జిమ్‌లో వర్కౌట్ చేస్తున్నారా? కండరాలు నిజంగా పెరుగుతున్నట్లు సూచించే 5 సంకేతాలివే

Muscle growth Indications| జిమ్‌లో కష్టపడుతున్నా బరువు తగ్గడం లేదని చాలామంది ఆందోళన చెందుతారు. అయితే వెయింగ్ స్కేల్‌పై సంఖ్య పెరగడం ప్రతిసారీ చెడు సంకేతం కాదు. మీ శరీరం.. కండరాలను అభివృద్ధి చేసుకుంటున్నప్పుడు కొన్ని చిన్న మార్పులు కనిపిస్తాయి. ఆకలి పెరగడం, బలం పెరగడం, రోజువారీ పనులు సులభంగా అనిపించడం కూడా అందులో భాగమే. పోషకాహార నిపుణురాలు దీపశిఖా జైన్ కూడా కండరాల అభివృద్ధికి సంబంధించిన కొన్ని సంకేతాలను వివరించారు. అయితే ఒక్క సంకేతంతో కండరాలు పెరుగుతున్నాయని కచ్చితంగా చెప్పలేం.

కండరాలు పెరుగుతున్నప్పుడు బరువు కూడా పెరగవచ్చు

ఫిట్‌నెస్ ప్రయాణంలో బరువు పెరగడం చాలామందికి ఆందోళన కలిగిస్తుంది. అయితే కండరాల అభివృద్ధి కూడా శరీర బరువులో మార్పులకు కారణం కావచ్చు. అందుకే వెయింగ్ స్కేల్‌ను మాత్రమే పురోగతికి కొలమానంగా చూడకండి. మీ దుస్తులు ఎలా సరిపోతున్నాయి, శరీర కొలతలు ఎలా మారుతున్నాయో కూడా గమనించండి. మీ బలం పెరుగుతుంటే అది కూడా మంచి పురోగతి కావచ్చు.

కండరాల అభివృద్ధితో ఆకలి పెరుగుతుంది

స్ట్రెంగ్త్ ట్రైనింగ్‌కు శరీరానికి అదనపు శక్తి అవసరం అవుతుంది. వ్యాయామం తర్వాత కండరాల పునరుద్ధరణకు శరీరానికి తగిన పోషకాలు కూడా అవసరం. అందుకే రెగ్యులర్‌గా వ్యాయామం చేసేవారిలో కొందరికి ఆకలి పెరగవచ్చు. అయితే ఆకలి పెరగడం మాత్రమే కండరాలు పెరుగుతున్నాయని నిర్ధారించదు. నిద్ర, ఆహారం, రోజువారీ శారీరక శ్రమ కూడా ఆకలిపై ప్రభావం చూపుతాయి.

వ్యాయామం తర్వాత కండరాల నొప్పి తగ్గవచ్చు

కొత్త లేదా కఠినమైన వ్యాయామం తర్వాత కండరాల్లో నొప్పి సాధారణంగా కనిపిస్తుంది. క్రమంగా వ్యాయామం చేస్తే శరీరం ఆ రొటీన్‌కు అలవాటు పడుతుంది. దీంతో కండరాల నొప్పి లేదా అలసట కొంత తగ్గుతుంది. ఇది శరీరం వ్యాయామానికి మెరుగ్గా అలవాటు పడుతున్న సంకేతం కావచ్చు. అయితే కండరాలు పెరగాలంటే ప్రతి వ్యాయామం తర్వాత నొప్పి తప్పనిసరి కాదు.

రాత్రివేళ శరీరం కొంచెం వేడిగా అనిపిస్తే

స్ట్రెంగ్త్ ట్రైనింగ్ చేస్తున్నప్పుడు కొందరికి శరీరం కొంచెం వేడిగా అనిపించవచ్చు. కండరాల వర్కెట్స్ చేశాక తరువాత రాత్రి శరీరంలో వేడి ఉత్పత్తిని ప్రభావితం చేస్తుంది. అందువల్ల రాత్రివేళ సాధారణం కంటే వేడిగా అనిపించే అవకాశం ఉందని జైన్ చెబుతున్నారు. అయితే దీనికి గది ఉష్ణోగ్రత, దుస్తులు, అనారోగ్యం వంటి ఇతర కారణాలు కూడా ఉండవచ్చు. తరచుగా లేదా కారణం తెలియకుండా శరీరం వేడిగా అనిపిస్తే వైద్యుడిని సంప్రదించండి.

Also Read: క్లౌడ్ కిచెన్ బిజినెస్‌లో రూ.4 లక్షలు నష్టపోయిన దంపతులు.. కట్ చేస్తే 10 నెలల్లో రూ.2 కోట్ల టర్నోవర్

రోజువారీ పనులు సులభంగా చేయగలుగుతారు

కండరాల బలం పెరగడం వ్యాయామ వల్ల శరీరానికి ఉపయోగం చేకూరుతోందనేందుకు సంకేతం. ఇంట్లో వస్తువులు ఎత్తడం లేదా మెట్లు ఎక్కడం సులభంగా అనిపించవచ్చు. బ్యాగులు మోయడం వంటి సాధారణ పనులు కూడా తక్కువ శ్రమతో పూర్తవుతాయి. వర్కౌట్ సమయంలో ఎక్కువ బరువులు ఎత్తడం కూడా మీ బలం పెరుగుతున్నందుకు సూచన. అలాగే ఎక్కువ రిపిటేషన్లు మెరుగైన నియంత్రణతో చేయగలుగుతారు.

బరువు కంటే మొత్తం పురోగతిని గమనించాలి

కండరాల అభివృద్ధికి నిరంతర వ్యాయామం, సరైన ఆహారం, తగిన విశ్రాంతి అవసరం. ఒక్క మార్పును చూసి కండరాలు పెరుగుతున్నాయని నిర్ణయించకండి. మీ బలం, శరీర కొలతలు, వ్యాయామ పనితీరు, ఎనర్జీ లెవెల్స్ క్రమంగా గమనించండి. పురోగతిని అర్థం చేసుకోవడానికి ఫొటోలు కూడా ఉపయోగపడతాయి. కండరాలు పెంచడం లేదా బరువు తగ్గడం లక్ష్యంగా ఉంటే నిపుణుల సలహా తీసుకోవడం మంచిది.

Also Read: స్కూల్‌కు వెళ్లే సమయం అయినా పిల్లలు నిద్రలేవడం లేదా? ఈ 5 టిప్స్‌తో మార్నింగ్ రొటీన్ మార్చండి