శరీరంలో కొలెస్ట్రాల్ తగ్గాలా ? ఈ డ్రింక్స్‌తో బెస్ట్ రిజల్ట్

Lower cholesterol: ప్రస్తుతం మారిన ఆహారపు అలవాట్లు, శారీరక శ్రమ లేకపోవడం వల్ల చాలా మంది ‘హై కొలెస్ట్రాల్’ సమస్యతో బాధపడుతున్నారు. రక్తంలో చెడు కొలెస్ట్రాల్ పెరగడం వల్ల గుండె పోటు, స్ట్రోక్ వంటి తీవ్రమైన ఆరోగ్య సమస్యలు తలెత్తే ప్రమాదం ఉంది. కొలెస్ట్రాల్‌ను తగ్గించుకోవడానికి మందులతో పాటు సహజ సిద్ధమైన డ్రింక్స్ క్రమం తప్పకుండా తీసుకోవడం వల్ల అద్భుతమైన ఫలితాలు కనిపిస్తాయి. మన ఇంట్లోనే.. దొరికే పదార్థాలతో తయారుచేసుకోగలిగే కొన్ని డ్రింక్స్ ధమనులలో పేరుకుపోయిన కొవ్వును కరిగించి, గుండెను ఆరోగ్యంగా ఉంచుతాయి. అవేంటో వివరంగా తెలుసుకుందాం.

చెడు కొలెస్ట్రాల్‌ను తగ్గించే అద్భుతమైన డ్రింక్స్:
కొలెస్ట్రాల్ స్థాయిలను నియంత్రించడానికి ,గుండె ఆరోగ్యాన్ని మెరుగుపరచడానికి ఈ క్రింది డ్రింక్స్ ఎంతగానో ఉపయోగపడతాయి.

1. గ్రీన్ టీ:
గ్రీన్ టీలో ‘కాటెచిన్స్’అనే శక్తివంతమైన యాంటీ ఆక్సిడెంట్స్ ఉంటాయి. ఇవి రక్తంలో చెడు కొలెస్ట్రాల్ స్థాయిలను తగ్గించడంలో అంతే కాకుండా మంచి కొలెస్ట్రాల్ పెంచడంలో సహాయ పడతాయి. రోజుకు రెండు కప్పుల గ్రీన్ టీ తాగడం వల్ల గుండె సంబంధిత సమస్యల నుంచి రక్షణ లభిస్తుంది.

2. వెల్లుల్లి, తేనె :
వెల్లుల్లిలో ఉండే ‘అల్లిసిన్’ అనే సమ్మేళనం రక్తనాళాల్లో కొవ్వు పేరుకుపోకుండా చూస్తుంది.

తయారీ: రెండు వెల్లుల్లి రెబ్బలను మెత్తగా దంచి.. ఒక గ్లాసు గోరు వెచ్చని నీటిలో కొద్దిగా తేనె కలుపుకుని ఉదయాన్నే పరగడుపున తాగాలి. ఇది రక్తపోటును తగ్గించడంతో పాటు కొలెస్ట్రాల్‌ను కరిగిస్తుంది.

3. ఓట్స్ డ్రింక్ :
ఓట్స్‌లో ‘బీటా-గ్లూకాన్’ అనే కరిగే పీచు పదార్థం ఉంటుంది. ఇది జీర్ణ వ్యవస్థలో కొలెస్ట్రాల్ గ్రహించబడకుండా అడ్డుకుంటుంది.

తయారీ: ఓట్స్‌ను నీటిలో నానబెట్టి, ఆ మిశ్రమాన్ని స్మూతీలా చేసుకుని తాగడం వల్ల శరీరానికి తగినంత ఫైబర్ అందుతుంది.

4. టమాటో రసం :
టమాటాల్లో ‘లైకోపీన్’ అనే యాంటీ ఆక్సిడెంట్ పుష్కలంగా ఉంటుంది. ఇది రక్తంలోని లిపిడ్ స్థాయిలను మెరుగు పరుస్తుంది. రోజుకు ఒక గ్లాసు తాజా టమాటా జ్యూస్ తాగడం వల్ల గుండె ఆరోగ్యానికి ఎంతో మేలు జరుగుతుంది. అయితే ఇందులో ఉప్పు కలపకుండా తాగడం శ్రేయస్కరం.

5. మెంతి నీరు:
మెంతుల్లో ఉండే ఫైబర్ , శాపోనిన్స్ కొలెస్ట్రాల్‌ను తగ్గించడంలో కీలక పాత్ర పోషిస్తాయి.

తయారీ: ఒక చెంచా మెంతులను రాత్రంతా నీటిలో నానబెట్టి, మరుసటి రోజు ఉదయం ఆ నీటిని మరిగించి వడకట్టుకుని తాగాలి. ఇది డయాబెటిస్ రోగులకు కూడా చాలా మంచిది.

6. ఉసిరి జ్యూస్ :
ఉసిరిలో విటమిన్-సి , అమైనో ఆమ్లాలు ఎక్కువగా ఉంటాయి. ఇది రక్తనాళాలను శుద్ధి చేసి, రక్త ప్రసరణను మెరుగు పరుస్తుంది. రోజూ ఉదయం 20ml ఉసిరి రసాన్ని ఒక గ్లాసు నీటిలో కలిపి తాగడం వల్ల చెడు కొవ్వు త్వరగా కరుగుతుంది.

లైఫ్ స్టైల్ మార్పులు – మరికొన్ని జాగ్రత్తలు:
కేవలం డ్రింక్స్ తాగడం వల్ల మాత్రమే కొలెస్ట్రాల్ తగ్గదు. వాటితో పాటు ఈ కింది జాగ్రత్తలు కూడా పాటించాలి.

జంక్ ఫుడ్ వద్దు: నూనెలో వేయించిన పదార్థాలు, బేకరీ వస్తువులు, ప్రాసెస్ చేసిన ఆహారానికి దూరంగా ఉండాలి.

వ్యాయామం: ప్రతిరోజూ కనీసం 30 నిమిషాల నడక లేదా వ్యాయామం చేయడం వల్ల శరీరంలో మంచి కొలెస్ట్రాల్ పెరుగుతుంది.