Cold Feet: పాదాలు చల్లబడటం అనారోగ్యానికి సంకేతమా? డాక్టర్లు ఏమంటున్నారు ?

Cold Feet: చలికాలంలో లేదా వాతావరణం చల్లగా ఉన్నప్పుడు కాళ్లు చల్లబడటం సహజం. అయితే.. ఎలాంటి చలి లేనప్పుడు కూడా మీ పాదాలు మంచు గడ్డల్లా చల్లగా అనిపిస్తుంటే.. అది కేవలం వాతావరణ మార్పు మాత్రమే కాకపోవచ్చు. మన శరీరం తన ఉష్ణోగ్రతను క్రమబద్ధీకరించుకోవడానికి చేసే ప్రయత్నంలో భాగంగా కొన్నిసార్లు రక్త ప్రసరణను ముఖ్యం కాని భాగాల నుంచి (కాళ్లు, చేతులు) ముఖ్యమైన అవయవాలకు (గుండె, మెదడు) మళ్లిస్తుంది. దీని వల్ల పాదాలు చల్లబడతాయి. కానీ ఇది తరచుగా జరుగుతున్నా లేదా చర్మం రంగు మారడం, మొద్దుబారడం వంటి లక్షణాలు కనిపిస్తున్నా, దాని వెనక రక్తహీనత, డయాబెటిస్ లేదా నరాల బలహీనత వంటి లోతైన కారణాలు ఉండే అవకాశం ఉంది. ఈ సమస్యను ప్రాథమిక దశలోనే గుర్తించి తగిన జాగ్రత్తలు తీసుకోవడం ద్వారా భవిష్యత్తులో వచ్చే తీవ్రమైన అనారోగ్యాలను నివారించవచ్చు.

కాళ్లు చల్లబడటానికి ప్రధాన కారణాలు:

పాదాలు చల్లబడటానికి అనేక కారణాలు ఉండవచ్చు.. వాటిలో ముఖ్యమైనవి:

రక్త ప్రసరణ లోపం: గుండె నుంచి పాదాలకు రక్తాన్ని చేరవేసే రక్త నాళాలు కుంచించుకుపోయినప్పుడు లేదా అడ్డంకులు ఏర్పడినప్పుడు రక్త ప్రసరణ తగ్గుతుంది. ఫలితంగా పాదాలు చల్లగా మారుతాయి. ధూమపానం చేసేవారిలో ,అధిక కొలెస్ట్రాల్ ఉన్నవారిలో ఈ సమస్య ఎక్కువగా కనిపిస్తుంది.

అనీమియా : శరీరంలో ఐరన్ లోపం వల్ల ఎర్ర రక్త కణాలు తగినంత ఆక్సిజన్‌ను శరీర భాగాలకు చేరవేయలేవు. దీని వల్ల కాళ్లు, చేతులు తరచుగా చల్లబడతాయి.

డయాబెటిస్ : రక్తంలో చక్కెర స్థాయిలు పెరిగినప్పుడు అది నరాలను దెబ్బతీస్తుంది (పెరిఫెరల్ న్యూరోపతీ). దీని వల్ల పాదాలలో వేడిని గ్రహించే శక్తి తగ్గడమే కాకుండా.. రక్త ప్రసరణ కూడా మందగిస్తుంది.

హైపోథైరాయిడిజం: థైరాయిడ్ గ్రంథి తగినంత హార్మోన్లను ఉత్పత్తి చేయనప్పుడు శరీర మెటబాలిజం తగ్గుతుంది. ఇది శరీర ఉష్ణోగ్రతను నియంత్రించే సామర్థ్యాన్ని దెబ్బతీస్తుంది.

ఒత్తిడి, ఆందోళన: అధిక ఒత్తిడికి గురైనప్పుడు శరీరం ‘ఫైట్ ఆర్ ఫ్లైట్’ మోడ్‌లోకి వెళ్తుంది. ఈ సమయంలో రక్త ప్రసరణ కాళ్ల నుంచి కీలక అవయవాలకు మళ్లుతుంది. తద్వారా పాదాలు చల్లబడతాయి.

Also Read: మీ గోళ్లు ఇలా ఉన్నాయా ? అయితే శరీరంలో హై కొలెస్ట్రాల్ ఉన్నట్లే !

నివారణ మార్గాలు:

ఈ సమస్యను తగ్గించుకోవడానికి ఇంట్లోనే పాటించదగ్గ కొన్ని ప్రభావ వంతమైన మార్గాలు:

గోరు వెచ్చని నీటి చికిత్స: రాత్రి పడుకునే ముందు ఒక టబ్ గోరు వెచ్చని నీటిలో 15 నిమిషాల పాటు పాదాలను ఉంచండి. ఇందులో కొద్దిగా ‘ఎప్సమ్ సాల్ట్’ కలిపితే కండరాల నొప్పులు కూడా తగ్గుతాయి.

పాదాల మసాజ్: ఆలివ్ ఆయిల్ లేదా నువ్వుల నూనెను గోరు వెచ్చగా చేసి పాదాలకు 5-10 నిమిషాల పాటు మసాజ్ చేయండి. ఇది రక్త ప్రసరణను మెరుగు పరుస్తుంది.

సరైన సాక్స్ ధరించడం: చలి ఎక్కువగా ఉన్నప్పుడు ఉన్ని సాక్స్ ధరించాలి. ఇవి పాదాల చుట్టూ గాలిని బంధించి వెచ్చదనాన్ని ఇస్తాయి.

శారీరక వ్యాయామం: రోజూ కనీసం 30 నిమిషాల నడక లేదా యోగా చేయడం వల్ల రక్త ప్రసరణ వ్యవస్థ చురుగ్గా మారుతుంది.

అల్లం, వెల్లుల్లి: అల్లం టీ తాగడం లేదా ఆహారంలో వెల్లుల్లిని చేర్చుకోవడం వల్ల శరీరంలో వేడి పెరుగుతుంది. అంతే కాకుండా రక్త నాళాలు వెడల్పు అవుతాయి.