Strength training for women: యవ్వనంగా, ఆరోగ్యంగా ఉండాలనుకుంటున్నారా? అయితే ఈ రోజే స్ట్రెంత్ ట్రైనింగ్ మొదలుపెట్టండి!

Strength training for women: ముప్పై ఏళ్లు దాటిన తర్వాత మహిళల శరీరంలో అనేక మార్పులు మొదలవుతాయి. హార్మోన్ల హెచ్చుతగ్గులు, జీవక్రియ నెమ్మదించడం, కండరాల సాంద్రత తగ్గడం వంటి సవాళ్లు ఎదురవుతాయి. చాలా మంది మహిళలు కేవలం కార్డియో లేదా నడకకే పరిమితమవుతారు. కానీ ఈ వయసులో.. ‘స్ట్రెంత్ ట్రైనింగ్’ లేదా బరువులు ఎత్తడం అనేది విలాసం కాదు. అది ఒక అవసరం. కేవలం బాడీ బిల్డింగ్ కోసమే కాకుండా.. దీర్ఘకాలిక ఆరోగ్యం, బలమైన ఎముకలు , హెల్తీ లైఫ్ స్టైల్ కోసం స్ట్రెంత్ ట్రైనింగ్ ఎలా సహాయపడుతుందో ఇప్పుడు తెలుసుకుందాం.

30 దాటిన మహిళలకు స్ట్రెంత్ ట్రైనింగ్ ఎందుకు ముఖ్యం?
సాధారణంగా మహిళలు బరువులు ఎత్తడం అంటే.. కేవలం కండలు పెంచడమే అనుకుంటారు. కానీ సైన్స్ ప్రకారం.. 30 ఏళ్ల తర్వాత మహిళల ఆరోగ్యానికి ఇది ఒక సంజీవని లాంటిది. దీని వల్ల కలిగే ప్రధాన ప్రయోజనాలు ఇవే..

1. ఎముకల ఆరోగ్యం:
మహిళల్లో 30 ఏళ్ల తర్వాత ఎముకల సాంద్రత తగ్గడం మొదలవుతుంది. అంతే కాకుండా ఇది భవిష్యత్తులో ‘ఆస్టియోపోరోసిస్’ వంటి సమస్యలకు దారితీస్తుంది. స్ట్రెంత్ ట్రైనింగ్ చేసినప్పుడు ఎముకలపై పడే ఒత్తిడి వల్ల అవి మరింత బలంగా తయారవుతాయి. ఇది ఎముకల విరుగుదల ప్రమాదాన్ని తగ్గిస్తుంది.

2. జీవక్రియ మెరుగుదల:
వయసు పెరిగే కొద్దీ మన శరీరంలోని కండరాల శాతం తగ్గుతుంది. దీని వల్ల మెటబాలిజం నెమ్మదిస్తుంది. స్ట్రెంత్ ట్రైనింగ్ ద్వారా కండరాలను నిర్మించడం వల్ల, మీరు విశ్రాంతి తీసుకుంటున్న సమయంలో కూడా మీ శరీరం ఎక్కువ కేలరీలను ఖర్చు చేస్తుంది. ఇది బరువు పెరగకుండా నియంత్రించడంలో అద్భుతంగా పని చేస్తుంది.

3. హార్మోన్ల సమతుల్యత:
30లలో ఉన్న మహిళల్లో ఈస్ట్రోజెన్ స్థాయిల్లో మార్పులు రావడం సహజం. క్రమం తప్పకుండా రెసిస్టెన్స్ ట్రైనింగ్ చేయడం వల్ల ఇన్సులిన్ సెన్సిటివిటీ పెరుగుతుంది. అంతే కాకుండా హార్మోన్లు కూడా సమతుల్యంగా ఉంటాయి. ఇది పీరియడ్స్ సమస్యలను , మూడ్ స్వింగ్స్‌ను తగ్గించడంలో తోడ్పడుతుంది.

4. మానసిక ఆరోగ్యం, ఆత్మవిశ్వాసం:
శారీరక బలం పెరిగినప్పుడు అది మానసిక దృఢత్వానికి కూడా దారి తీస్తుంది. వ్యాయామం చేసే సమయంలో విడుదలయ్యే ‘ఎండార్ఫిన్లు’ ఒత్తిడిని, ఆందోళనను తగ్గిస్తాయి. తన శరీరంలో వస్తున్న సానుకూల మార్పులను చూసినప్పుడు మహిళల్లో ఆత్మవిశ్వాసం రెట్టింపు అవుతుంది.

5. వృద్ధాప్య ఛాయలను అడ్డుకోవడం:
ముప్పై ఏళ్ల నుండే కండరాలు క్షీణించడం ప్రారంభమవుతుంది. స్ట్రెంత్ ట్రైనింగ్ ఈ ప్రక్రియను నెమ్మదింపజేస్తుంది. చర్మం బిగుతుగా ఉండటానికి.. కీళ్ల నొప్పులు రాకుండా ఉండటానికి ఇది ఒక యాంటీ ఏజింగ్ థెరపీలా పనిచేస్తుంది.

Also Read: పరగడుపున ఉసిరికాయ తింటే కలిగే.. అద్భుత ప్రయోజనాలు

ఎలా ప్రారంభించాలి?
చిన్నగా మొదలుపెట్టండి: మొదటి రోజే భారీ బరువులు ఎత్తకుండా, బాడీ వెయిట్ వ్యాయామాలు లేదా చిన్న డంబెల్స్‌తో ప్రారంభించండి.

వారానికి 2-3 రోజులు: వారానికి కనీసం రెండు లేదా మూడు సార్లు స్ట్రెంత్ ట్రైనింగ్ చేయడం సరి పోతుంది.

సరైన పద్ధతి : వ్యాయామాలు చేసేటప్పుడు సరైన భంగిమ చాలా ముఖ్యం. వీలైతే ఒక ట్రైనర్ పర్యవేక్షణలో చేయడం మంచిది.

30 ఏళ్లు దాటిన మహిళలు తమ ఆరోగ్యంపై పెట్టుబడి పెట్టడానికి స్ట్రెంత్ ట్రైనింగ్ ఒక ఉత్తమ మార్గం. ఇది మిమ్మల్ని కేవలం దృఢంగానే కాకుండా.. రోగాల బారిన పడకుండా కాపాడుతుంది. కాబట్టి.. నడకతో పాటు కొద్దిపాటి బరువులు ఎత్తడం కూడా మీ లైఫ్ స్టైల్లో భాగం చేసుకోండి.

Share

• 
• 
• 
• 
• 
•