పాలు, పెరుగు ద్వారా రేబిస్ వస్తుందా? వైరస్ వ్యాప్తి గురించి ఈ విషయాలు తెలుసుకోండి

Can milk and curd spread rabies| పాలు, పెరుగు, మజ్జిగ మన రోజువారీ ఆహారంలో ముఖ్యమైనవి. అయితే, ఇటీవలే ఆవు పాలతో తయారుచేసిన చరణామృతం తాగిన తర్వాత ఉత్తరప్రదేశ్‌లో సుమారు 450 మందికి రేబీస్ సోకినట్లు తేలింది. దీంతో ఆ ప్రాంతంలో కలకలం ఆందోళన మొదలైంది. అసలు పాలు తాగడం వల్ల రేబిస్ వస్తుందా? పాలను మరిగిస్తే వైరస్ చనిపోతుందా? కుక్క కాటు పడితే ఎలాంటి జాగ్రత్తలు తీసుకోవాలి? ఈ విషయాలు తెలుసుకుందాం.

1. పాలు, పెరుగు తినడం వల్ల రేబిస్ వస్తుందా?

రేబిస్ అనేది మెదడు, నాడీ వ్యవస్థపై ప్రభావం చూపించే ప్రమాదకరమైన వైరల్ వ్యాధి. సాధారణంగా రేబిస్ సోకిన జంతువు లాలాజలం ద్వారా ఈ వైరస్ మనుషులకు వ్యాపిస్తుంది. ముఖ్యంగా, జంతువు కరిచినప్పుడు వైరస్ శరీరంలోకి ప్రవేశించే అవకాశం ఉంది.
అలాగే గాయాలు, చర్మంపై తెగిన భాగాలు, కళ్లూ, ముక్కు లేదా నోటికి వైరస్ ఉన్న లాలాజలం తగిలినా ప్రమాదం ఉంటుంది.
అయితే, పాలు లేదా పాల ఉత్పత్తులు తినడం వల్ల మనుషులకు రేబిస్ సోకినట్లు నిర్ధారించే సైంటిఫిక్ ఆధారాలు లేవని ఇండియన్ నేషనల్ రేబిస్ కంట్రోల్ ప్రొగ్రామ్ నిర్వహకులు పేర్కొన్నారు. కేవలం పాల ఉత్పత్తులు తీసుకున్నందుకు మాత్రమే రేబిస్ టీకాలు అవసరం లేదని కూడా సూచిస్తోంది.
అయినప్పటికీ, రేబిస్ ఉన్నట్లు అనుమానిస్తున్న జంతువు పాలను తాగకుండా ఉండటమే సురక్షితం.

2. పాలను మరిగిస్తే రేబిస్ వైరస్ చనిపోతుందా?

పాలు వేడి చేయడం వల్ల రేబిస్ వైరస్ క్రియారహితం కావచ్చు. పాలను సరిగ్గా మరిగించడం, పాశ్చరైజేషన్ చేయడం వల్ల అనేక హానికరమైన సూక్ష్మజీవుల ప్రమాదం తగ్గుతుంది. అయితే, రేబిస్ అనుమానిత జంతువు పాలను మరిగిస్తే పూర్తిగా సురక్షితమవుతుందని భావించకూడదు. పెరుగు, మజ్జిగ, పనీర్ తయారీ ప్రక్రియలు కూడా అలాంటి పాలను సురక్షితంగా మార్చడానికి ప్రత్యామ్నాయాలు కావు. పచ్చి పాలలో ఇతర హానికరమైన సూక్ష్మజీవులు ఉండే అవకాశం కూడా ఉంది.

3. రేబిస్ వైరస్ సాధారణంగా ఎలా వ్యాపిస్తుంది?

రేబిస్ ప్రధానంగా సోకిన జంతువుల లాలాజలం ద్వారా వ్యాపిస్తుంది. కుక్క కాటు వల్ల ఈ వ్యాధి సోకే ప్రమాదం ఎక్కువగా ఉంటుంది. కుక్కలు లేదా రేబీస్ సోకిన జంతువు కరిచినప్పుడు వైరస్ శరీరంలోకి ప్రవేశించవచ్చు. చర్మం తెగిపోయి, రేబీస్ సోకిన జంతువు లేదా మనిషి లాలాజలం తగిలితే ప్రమాదం ఉంటుంది. మీకు శరీరంపై ఏదైనా గాయాలుంటే రేబీస్ సోకిన లాలాజలం పడినా వైరస్ వ్యాపించవచ్చు. కళ్లు, ముక్కు, నోరు.. ఈ భాగాలకు సోకిన లాలాజలం తగిలితే వైద్య పరీక్ష అవసరం.

Also Read: వృద్ధ తల్లిదండ్రులను వదిలి భర్తను ఇంటల్లుడిగా ఉండాలన్న యువతి.. విడాకుల కేసులో కోర్టు తీర్పు ఇదే

4. రేబిస్ టీకా ఎప్పుడు తీసుకోవాలి?

కుక్క లేదా ఇతర అనుమానిత జంతువు కరిచినా, గోకినా వెంటనే గాయాన్ని సబ్బు, ప్రవహించే నీటితో కనీసం 15 నిమిషాలు కడగాలి. ఆ తర్వాత ఆలస్యం చేయకుండా వైద్యుడిని సంప్రదించాలి.

అవసరాన్ని బట్టి వైద్యులు రేబిస్ టీకాలు, రేబిస్ ఇమ్యునోగ్లోబులిన్ సూచించవచ్చు. లక్షణాలు కనిపించే వరకు వేచి ఉండకూడదు. ఎందుకంటే లక్షణాలు ప్రారంభమైన తర్వాత రేబిస్ దాదాపు ఎల్లప్పుడూ ప్రాణాంతకంగా మారుతుంది. సకాలంలో సరైన చికిత్స తీసుకుంటే వ్యాధిని నివారించవచ్చు.

Also Read: మీ కనుబొమ్మలు పలుచగా ఉన్నాయా? దట్టంగా పెరగాలంటే ఇలా చేయండి

గుర్తుంచుకోండి

పాలు తాగడం వల్ల రేబిస్ వ్యాపిస్తుందని నిర్ధారిత ఆధారాలు లేవు. అయినప్పటికీ, రేబిస్ అనుమానిత జంతువు పాలను తీసుకోకండి. సోకిన లాలాజలంతో సంబంధం ఏర్పడితే వెంటనే వైద్య సలహా పొందండి.