అమ్మమ్మ కాలం నాటి అరుదైన వంటకం.. వెదురు చిగుళ్ల కూర తింటే ఇన్ని లాభాలా?

Veduru Chigulla Curry: వర్షాకాలం వచ్చిందంటే చాలు.. పల్లెటూర్లలో ప్రకృతి మనకు ఎన్నో అద్భుతమైన రుచులను కానుకగా ఇస్తుంది. అందులోనూ అటవీ ప్రాంతాలకు దగ్గరగా ఉండే గ్రామీణ ప్రజలకు వెదురు చిగుళ్లు అనగానే నోట్లో నీళ్లు ఊరడం ఖాయం. సరిగ్గా వానలు పడే సమయంలో మట్టి నుంచి ముక్కుపచ్చలారని వెదురు పొదల్లో నుంచి బయటికి వచ్చే లేత చిగుళ్లతో చేసే కూర రుచే వేరు. నేటి ఆధునిక కాలంలో సూపర్ మార్కెట్లలో ప్యాకెట్లలో దొరికే కూరగాయల కంటే.. ఇలా ప్రకృతి ఒడిలో దొరికే వాటితో వంట చేసుకోవడంలో ఉండే ఆనందమే వేరు.

ఒకప్పుడు కేవలం గిరిజనుల వంటకాల్లోనే ఎక్కువగా కనిపించే ఈ వెదురు చిగుళ్ల కూర.. ఇప్పుడు ఆరోగ్యంపై శ్రద్ధ పెరిగిన చాలా మంది ఇళ్లలోకి కూడా అడుగుపెడుతోంది. పీచు పదార్థం పుష్కలంగా ఉండే ఈ కూర కేవలం రుచిలోనే కాదు, ఆరోగ్యానికి కూడా ఎంతో మేలు చేస్తుంది. ఈ రుచికరమైన కూరను మన ఇంట్లోనే సులభంగా ఎలా తయారు చేసుకోవాలో ఇప్పుడు చూద్దాం.

కావాల్సిన పదార్థాలు:

లేత వెదురు చిగుళ్లు – అరకిలో
ఉల్లిపాయలు – మూడు
పచ్చిమిర్చి – ఆరు
టమోటాలు – రెండు
అల్లం వెల్లుల్లి పేస్ట్ – ఒక చెంచా
కారం – తగినంత
ఉప్పు – రుచికి సరిపడా
పసుపు – అరచెంచా
ధనియాల పొడి – ఒక చెంచా
గరం మసాలా – అరచెంచా
నూనె – నాలుగు చెంచాలు
పోపు దినుసులు – ఒక చెంచా
కరివేపాకు – రెండు రెమ్మలు
కొత్తిమీర – కొద్దిగా.

Also Read: పీతలను ఇలా మసాలా పెట్టి వండితే.. ఆ వాసనకే కడుపు నిండిపోతుంది!

తయారీ విధానం:

లేతగా ఉన్న వెదురు చిగుళ్లను తెచ్చి, వాటిపైన ఉండే పొట్టును తొలగించాలి. లోపల ఉండే మెత్తని భాగాన్ని సన్నని ముక్కలుగా కోసి నీటిలో బాగా కడగాలి. వెదురు చిగుళ్లలో కొద్దిగా వగరు స్వభావం ఉంటుంది కాబట్టి.. కోసిన ముక్కలను కొద్దిగా పసుపు, ఉప్పు వేసిన నీళ్లలో ఉడికించి ఆ నీటిని ఒంపేయాలి. ఇలా చేయడం వల్ల వగరు పూర్తిగా పోతుంది.

ఇప్పుడు స్టవ్ మీద కడాయి పెట్టి నూనె పోసి వేడెక్కిన తర్వాత పోపు దినుసులు, కరివేపాకు వేసి వేయించాలి. అందులోనే సన్నగా తరిగిన పచ్చిమిర్చి, ఉల్లిపాయ ముక్కలు వేసి బంగారు రంగు వచ్చే వరకు వేయించాలి. ఉల్లిపాయలు వేగిన తర్వాత అల్లం వెల్లుల్లి పేస్ట్ వేసి పచ్చి వాసన పోయే వరకు కలపాలి. ఆ తర్వాత తరిగి పెట్టుకున్న టమోటా ముక్కలు వేసి అవి మెత్తబడే వరకు మగ్గించాలి.

ఉడికించి పక్కన పెట్టుకున్న వెదురు చిగుళ్ల ముక్కలను ఆ మిశ్రమంలో వేసి బాగా కలపాలి. కూరకు సరిపడా ఉప్పు, కారం, పసుపు, ధనియాల పొడి వేసి మసాలాలు ముక్కలకు బాగా పట్టేలా రెండు నిమిషాలు మగ్గనివ్వాలి. ఆ తర్వాత కూర ఉడకడానికి సరిపడా కొద్దిగా నీళ్లు పోసి మూతపెట్టి సన్నని మంటపై 15 నిమిషాల పాటు ఉడికించాలి. కూర దగ్గరగా పడి నూనె పైకి తేలే సమయంలో గరం మసాలా, సన్నగా తరిగిన కొత్తిమీర చల్లుకుని స్టవ్ ఆఫ్ చేయాలి. అంతే.. ఎంతో టేస్టీ వెదురు చిగుళ్ల కూర సిద్ధమైనట్లే.

Also Read: ఎప్పుడూ ఒకేలా కాకుండా.. ఈ ఆదివారం ఘుమఘుమలాడే ఉలవచారు బిర్యానీ ట్రై చేయండి!