పిల్లల చేతి నుంచి ఫోన్ తీసుకోగానే ఏడుస్తున్నారా? ఇలా చేస్తే స్వయంగా ఇచ్చేస్తాడు

Children and Mobile Addiction| పిల్లల చేతిలో నుంచి మొబైల్ ఫోన్ తీసుకోగానే వాళ్లు ఏడవడం, ఫోన్ వెంటనే తిరిగివ్వాలని మొండికేయడం, కోపంతో గొడవ చేయడం లాంటివి దాదాపు ప్రతి తల్లిదండ్రులు ఎదుర్కొనే సమస్య. మొబైల్ గేమ్స్, వీడియోలకు అలవాటు పడిన పిల్లలు ఒక్కసారిగా ఫోన్ పక్కన పెట్టడానికి ఇష్టపడరు. అయితే, పిల్లలపై కోప్పడటం లేదా బలవంతంగా ఫోన్ లాక్కోవడం చేస్తే సమస్య మరింత పెరిగే అవకాశం ఉంది. అందుకే కొన్ని చిన్న మార్పులతో పిల్లలకు స్క్రీన్ టైమ్‌పై నియంత్రణ నేర్పించాలి.

1. ఫోన్ పక్కన పెట్టాలని 10 నిమిషాలు ముందే చెప్పండి

పిల్లలు ఫోన్ చూస్తున్నప్పుడు అకస్మాత్తుగా లాక్కోవద్దు. స్క్రీన్ టైమ్ ముగియడానికి 10 నిమిషాల ముందే వారికి చెప్పండి. “ఇంకా 10 నిమిషాలు ఆడుకుని ఫోన్ పక్కన పెట్టాలి” అని ప్రశాంతంగా వివరించండి. దీంతో పిల్లలు మానసికంగా సిద్ధమవుతారు. ఆడుతున్న గేమ్‌ను పూర్తి చేసుకోవడానికి లేదా వీడియో చూడటం ముగించడానికి సమయం దొరుకుతుంది. అయితే, సమయం పూర్తయ్యాక ప్రతిసారీ మరికొంత సమయం ఇవ్వకండి. తల్లిదండ్రులు ఒకే నియమాన్ని స్థిరంగా పాటిస్తే పిల్లలు కూడా క్రమంగా అలవాటు పడతారు.

2. పిల్లలు ఏం చేస్తున్నారో తెలుసుకుని లిమిట్ పెట్టండి

ఫోన్ తీసుకునే ముందు పిల్లలు ఏం చేస్తున్నారో అడగండి. గేమ్ ఆడుతుంటే ‌ఏ లెవెల్‌లో ఉన్నారు? ఆట ముగియడానికి ఎంత సమయం పడుతుంది? వంటి ప్రశ్నలు వేయండి. వీలైతే ప్రస్తుత గేమ్ లెవెల్‌ని పూర్తి చేసేందుకు అవకాశం ఇవ్వండి. అయితే, దీనివల్ల గంటల తరబడి ఫోన్ వాడేందుకు అనుమతి ఇచ్చినట్లు కాదు. నిర్ణయించిన సమయానికి ఫోన్ పక్కన పెట్టాల్సిందేనని స్పష్టంగా చెప్పండి. పిల్లలతో అరవకుండా, ప్రశాంతంగా మాట్లాడండి. వారి అభిప్రాయాలను గౌరవిస్తూనే నియమాలను పాటించమని చెప్పండి.

3. ఫోన్‌కు బదులుగా ఆసక్తికరమైన పనులు చూపించండి

ఫోన్ తీసుకున్న తర్వాత చేయడానికి ఇంకేమీ లేకపోతే పిల్లలు మళ్లీ మొబైల్ అడగవచ్చు. అందుకే ముందుగానే ప్రత్యామ్నాయాలను సిద్ధం చేయండి. వారికి ఇష్టమైన ఆటలు, బొమ్మలు, పెయింటింగ్, పుస్తకాలు లేదా కొంచెం స్నాక్స్ తినడానికి ఇవ్వండి. వీలైతే పిల్లలతో కలిసి ఆడండి.

Also Read: స్వీట్స్ తినడం కంటే ఇది డేంజర్.. షుగర్ సమస్య పెరగడానికి అతిపెద్ద కారణం ఇదే

పిల్లల్లో ఫోన్ అలవాటు ఎలా తగ్గించాలి?

పిల్లలు ప్రతిరోజూ కొంతసేపు బయట ఆడుకునేలా ప్రోత్సహించండి. ఫోన్ వాడే సమయానికి స్పష్టమైన నియమాలు పెట్టండి. సంగీతం, చదవడం, పెయింటింగ్ వంటి ఆసక్తులను పెంచండి. పిల్లలు ఏడ్చిన ప్రతిసారీ ఫోన్ ఇచ్చి శాంతింపజేయకండి. అలాగే, తల్లిదండ్రులు కూడా పిల్లలతో ఉన్నప్పుడు ఫోన్ వాడకాన్ని తగ్గించాలి. వారితో మాట్లాడటం, కథలు చెప్పడం, కలిసి ఆటలు ఆడటం వంటి అలవాట్లు పెంచాలి.

పిల్లల్లో ఆరోగ్యకరమైన స్క్రీన్ టైమ్ అలవాట్లు పెంచడానికి సహనం, ప్రేమ, క్రమశిక్షణ అవసరం. ముందుగానే హెచ్చరించడం, పిల్లల మాట వినడం, ప్రత్యామ్నాయ పనులు చూపించడం ద్వారా ఫోన్ కోసం పిల్లలు గొడవ చేయడాన్ని తగ్గించవచ్చు.

Also Read: మీరు నమ్మిన వ్యక్తి మోసం చేస్తే నిశ్శబ్దంగా సహించాల్సిన అవసరం లేదు.. చాణక్యుడు ఏం చెప్పాడంటే