ఎప్పుడూ ఒకేలా కాకుండా.. ఈ ఆదివారం ఘుమఘుమలాడే ఉలవచారు బిర్యానీ ట్రై చేయండి!

Ulavacharu Veg Biryani: బిర్యానీ అనగానే మనకు ముందుగా గుర్తొచ్చేది మసాలాల ఘుమఘుమలు, పొడిపొడిగా ఉడికిన అన్నం, నోరూరించే రుచి. అయితే ఎప్పుడూ ఒకే రకమైన వెజ్ బిర్యానీ కాకుండా కాస్త కొత్తగా ప్రయత్నించాలనుకుంటే.. ఉలవచారు వెజ్ బిర్యానీ మంచి ఎంపిక. ఆంధ్రా వంటకాల్లో ప్రత్యేకమైన ఉలవచారుకు ఉండే చిక్కదనం, పులుపు, మసాలాల రుచి బిర్యానీకి బాగా సెట్ అవుతాయి. సాధారణ కూరగాయల బిర్యానీకి భిన్నంగా ఈ వంటకం కొత్త రుచిని అందిస్తుంది.

ఇంట్లోనే సులభంగా చేసుకోగలిగే ఈ బిర్యానీని ఆదివారం మధ్యాహ్నం భోజనానికి, కుటుంబ సభ్యులు ఇంటికి వచ్చినప్పుడు ప్రత్యేకంగా తయారు చేసుకోవచ్చు. రైతా లేదా ఉల్లిపాయల సలాడ్‌తో కలిపి తింటే రుచి మరింత బాగుంటుంది. మరి ఆలస్యం చేయకుండా ఉలవచారు వెజ్ బిర్యానీని ఎలా తయారు చేయాలో తెలుసుకుందామా..

కావాల్సిన పదార్థాలు:

బాస్మతి బియ్యం – రెండు కప్పులు
ఉలవలు – అర కప్పు
ఉల్లిపాయలు – రెండు
టమోటాలు – రెండు
పచ్చిమిర్చి – నాలుగు
అల్లం వెల్లుల్లి పేస్ట్ – ఒక టేబుల్ స్పూన్
క్యారెట్ – ఒకటి
బంగాళాదుంప – ఒకటి
బీన్స్ – పది
పచ్చిబఠాణీలు – పావు కప్పు
పెరుగు – అర కప్పు
పుదీనా – ఒక కట్ట
కొత్తిమీర – ఒక కట్ట
కారం – ఒక టీ స్పూన్

Also Read: ఆలూ సమోసా ఇంట్లోనే ఇలా చేశారంటే.. ఇక బయట అస్సలు కొనరు!
ధనియాల పొడి – ఒక టీ స్పూన్
గరం మసాలా – అర టీ స్పూన్
బిర్యానీ మసాలా – ఒక టీ స్పూన్
జీలకర్ర – అర టీ స్పూన్
లవంగాలు – నాలుగు
యాలకులు – రెండు
దాల్చిన చెక్క – చిన్న ముక్క
బిర్యానీ ఆకు – ఒకటి
నూనె – మూడు టేబుల్ స్పూన్లు
నెయ్యి – రెండు టేబుల్ స్పూన్లు
ఉప్పు – తగినంత
నీళ్లు – తగినన్ని

తయారీ విధానం ఇలా:

ఉలవలను రాత్రంతా నానబెట్టి, మరుసటి రోజు కుక్కర్‌లో తగినన్ని నీళ్లు పోసి మెత్తగా ఉడికించాలి. ఉడికిన ఉలవలను వడకట్టి, వాటి నీటిని పక్కన పెట్టుకోవాలి. ఈ నీటితోనే బిర్యానీకి ప్రత్యేకమైన రుచి వస్తుంది.

ఇప్పుడు బాస్మతి బియ్యాన్ని కడిగి 20 నిమిషాలు నానబెట్టాలి. మందపాటి గిన్నెలో నూనె, నెయ్యి వేడి చేసి లవంగాలు, యాలకులు, దాల్చిన చెక్క, బిర్యానీ ఆకు, జీలకర్ర వేయాలి. తర్వాత సన్నగా తరిగిన ఉల్లిపాయలు, పచ్చిమిర్చి వేసి బంగారు రంగు వచ్చేవరకు వేయించాలి. అల్లం వెల్లుల్లి పేస్ట్ వేసి పచ్చివాసన పోయాక టమోటాలు జోడించాలి.

టమోటాలు మెత్తబడిన తర్వాత తరిగిన కూరగాయలు, ఉడికించిన ఉలవలు, పెరుగు, కారం, ధనియాల పొడి, గరం మసాలా, బిర్యానీ మసాలా, ఉప్పు వేసి బాగా కలపాలి. పుదీనా, కొత్తిమీరలో కొంత వేసి, ఉలవచారు నీటిని పోసి మరిగించాలి.

ఇప్పుడు నానబెట్టిన బియ్యాన్ని వేసి, బియ్యం ఉడకడానికి సరిపడా నీరు ఉందో లేదో చూసుకోవాలి. గిన్నెపై మూత పెట్టి తక్కువ మంటపై బియ్యం మెత్తగా ఉడికే వరకు ఉంచాలి. చివరగా మిగిలిన కొత్తిమీర, పుదీనా చల్లి స్టవ్ ఆపేయాలి. పది నిమిషాల తర్వాత మెల్లగా కలిపి వేడివేడిగా వడ్డించాలి. అంతే.. ఎంతో రుచికరమైన ఉలవచారు వెజ్ బిర్యానీ సిద్ధం. దీన్ని రైతాతో కలిపి ఆస్వాదిస్తే ప్రతి ముద్దా ప్రత్యేకమైన రుచిని అందిస్తుంది.

Also Read: అచ్చం గుడి ప్రసాదం లాంటి రవ్వ కేసరి రావాలంటే.. ఈ చిన్న చిట్కా పాటిస్తే చాలు!