వంట రాని వాళ్లు కూడా నిమిషాల్లో చేసేయగల సూపర్ టేస్టీ పన్నీర్ భుర్జీ రెసిపీ!

Paneer Bhurji Recipe: సాయంత్రం వేళ ఆఫీస్ నుండి రాగానే.. ఏదైనా వేడివేడిగా, కమ్మగా తినాలనిపించడం చాలా సహజం. అలాంటప్పుడు ఫ్రిజ్‌లో పన్నీర్ ఉంటే చాలు, వంటగదిలో ఎక్కువ శ్రమ లేకుండానే క్షణాల్లో అద్భుతమైన వంటకం సిద్ధం చేసుకోవచ్చు. అదే ‘పన్నీర్ భుర్జీ’. కేవలం పది నిమిషాల్లో తయారైపోయే ఈ కర్రీ.. రోటీలోకి, వేడి వేడి అన్నంలోకి లేదా బ్రెడ్ టోస్ట్‌తో కూడా అద్భుతంగా ఉంటుంది. వంట చేయడం రాని వాళ్లు కూడా మొదటిసారే ఎంతో రుచిగా దీన్ని తయారు చేయవచ్చు. అదెలాగో ఇప్పుడు చూద్దాం.

కావాల్సిన పదార్థాలు:

పన్నీర్ – రెండు వందల గ్రాములు
ఉల్లిపాయలు – రెండు
టమోటాలు – రెండు
పచ్చిమిర్చి – నాలుగు
అల్లం వెల్లుల్లి పేస్ట్ – ఒక స్పూన్
కారం – ఒక స్పూన్
ధనియాల పొడి – అర స్పూన్
గరం మసాలా – అర స్పూన్
పసుపు – చిటికెడు
నూనె – రెండు స్పూన్లు
నెయ్యి – ఒక స్పూన్
కొత్తిమీర – కొద్దిగా
ఉప్పు – రుచికి సరిపడా

Also Read: సండే స్పెషల్.. ఎప్పుడూ ఒకేలా కాకుండా మటన్‌ను ఇలా గ్రీన్‌గా వండి చూడండి.. వేళ్లు నాకేస్తారు!

తయారీ విధానం ఇలా:

ముందుగా పన్నీర్‌ను చిన్న ముక్కలుగా కట్ చేసుకోవాలి లేదా చేతితో మెత్తగా పొడిలా చేసి పక్కన పెట్టుకోవాలి. అలాగే ఉల్లిపాయలు, టమోటాలు, పచ్చిమిర్చిలను సన్నగా తరిగి సిద్ధంగా ఉంచుకోవాలి. ఇప్పుడు స్టవ్ మీద కడాయి పెట్టి నూనె, నెయ్యి వేసి వేడి చేయాలి. నూనె కాగిన తర్వాత సన్నగా తరిగిన పచ్చిమిర్చి ముక్కలు, ఉల్లిపాయ తరుగు వేసి, ఉల్లిపాయలు బంగారు రంగులోకి వచ్చే వరకు మీడియం మంటపై వేయించాలి. ఉల్లిపాయలు వేగిన తర్వాత అల్లం వెల్లుల్లి పేస్ట్ వేసి పచ్చి వాసన పోయే వరకు కలపాలి. ఆ తర్వాత సన్నగా తరిగిన టమోటా ముక్కలు వేసి, టమోటాలు మెత్తగా మగ్గి నూనె పైకి తేలే వరకు ఉడికించాలి.

టమోటాలు బాగా మగ్గిన తర్వాత పసుపు, కారం, ధనియాల పొడి, రుచికి సరిపడా ఉప్పు వేసి బాగా కలపాలి. మసాలాలు మాడిపోకుండా ఉండటానికి రెండు స్పూన్ల నీళ్లు చల్లుకోవచ్చు. మసాలా మిశ్రమం నూనె విడిచే సమయానికి, ముందుగా సిద్ధం చేసుకున్న పన్నీర్ పొడిని అందులో వేయాలి. మసాలా అంతా పన్నీర్‌కు బాగా పట్టేలా నిదానంగా కలపాలి. పన్నీర్ వేసిన తర్వాత ఎక్కువ సేపు ఉడికించాల్సిన అవసరం లేదు, కేవలం రెండు నుండి మూడు నిమిషాలు సన్నటి మంటపై మగ్గనిస్తే సరిపోతుంది. చివరగా అర స్పూన్ గరం మసాలా, సన్నగా తరిగిన తాజా కొత్తిమీర వేసి బాగా కలిపి స్టవ్ ఆఫ్ చేయాలి. అంతే.. ఘుమఘుమలాడే వేడివేడి పన్నీర్ భుర్జీ రెడీ. దీన్ని వేడివేడి చపాతీలతో సర్వ్ చేస్తే కుటుంబ సభ్యులంతా ఎంతో ఇష్టంగా తింటారు.

Also Read: అరకు ఫేమస్ బొంగు చికెన్.. తింటే జీవితంలో ఆ రుచిని మర్చిపోరు, ఎలా చేయాలో తెలుసా?