సహజ సిద్ధమైన డిటాక్స్ డ్రింక్.. ఎండ వల్ల వచ్చే నీరసం, వేడికి ఇదే బెస్ట్ సొల్యూషన్!

Natural remedy for Acidity in summer: సమ్మర్‌లో ఎండ తీవ్రత వల్ల శరీరంలో ఉష్ణోగ్రత పెరిగి జీర్ణ సంబంధిత సమస్యలు తలెత్తడం సర్వసాధారణం. ముఖ్యంగా.. ఎసిడిటీ, గ్యాస్, కడుపులో మంట వంటివి మనల్ని ఉక్కిరిబిక్కిరి చేస్తాయి. అయితే.. వీటన్నిటికీ మన వంటింట్లోనే ఒక అద్భుతమైన పరిష్కారం ఉంది. అదే నల్ల ద్రాక్ష , సోంపు కలిపిన నీరు. రాత్రి పూట వీటిని నానబెట్టి, ఉదయాన్నే పరగడుపున ఆ నీటిని తాగడం వల్ల శరీరానికి కలిగే లాభాలు అన్నీ ఇన్నీ కావు. ఆ చల్లని ఆరోగ్య రహస్యం ఏంటో ఇప్పుడు వివరంగా చూద్దాం.

సోంపు, ఎండు నల్ల ద్రాక్ష కేవలం రుచి కోసం మాత్రమే కాదు, ఔషధ గుణాలకు కూడా పెట్టింది పేరు. ముఖ్యంగా 40 డిగ్రీల ఎండల్లో శరీరం లోపల చల్లగా ఉండాలంటే.. ఈ రెండూ కలిపి వాడటం సంజీవనిలా పని చేస్తుంది.

తయారీ విధానం:
ఒక గ్లాసు నీటిలో 5 నుంచి 8 ఎండు నల్ల ద్రాక్షలు, ఒక టేబుల్ స్పూన్ సోంపు గింజలు వేయండి. రాత్రంతా వీటిని నానబెట్టి, ఉదయాన్నే ఆ నీటిని వడకట్టి తాగాలి. కావాలనుకుంటే.. నానిన ద్రాక్షలను కూడా తినవచ్చు.

జీర్ణక్రియకు ప్రాణం :
వేసవిలో మనం ఏది తిన్నా త్వరగా అరగదు. కడుపు ఉబ్బరంగా అనిపిస్తుంది. సోంపులో ఉండే ‘అనెథోల్’ అనే సమ్మేళనం జీర్ణ రసాలను ప్రేరేపిస్తుంది. నల్ల ద్రాక్షలో ఉండే ఫైబర్ మలబద్ధకాన్ని వదిలిస్తుంది. ఈ రెండు కలిసిన నీటిని తాగడం వల్ల జీర్ణక్రియ మెరుగుపడి, కడుపు తేలికగా మారుతుంది.

ఎసిడిటీ , గుండెల్లో మంటకు చెక్:
ఎండల వల్ల శరీరంలో ‘పిత్త దోషం’ పెరుగుతుంది. దీనివల్ల ఎసిడిటీ, గుండెల్లో మంట వస్తాయి. సోంపు సహజంగానే క్షార గుణాన్ని కలిగి ఉంటుంది, ఇది కడుపులోని అధిక యాసిడ్‌ను న్యూట్రలైజ్ చేస్తుంది. నల్ల ద్రాక్ష శరీరానికి తక్షణ చల్లదనాన్ని ఇచ్చి మంటను తగ్గిస్తుంది.

శరీరాన్ని శుద్ధి చేస్తుంది :
ఈ డ్రింక్ రక్తాన్ని శుద్ధి చేయడంలో సహాయ పడుతుంది. శరీరంలో పేరుకుపోయిన టాక్సిన్లను బయటకు పంపిస్తుంది. దీనివల్ల కేవలం ఆరోగ్యం మాత్రమే కాదు. ముఖంపై వచ్చే మొటిమలు తగ్గి చర్మం కాంతివంతంగా మారుతుంది. వేసవిలో వచ్చే చెమటకాయలు, చర్మంపై దద్దుర్లు రాకుండా ఇది అడ్డుకుంటుంది.

Also Read: కరెంట్ లేకపోయినా పర్లేదు..ఐరన్ లేకుండానే మీ డ్రెస్ ముడతలు మాయం!

నీరసాన్ని పోగొట్టి శక్తినిస్తుంది:
ఎండు నల్ల ద్రాక్షలో ఐరన్ , సహజ సిద్ధమైన చక్కెరలు ఉంటాయి. ఎండలో తిరగడం వల్ల వచ్చే నీరసం, అలసటను ఇది తక్షణమే తగ్గిస్తుంది. రక్తహీనతతో బాధపడేవారికి ఈ నీరు ఒక గొప్ప వరం. సోంపు వల్ల నోటి దుర్వాసన తగ్గి, రోజంతా ఫ్రెష్‌గా అనిపిస్తుంది.

స్త్రీలకు ఎంతో మేలు:
వేసవిలో మహిళలకు వచ్చే హార్మోన్ల అసమతుల్యత లేదా పీరియడ్స్ సమయంలో వచ్చే విపరీతమైన కడుపు నొప్పిని తగ్గించడానికి సోంపు నీరు బాగా పనిచేస్తుంది. ఇది బాడీని హైడ్రేటెడ్ గా ఉంచుతూనే, మానసిక ప్రశాంతతను ఇస్తుంది.

మార్కెట్లో దొరికే కూల్ డ్రింక్స్, సోడాల కంటే ఈ సహజ సిద్ధమైన నల్ల ద్రాక్ష-సోంపు నీరు ఆరోగ్యానికి ఎంతో మంచిది. ఖర్చు తక్కువ, ఫలితం ఎక్కువ. ఈ వేసవిలో మీ లైఫ్ స్టైల్ లో ఈ చిన్న మార్పును చేర్చుకోండి.

Share

• 
• 
• 
• 
• 
•