Driving: గంటల కొద్దీ డ్రైవింగ్ చేస్తున్నారా ? ఈ ఆరోగ్య సమస్యలు వస్తాయ్ జాగ్రత్త!

Driving: నేటి ఉరుకుల పరుగుల జీవితంలో కారు ప్రయాణం అనేది ఒక అనివార్యమైంది. ఆఫీసుకి వెళ్లాలన్నా, వీకెండ్‌లో ట్రిప్ వెళ్లాలన్నా కారే ఆధారం. చాలా మందికి డ్రైవింగ్ చేయడం ఒక థ్రిల్లింగ్ అనుభవం. కానీ.. గంటల తరబడి ఒకే చోట కూర్చుని, డ్రైవింగ్ చేయడం వల్ల శారీరక, మానసిక ఒత్తిడి పెరుగుతుంది. క్రమంగా ఇది దీర్ఘకాలిక ఆరోగ్య సమస్యలకు దారితీస్తుంది. ముఖ్యంగా ఐదు రకాల సమస్యలు డ్రైవర్లను ఎక్కువగా వేధిస్తుంటాయి. అవేంటో ఇప్పుడు వివరంగా తెలుసుకుందాం.

అతిగా డ్రైవింగ్ చేయడం వల్ల వచ్చే 5 ఆరోగ్య సమస్యలు:
1. వెన్ను, మెడ నొప్పి:
డ్రైవింగ్ చేసేటప్పుడు మనం ఎక్కువ సేపు ఒకే భంగిమలో కూర్చుంటాము. సీటు సరిగ్గా లేకపోయినా లేదా తప్పుగా కూర్చున్నా వెన్నెముకపై విపరీతమైన ఒత్తిడి పడుతుంది. కారు నుంచి వచ్చే స్వల్ప వైబ్రేషన్లు వెన్నెముకలోని డిస్కులపై ప్రభావం చూపుతాయి. దీనివల్ల లోయర్ బ్యాక్ పెయిన్ (నడుము నొప్పి), మెడ పట్టేయడం వంటి సమస్యలు వస్తాయి. ఇది క్రమంగా ‘సైయాటికా’ వంటి తీవ్ర సమస్యలకు దారి తీయవచ్చు.

2. ఊబకాయం, జీర్ణ సమస్యలు:
డ్రైవింగ్ అనేది శారీరక శ్రమ లేని పని. గంటల తరబడి కూర్చునే ఉండటం వల్ల క్యాలరీలు ఖర్చు కావు. దీనికి తోడు ప్రయాణాల్లో జంక్ ఫుడ్, నూనెలో వేయించిన పదార్థాలు తినడం వల్ల బరువు వేగంగా పెరుగుతారు. శారీరక కదలికలు లేకపోవడం వల్ల జీర్ణక్రియ మందగించి, గ్యాస్, ఎసిడిటీ, మలబద్ధకం వంటి సమస్యలు తలెత్తుతాయి. ‘సెడెంటరీ లైఫ్ స్టైల్’ వల్ల వచ్చే అనారోగ్యాలన్నీ డ్రైవింగ్ వల్ల వచ్చే అవకాశం ఉంది.

3. మానసిక ఒత్తిడి,ఆందోళన:
ట్రాఫిక్ జామ్‌లు, ఎదుటివారి డ్రైవింగ్ తీరు, సమయానికి చేరుకోవాలనే ఆత్రుత.. ఇవన్నీ డ్రైవర్లలో విపరీతమైన ఒత్తిడిని కలిగిస్తాయి. దీనిని ‘రోడ్ రేజ్’ అని కూడా అంటారు. నిరంతరంగా ట్రాఫిక్‌లో డ్రైవింగ్ చేయడం వల్ల రక్తపోటు పెరగడం, చిరాకు, మానసిక అలసట కలుగుతాయి. ఇది దీర్ఘ కాలంలో గుండె సంబంధిత సమస్యలకు కూడా కారణం కావచ్చు.

4. కంటి సమస్యలు:
డ్రైవింగ్ చేసేటప్పుడు కళ్లకు విశ్రాంతి ఉండదు. రోడ్డుపై నిశితంగా గమనించడం, రాత్రి పూట ఎదురుగా వచ్చే వాహనాల లైట్ల వెలుతురు వల్ల కళ్లు త్వరగా అలసిపోతాయి. దీని వల్ల కళ్లు ఎర్రబడటం, నీరు కారడం, కంటి చూపు మందగించడం, తల నొప్పి వంటి సమస్యలు వస్తాయి. ముఖ్యంగా ఏసీ ఆన్ చేసి డ్రైవ్ చేయడం వల్ల కళ్లలోని తేమ తగ్గి ‘డ్రై ఐస్’ సమస్య ఏర్పడుతుంది.

5. కాళ్ళలో రక్త ప్రసరణ సమస్యలు :
ఎక్కువ సేపు కాళ్లు కిందకు పెట్టి కూర్చోవడం వల్ల కాళ్ళలో రక్త ప్రసరణ సరిగ్గా జరగదు. దీనివల్ల కాళ్లు వాపు రావడం, తిమ్మిర్లు ఎక్కడం వంటివి జరుగుతాయి. తీవ్ర మైన సందర్భాల్లో ఇది ‘డీప్ వీన్ థ్రాంబోసిస్’ అనే ప్రాణాంతక పరిస్థితికి దారి తీయవచ్చు. అంటే కాళ్ళ నరాల్లో రక్తం గడ్డకట్టడం అన్నమాట.

Also Read: నెల రోజులు జుట్టుకు నూనె వాడటం మానేస్తే.. జరిగేదిదే !

తీసుకోవాల్సిన జాగ్రత్తలు:
ప్రతి రెండు గంటలకోసారి కారు ఆపి, కాసేపు నడవండి.

కారు సీటును సరైన భంగిమలో (90-100 డిగ్రీల కోణంలో) సర్దుకోండి.

డ్రైవింగ్ మధ్యలో నీరు ఎక్కువగా తాగుతూ ఉండండి.

కళ్లపై ఒత్తిడి తగ్గించడానికి అప్పుడప్పుడు దూరంగా ఉన్న చెట్లను చూడటం లేదా కళ్లు మూసుకోవడం చేయండి.