వర్షాకాలం రాగానే అందరికీ సరదాగా ఉంటుంది. ముఖ్యంగా పిల్లలు వర్షంలో తడుస్తూ ఎంజాయ్ చేస్తారు. అయితే ఇదే సమయంలో వైరస్లు, బ్యాక్టీరియా, ఫంగస్ వేగంగా పెరుగుతాయి. దీంతో పిల్లల్లో సీజనల్ వ్యాధులు వచ్చే ప్రమాదం ఎక్కువగా ఉంటుంది. స్కూల్కు వెళ్లే పిల్లలు వర్షంలో తడవడం, తడి బట్టలు ధరించడం, చేతులు శుభ్రం చేసుకోకుండా భోజనం చేయడం వంటి అలవాట్ల వల్ల త్వరగా అనారోగ్యానికి గురవుతారు. కొన్ని సులభమైన పరిశుభ్రత అలవాట్లు పాటిస్తే పిల్లలను అరోగ్య సమస్యల నుంచి కాపాడుకోవచ్చు.
వర్షాకాలం సీజన్లో గాలిలో తేమ ఎక్కువగా ఉంటుంది. ఈ పరిస్థితుల్లో బ్యాక్టీరియా, వైరస్లు, ఫంగస్ వేగంగా పెరుగుతాయి. స్కూల్లో పిల్లలు డెస్కులు, తలుపులు, ఆట వస్తువులు వంటి అనేక వస్తువులను తాకుతుంటారు. అలాగే స్నేహితులతో కలిసి ఆడుకుంటారు. చేతులు కడుక్కోకుండా ఆహారం తినడం వల్ల కూడా సూక్ష్మక్రిములు శరీరంలోకి ప్రవేశిస్తాయి. అందుకే ఈ కాలంలో పరిశుభ్రత చాలా ముఖ్యం.
పిల్లలు భోజనం చేసే ముందు, టాయిలెట్ ఉపయోగించిన తర్వాత తప్పనిసరిగా చేతులు కడుక్కోవాలి. కనీసం 20 సెకన్ల పాటు యాంటి బ్యాక్టీరియల్ సబ్బు, నీళ్లతో చేతులు శుభ్రం చేయడం అలవాటు చేయండి. నీళ్లు అందుబాటులో లేని సందర్భాల్లో చిన్న హ్యాండ్ శానిటైజర్ను స్కూల్ బ్యాగ్లో ఉంచితే ఉపయోగపడుతుంది.
వర్షంలో తడిసి ఇంటికి వచ్చిన వెంటనే పిల్లల తడి బట్టలను మార్చాలి. షూస్, సాక్స్ను పూర్తిగా ఆరబెట్టిన తర్వాతే మళ్లీ ఉపయోగించాలి. తడి షూస్ వల్ల ఫంగస్, దుర్వాసన, చర్మ సమస్యలు వచ్చే అవకాశం ఉంటుంది.
పిల్లలు ఉపయోగించే టిఫిన్ బాక్స్, వాటర్ బాటిల్ను ప్రతి రోజు బాగా కడగాలి. పూర్తిగా ఆరిన తర్వాతే మళ్లీ ఉపయోగించాలి. ఇలా చేయడం వల్ల బ్యాక్టీరియా పెరగకుండా ఉంటుంది. అలాగే పిల్లలు తినే ఆహారం కూడా పరిశుభ్రంగా ఉంటుంది.
వర్షాకాలంలో స్కూల్ బ్యాగ్లో తేమ చేరే అవకాశం ఉంటుంది. అందుకే వారానికి ఒకసారి బ్యాగ్ను పూర్తిగా ఖాళీ చేసి శుభ్రం చేయాలి. తర్వాత కొంతసేపు ఎండలో లేదా గాలి బాగా వచ్చే ప్రదేశంలో ఉంచాలి. దీంతో ఫంగస్, దుర్వాసన రాకుండా ఉంటుంది.
పొడవాటి గోళ్లలో మురికి, సూక్ష్మక్రిములు సులభంగా చేరుతాయి. అందుకే పిల్లల గోళ్లను తరచూ కత్తిరించాలి. పరిశుభ్రమైన గోళ్లు ఉంటే కడుపు సంబంధిత ఇన్ఫెక్షన్లు వచ్చే ప్రమాదం తగ్గుతుంది.
పిల్లల టిఫిన్లో ఇంట్లో తయారు చేసిన తాజా, పోషకాహారాన్ని పెట్టండి. పండ్లు, కూరగాయలు, ఆరోగ్యకరమైన అల్పాహారం ఇవ్వడం మంచిది. రోజంతా తగినంత నీరు తాగాలని పిల్లలకు చెప్పాలి. అలాగే బయట దొరికే ఆహారాన్ని తినకుండా ఉండాలని వారికి వివరించాలి.
Also Read: 95 శాతం తల్లిదండ్రులు ఈ తప్పులు చేస్తారు.. పిల్లలు మాట వినకపోవడానికి అవే కారణం
పిల్లలకు జ్వరం, జలుబు లేదా వైరల్ ఇన్ఫెక్షన్ ఉంటే స్కూల్కు పంపకండి. ఇంట్లో విశ్రాంతి తీసుకోవడం వల్ల త్వరగా కోలుకుంటారు. అవసరమైతే వైద్యుడిని సంప్రదించి సరైన చికిత్స తీసుకోవాలి. ఇలా చేస్తే ఇతర పిల్లలకు కూడా వ్యాధి వ్యాపించకుండా ఉంటుంది.
రోజువారీ పరిశుభ్రత అలవాట్లు వర్షాకాలంలో పిల్లలను అనేక సీజనల్ వ్యాధుల నుంచి కాపాడతాయి. చేతులు శుభ్రంగా ఉంచడం, తడి బట్టలు వెంటనే మార్చడం, పోషకాహారం తీసుకోవడం, తగినంత విశ్రాంతి తీసుకోవడం వల్ల రోగనిరోధక శక్తి పెరుగుతుంది. అలాగే స్కూల్కు సంబంధించిన వస్తువులను శుభ్రంగా ఉంచడం కూడా చాలా అవసరం. తల్లిదండ్రులు చిన్న చిన్న జాగ్రత్తలు తీసుకుంటే పిల్లలు వర్షాకాలం ఆరోగ్యంగా, ఆనందంగా గడపగలుగుతారు.
Share
Hanuman Idol: తిరుమల హనుమాన్ విగ్రహం చోరీ కేసులో బిగ్ ట్విస్ట్ .. నిందితుడు అరెస్ట్!
సీజేపీ ఉద్యమం.. విద్యార్థులకు అండగా ప్రముఖ సెలబ్రిటీలు!
