ఆటిజం ఉన్న పిల్లలకు ఏకాగ్రత మెరుగుపరిచే టెక్నిక్.. కొత్త అధ్యయనంలో ఆసక్తికర ఫలితాలు

Horseback riding for autism children| ఆటిజం ఉన్న పిల్లలు ఇతరులతో మాట్లాడటం, భావోద్వేగాలను నియంత్రించడం, ఒక విషయంపై దృష్టి పెట్టడం వంటి అంశాల్లో ఇబ్బందులు ఎదుర్కొంటారు. ఇలాంటి పిల్లలకు సహాయం చేసేందుకు నిపుణులు కొత్త మార్గాలను అన్వేషిస్తున్నారు. ఈ క్రమంలో గుర్రపు స్వారీపై నిర్వహించిన ఓ అధ్యయనం ఆసక్తికర విషయాలను వెల్లడించింది. గుర్రపు స్వారీ, ఇతర కార్యకలపాలు చేసిన పిల్లల్లో హైపర్ యాక్టివిటీ తగ్గినట్లు పరిశోధకులు గుర్తించారు.

గుర్రపు స్వారీ చేసిన ఆటిజం పిల్లలపై అధ్యయనం

అమెరికాలోని యూనివర్సిటీ ఆఫ్ కొలరాడో అన్‌షుట్జ్ మెడికల్ క్యాంపస్ పరిశోధకులు ఈ అధ్యయనం నిర్వహించారు. పీడియాట్రిక్స్ జర్నల్‌లో ప్రచురితమైన ఈ పరిశోధనలో ఆటిజంతో పాటు మరో మానసిక ఆరోగ్య సమస్య ఉన్న పిల్లలను పరిశీలించారు. పరిశోధకులు పిల్లలను మూడు బృందాలుగా విభజించారు. ఒక బృందం చికిత్సలో భాగంగా గుర్రపు స్వారీ చేసింది. మరో బృందం గుర్రాలను ఎక్కకుండా, వాటితో నేరుగా సంప్రదించకుండా గుర్రాల గురించి తెలుసుకునే కార్యక్రమాల్లో పాల్గొంది. మూడో బృందం వేచి ఉండే జాబితాలో ఉంది. గుర్రపు స్వారీ చేసిన పిల్లల్లో హైపర్ యాక్టివిటీ ఎక్కువగా తగ్గినట్లు పరిశోధకులు గుర్తించారు. గుర్రాలకు సంబంధించిన కార్యకలాపాల్లో పాల్గొన్న రెండు బృందాల్లోనూ చిరాకు తగ్గడం, భావోద్వేగాలను నియంత్రించడం, సామాజిక నైపుణ్యాలు మెరుగుపడటం వంటి మార్పులు కనిపించాయి.

గుర్రపు స్వారీ పిల్లలకు ఎలా సహాయపడుతుంది?

గుర్రపు స్వారీలో శారీరక కదలికలు, ఏకాగ్రత, సూచనలను పాటించడం ముఖ్యమైనవి. ఆటిజం పిల్లలకు శిక్షణ ఇచ్చే ట్రైనర్స్ సూచనలను అర్థం చేసుకుని వాటికి అనుగుణంగా స్పందించాలి. ఈ ప్రక్రియ వారికి దృష్టిని నిలిపి ఉంచడం, కదలికలను సమన్వయం చేసుకోవడం నేర్చుకునేందుకు తోడ్పడుతుంది. గుర్రాలు మనుషుల శరీర భాషకు స్పందిస్తాయి. వాటితో గడిపే సమయం పిల్లలకు ఇతరుల స్పందనలను గమనించడం, భావోద్వేగాలను అర్థం చేసుకోవడం వంటి నైపుణ్యాలను అభ్యసించే అవకాశాన్ని ఇస్తుంది. అయితే, ఈ ప్రయోజనాలకు కచ్చితమైన కారణాలు ఏమిటో తెలుసుకోవడానికి మరిన్ని పరిశోధనలు అవసరం.

Also Read: మీ పిల్లాడు ఆలస్యంగా మాట్లాడుతున్నాడా? త్వరగా మాట్లాడేందుకు డాక్టర్ చెప్పిన టిప్స్ ఇవే

గుర్రపు స్వారీ చేయకపోయినా ప్రయోజనాలు ఉంటాయా?

అధ్యయనంలో గుర్రపు స్వారీ చేయని పిల్లలు కూడా గుర్రాల గురించి తెలుసుకున్నారు. అలాగే, నిజమైన గుర్రం ఆకారంలో తయారు చేసిన పెద్ద బొమ్మతో కొన్ని యాక్టివిటీస్ చేయించారు. ఈ బృందంలోనూ కొన్ని సానుకూల మార్పులు కనిపించాయి. అందువల్ల ప్రతి పిల్లవాడికీ గుర్రపు స్వారీ తప్పనిసరి కాకపోవచ్చు. జంతువులంటే భయం ఉన్న పిల్లలకు ఇతర కార్యకలాపాలు అనుకూలంగా ఉండవచ్చు.

Also Read: పిల్లల చేతి నుంచి ఫోన్ తీసుకోగానే ఏడుస్తున్నారా? ఇలా చేస్తే స్వయంగా ఇచ్చేస్తాడు

గుర్రపు స్వారీ వైద్య చికిత్సకు ప్రత్యామ్నాయమా?

ఈ అధ్యయనం గుర్రపు స్వారీ ఆటిజానికి పూర్తిస్థాయి చికిత్స అని నిరూపించలేదు. అలాగే, మందులు లేదా ఇతర వైద్య చికిత్సలను ఆపవచ్చని కూడా చెప్పలేదు. ప్రతి పిల్లవాడి అవసరాలు భిన్నంగా ఉంటాయి. అందువల్ల కొత్త కార్యక్రమాన్ని ప్రారంభించే ముందు వైద్య నిపుణులను సంప్రదించాలి. పిల్లల భద్రత, ఆసక్తి, వ్యక్తిగత అవసరాలను పరిగణనలోకి తీసుకోవాలి.

గమనిక: ఈ కథనం సాధారణ సమాచారం కోసం మాత్రమే. వైద్యుల సలహాకు ప్రత్యామ్నాయం కాదు.