Lack Of Sleep: నిద్ర లేకపోతే మీ శరీరం, మనస్సుపై ఎలాంటి ప్రభావం పడుతుందో తెలుసా ?

Lack Of Sleep: నిద్ర అనేది కేవలం విశ్రాంతి తీసుకోవడం మాత్రమే కాదు.ఇది మన శరీరం, మెదడు మరమ్మత్తులు, పునరుద్ధరణ, సమాచారాన్ని క్రమబద్ధీకరించుకునే ముఖ్యమైన ప్రక్రియ. ఆధునిక జీవితంలో పని ఒత్తిడి, టెక్నాలజీ వినియోగం లేదా ఇతర కారణాల వల్ల చాలా మంది తరచుగా నిద్రకు దూరం అవుతున్నారు. నిరంతరంగా నిద్ర లేమికి గురవడం వల్ల శారీరక, మానసిక ఆరోగ్యంపై తీవ్రమైన ప్రతికూల ప్రభావాలు కలుగుతాయి. మీరు తగినంత నిద్ర తీసుకోకపోతే మీ శరీరం, మనస్సు ఎలా ప్రభావితమవుతాయో ఇప్పుడు తెలుసుకుందాం.

శారీరక ఆరోగ్యంపై నిద్ర ప్రభావాలు:
1. రోగనిరోధక శక్తి బలహీనపడటం:
నిద్ర సమయంలో, మీ రోగనిరోధక వ్యవస్థ సైటోకైన్‌ అనే రక్షిత ప్రోటీన్లను ఉత్పత్తి చేస్తుంది. ఇవి వాపు, ఒత్తిడి లేదా ఇన్ఫెక్షన్ల సమయంలో శరీరం వాటితో పోరాడటానికి సహాయపడతాయి. నిద్ర లేకపోతే ఈ సైటోకైన్‌ల ఉత్పత్తి తగ్గి, మీ శరీరం సాధారణ జలుబు లేదా ఇతర ఇన్ఫెక్షన్ల బారిన పడే అవకాశం పెరుగుతుంది.

2. హృదయ సంబంధిత సమస్యలు:
తగినంత నిద్ర లేకపోవడం రక్తపోటును పెంచుతుంది. అంతే కాకుండా ఇది గుండె ఆరోగ్యానికి హాని కలిగించే వాపు స్థాయిలను పెంచుతుంది. దీర్ఘకాలిక నిద్ర లేమి వల్ల గుండెపోటు, స్ట్రోక్ , అధిక రక్తపోటు వంటి ప్రమాదం పెరుగుతుంది. నిద్ర లేమి హార్మోన్ల సమతుల్యతను దెబ్బతీస్తుంది. అంతే కాకుండా ఇది గుండెపై మరింత ఒత్తిడిని పెంచుతుంది.

3. బరువు పెరగడం, జీవక్రియ సమస్యలు :
నిద్ర లేమి రెండు ముఖ్యమైన ఆకలి హార్మోన్లను దెబ్బతీస్తుంది. ఒకటి గ్రెలిన్ ఆకలిని పెంచే హార్మోన్.ఇది నిద్ర లేకపోతే పెరుగుతుంది. రెండవది లెప్టిన్ .. ఇది సంతృప్తిని కలిగించే హార్మోన్. నిద్ర లేకపోతే ఇది తగ్గుతుంది. దీని ఫలితంగా.. మీరు ఎక్కువ కేలరీలు, అనారోగ్యకరమైన ఆహారాన్ని తినడానికి మొగ్గు చూపుతారు.ఇది ఊబకాయం, టైప్ – 2 డయాబెటిస్‌కు దారితీస్తుంది.

4. చర్మం త్వరగా ముడతలు పడటం:
నిద్రలో శరీరం కొల్లాజెన్‌ను (చర్మం సాగే గుణాన్ని ఇచ్చే ప్రోటీన్) ఉత్పత్తి చేస్తుంది. నిద్ర లేమి వల్ల కార్టిసాల్ (ఒత్తిడి హార్మోన్) స్థాయిలు పెరుగుతాయి. ఇది కొల్లాజెన్‌ను విచ్ఛిన్నం చేస్తుంది. దీని ఫలితంగా చర్మం నిస్తేజంగా.. పొడిబారి, కళ్ల కింద నల్లటి వలయాలు, ముడతలు త్వరగా కనిపిస్తాయి.

Also Read: మీలో ఈ లక్షణాలున్నాయా ? అస్సలు నిర్లక్ష్యం చేయొద్దు !

మానసిక ఆరోగ్యంపై ప్రభావాలు:
5. అభిజ్ఞా సామర్థ్యం తగ్గడం:
మెదడులోని ప్రీఫ్రంటల్ కార్టెక్స్ (నిర్ణయాలు తీసుకోవడం, సమస్య పరిష్కారం, విమర్శనాత్మక ఆలోచనలకు బాధ్యత వహించే భాగం) నిద్ర లేమి వల్ల బాగా ప్రభావితమవుతుంది. దీని కారణంగా ఏకాగ్రత లోపించడం, మతిమరుపు, కొత్త విషయాలు నేర్చుకునే సామర్థ్యం తగ్గడం, పనితీరులో లోపాలు సంభవిస్తాయి.

6. భావోద్వేగ అస్థిరత :
తగినంత నిద్ర లేకపోవడం వల్ల అమిగ్డాలా (మెదడులోని భావోద్వేగ కేంద్రాన్ని నియంత్రించే భాగం) అతి చురుకుగా మారుతుంది. దీని వల్ల చిరాకు, కోపం, నిరాశ (డిప్రెషన్), ఆందోళన వంటి ప్రతికూల భావోద్వేగాలు అధికమవుతాయి. మీరు మీ భావోద్వేగాలను సరిగ్గా నియంత్రించుకోలేరు.

7. ప్రమాదకర నిర్ణయాలు తీసుకోవడం:
నిద్ర లేమి మెదడు యొక్క రిస్క్ అసెస్‌మెంట్ (ప్రమాదాన్ని అంచనా వేసే) సామర్థ్యాన్ని తగ్గిస్తుంది. దీని వల్ల మీరు ఆలోచించకుండా.. అనాలోచితంగా , ప్రమాదకర నిర్ణయాలు తీసుకునే అవకాశం పెరుగుతుంది. డ్రైవింగ్ చేసేటప్పుడు ప్రమాదాల సంభావ్యత కూడా పెరుగుతుంది.