలరీల సంఖ్య కంటే.. మన శరీరం ఆ క్యాలరీలను ఎలా వినియోగిస్తుంది అనేదే ముఖ్యం. తక్కువ క్యాలరీలు తీసుకుంటున్నప్పుడు మన శరీరం ‘సర్వైవల్ మోడ్’లోకి వెళ్లడం వల్ల బరువు పెరిగే అవకాశం ఉంటుంది. ఆ 8 కారణాలేంటో ఇప్పుడు వివరంగా చూద్దాం.

లో-క్యాలరీ డైట్‌లో ఉన్నా బరువు పెరగడానికి 8 కారణాలు:

1. మెటబాలిజం మందగించడం :
మీరు అవసరమైన దాని కంటే చాలా తక్కువ క్యాలరీలు తీసుకున్నప్పుడు.. మీ శరీరం శక్తిని ఆదా చేయడానికి ప్రయత్నిస్తుంది. దీని వల్ల మీ మెటబాలిజం రేటు పడిపోతుంది. శరీరం ఫ్యాట్‌ను కరిగించడానికి బదులు, భవిష్యత్తు అవసరాల కోసం నిల్వ చేయడం ప్రారంభిస్తుంది.

2. కండరాల క్షీణత:
బరువు తగ్గే క్రమంలో సరైన ప్రోటీన్ తీసుకోకుండా కేవలం క్యాలరీలు తగ్గిస్తే.. శరీరం కొవ్వుతో పాటు కండరాలను కూడా కరిగిస్తుంది. కండరాలు విశ్రాంతి సమయంలో కూడా క్యాలరీలను కరిగిస్తాయి. కండరాల శాతం తగ్గితే.. మీ శరీరం క్యాలరీలను బర్న్ చేసే సామర్థ్యం తగ్గిపోతుంది.

3. నిద్ర లేకపోవడం:
తక్కువ తిన్నా సరే, తగినంత నిద్ర లేకపోతే శరీరంలో ‘కార్టిసాల్’ అనే ఒత్తిడి హార్మోన్ పెరుగుతుంది. ఇది ఆకలిని పెంచే ‘గ్రెలిన్’ హార్మోన్‌ను ప్రేరేపిస్తుంది. అంతే కాకుండా పొట్ట చుట్టూ కొవ్వు పేరుకుపోయేలా చేస్తుంది.

4. అధిక ఒత్తిడి :
డైటింగ్ చేయడం వల్ల కూడా కొంత మందిలో మానసిక ఒత్తిడి పెరుగుతుంది. ఒత్తిడి వల్ల ఇన్సులిన్ స్థాయిలు అస్తవ్యస్తమై.. శరీరం క్యాలరీలను ఫ్యాట్‌గా మార్చి నిల్వ చేయడం మొదలుపెడుతుంది.

5. నీటి నిల్వలు:
డైట్‌లో మార్పులు చేసినప్పుడు లేదా అధిక సోడియం (ఉప్పు) తీసుకున్నప్పుడు శరీరం నీటిని నిల్వ చేసుకుంటుంది. ఇది వాస్తవానికి కొవ్వు పెరగడం కాకపోయినా, వెయింగ్ మెషిన్ మీద బరువు ఎక్కువగా చూపిస్తుంది.

6. ఎక్కువ క్యాలరీలు :
కొన్నిసార్లు ‘హెల్తీ ఫుడ్స్’ అని పిలవబడే నట్స్, ఆలివ్ ఆయిల్, స్మూతీలలో క్యాలరీలు చాలా ఎక్కువగా ఉంటాయి. మనం తక్కువ తింటున్నామని అనుకుంటాం కానీ.. తెలియకుండానే బాడీకి కావాల్సిన దానికంటే ఎక్కువ క్యాలరీలు అందుతుంటాయి.

Also Read: అరటిపండు సహజంగా పండిందా లేదా కెమికల్‌తోనా? ఈ సింపుల్ ట్రిక్స్‌తో కనిపెట్టండి!

7. హార్మోన్ల అసమతుల్యత:
థైరాయిడ్ సమస్యలు , పిసిఓఎస్ లేదా ఇన్సులిన్ రెసిస్టెన్స్ ఉన్నవారిలో తక్కువ క్యాలరీలు తీసుకున్నా బరువు తగ్గడం చాలా కష్టమవుతుంది. ఇలాంటి వారు కేవలం డైటింగ్ కాకుండా చికిత్స కూడా తీసుకోవాలి.

8. ప్రోటీన్ , ఫైబర్:
క్యాలరీలు తగ్గించినా.. తీసుకునే ఆహారంలో ప్రోటీన్ , ఫైబర్ లేకపోతే ఆకలి త్వరగా వేస్తుంది. దీని వల్ల రక్తంలో చక్కెర స్థాయిలు వేగంగా పెరిగి తగ్గిపోతుంటాయి. ఇది ఫ్యాట్ స్టోరేజ్‌కు దారి తీస్తుంది.

బరువు తగ్గడం అనేది కేవలం క్యాలరీలను తగ్గించడం మాత్రమే కాదు.. సరైన పోషకాలను సమతుల్యం చేయడం. అతిగా డైటింగ్ చేయడం మానేసి, క్రమం తప్పకుండా వ్యాయామం చేస్తూ.. ఒత్తిడి లేని లైఫ్ స్టైల్ అలవాటు చేసుకోండి.