భార్యా, తల్లా.. ఇద్దరి మధ్య నలిగిపోకుండా భర్త ఏం చేయాలి?

Possessive mother-son relationship| కొడుకు పెళ్లయినా తల్లి ప్రేమ తగ్గదు. కానీ ఆ ప్రేమ పేరుతో అతని జీవితంలోని ప్రతి నిర్ణయంలో జోక్యం చేసుకుంటే మాత్రం సమస్యలు మొదలవుతాయి. ఎక్కడికి వెళ్లాలి, ఎవరితో స్నేహం చేయాలి, ఎవరిని పెళ్లి చేసుకోవాలి అనే విషయాల్లోనూ తల్లి మాటే నెగ్గాలనుకుంటే పరిస్థితి మారుతుంది. ముఖ్యంగా పెళ్లి తర్వాత భర్త తన తల్లికి, భార్యకు మధ్య సమతుల్యత పాటించలేకపోతే కుటుంబంలో మనస్పర్థలు పెరుగుతాయి. అసలు తల్లి ప్రేమ ఎప్పుడు అతిగా మారుతుంది? కొడుకు స్వతంత్రంగా ఎదగడానికి కుటుంబ సభ్యులు ఏం చేయాలి?

కొడుకుపై తల్లి ప్రేమను సమాజం ఎందుకు గొప్పగా చూస్తుంది?

భారతీయ కుటుంబాల్లో తల్లికి ప్రత్యేక స్థానం ఉంటుంది. కొడుకు ఆహారం, ఉద్యోగం, నివాసం, స్నేహాలు, పెళ్లి వంటి విషయాల్లో తల్లి సలహాలు ఇవ్వడం సాధారణంగా కనిపిస్తుంది. చాలామంది దీన్ని కుటుంబ అనుబంధానికి గుర్తుగా భావిస్తారు. ముఖ్యంగా కొన్ని కుటుంబాల్లో కొడుకును పెంచడం తల్లి జీవితంలో ప్రధాన భాగంగా మారుతుంది. కొడుకు తనపై ఆధారపడటం ఆమెకు ఆనందాన్ని, భద్రతను ఇస్తుంది. అందుకే తల్లిని ఎంతో ప్రేమించే కొడుకును ‘మమ్మీస్ బాయ్’ అంటూ సరదాగా పిలుస్తుంటారు.
అయితే, ప్రేమ పేరుతో కొడుకు స్వేచ్ఛను పరిమితం చేసినప్పుడు సమస్య మొదలవుతుంది. సైకాలజీలొ భావోద్వేగ హద్దులు చెరిగిపోయే ఇలాంటి అనుబంధాన్ని ‘ఎన్‌మెష్‌మెంట్’ (Enmeshment) అంటారు. ఇలాంటి సంబంధాల్లో ఎదుటివారి మనసు నొప్పిస్తామనే భయంతో సొంత నిర్ణయాలు తీసుకోవడం కష్టమవుతుంది.

పెళ్లయ్యాక కొడుకు జీవితంలో సమస్యలు ఎందుకు పెరుగుతాయి?

పెళ్లి తర్వాత భర్త జీవితంలో భార్యకు కూడా కీలక స్థానం ఏర్పడుతుంది. ఇద్దరూ కలిసి నిర్ణయాలు తీసుకోవాలి, వ్యక్తిగత విషయాలను పంచుకోవాలి. అయితే, కొడుకు జీవితంపై గతంలో ఉన్నంత ప్రభావం కొనసాగాలని తల్లి కోరుకుంటే విభేదాలు రావచ్చు. ప్రతి నిర్ణయానికి తల్లి అనుమతి తీసుకోవడం, భార్యాభర్తల మధ్య గొడవలను తల్లితో పంచుకోవడం వంటి అలవాట్లు సమస్యలను పెంచుతాయి. దీంతో భార్య తన భర్త ప్రేమ, సమయం కోసం పోటీ పడుతున్నట్లు భావించవచ్చు. కొన్ని కుటుంబాల్లో కోడలే అన్ని విషయాల్లో సర్దుకుపోవాలని ఆశిస్తారు. భర్త తన భార్యకు తగిన మద్దతు ఇవ్వకపోతే, ఆమె మానసిక ఒత్తిడికి గురయ్యే అవకాశం ఉంది.

Also Read: వైవాహిక సమస్యలకు ‘లవ్ హార్మోన్’తో చెక్? విడాకుల నివారణకు కొత్త ప్రతిపాదన

బంధాలు ఆరోగ్యకరంగా ఉండాలంటే అందరూ మారాలి

ఇలాంటి పరిస్థితులకు తల్లిని మాత్రమే బాధ్యురాలిగా చూడటం సరైంది కాదు. కొడుకు కూడా తన బాధ్యతను గుర్తించాలి. తల్లిని గౌరవిస్తూనే తన నిర్ణయాలను తానే తీసుకోవాలి. భార్యాభర్తల వ్యక్తిగత విషయాలకు స్పష్టమైన హద్దులు పెట్టుకోవాలి. అదేవిధంగా, తల్లి తన కొడుకు ఎదిగాడనే విషయాన్ని అంగీకరించాలి. స్నేహాలు, అభిరుచులు, ఇతర ఆసక్తులకు సమయం కేటాయించడం ద్వారా తన జీవితాన్ని మరింత సంతోషంగా మార్చుకోవచ్చు. భార్య కూడా అత్తాకోడళ్ల మధ్య పోటీగా కాకుండా, పరస్పర గౌరవంతో బంధాన్ని కొనసాగించేందుకు ప్రయత్నించాలి.

ప్రేమతో పాటు వ్యక్తిగత స్వేచ్ఛ కూడా ముఖ్యం

కొడుకు చిన్నపిల్లాడిగా ఉన్నప్పుడు ‘నా కొడుకు’ అనడం సహజంగా ప్రేమను సూచిస్తుంది. కానీ అతను పెద్దయ్యాక అదే మాట అతనిపై హక్కు చెలాయిస్తున్న భావనను కలిగించవచ్చు. అయితే, ఒక్క సోషల్ మీడియా పోస్టును చూసి తల్లి, కొడుకుల బంధంపై కామెంట్ చేయడం సరైంది కాదు. ముఖ్యమైన విషయం ఏమిటంటే.. ప్రేమతోపాటు వ్యక్తిగత స్వేచ్ఛకు కూడా చోటివ్వాలి. తల్లిని ప్రేమిస్తూనే కొడుకు స్వతంత్ర వ్యక్తిగా, బాధ్యతగల భర్తగా ఎదగాలి.

Also Read: అత్తమామల ఇల్లు, ఆస్తిపై కోడలికి హక్కులుంటాయా? భారత చట్టం ఏం చెబుతోందంటే