ఎప్పుడూ పకోడీలేనా? ఈసారి పచ్చి అరటికాయతో ఇలా షామీ కబాబ్ చేసి చూడండి!

Raw Banana Shami Kebab: సాయంత్రం వేళ టీతో పాటు ఏదైనా వేడివేడిగా, కరకరలాడే చిరుతిండి తినాలనిపిస్తే.. ఎప్పుడూ పకోడీలు, బజ్జీలే కాకుండా ఈసారి కాస్త కొత్తగా ‘అరటికాయ షామీ కబాబ్’ తయారు చేసకుని తినండి. మాంసంతో చేసే షామీ కబాబ్‌ను పోలిన రుచితో, పూర్తిగా శాకాహార పదార్థాలతో ఈ వంటకాన్ని సులభంగా చేసుకోవచ్చు. ఇంట్లో పిల్లల నుంచి పెద్దల వరకు అందరూ ఇష్టంగా తినేలా వీటిని తయారు చేయవచ్చు.

మన వంటగదిలో సులభంగా దొరికే పచ్చి అరటికాయతో చేసే ఈ కబాబ్‌లు బయటకు బంగారు రంగులో, లోపల మెత్తగా ఉంటాయి. ఉడికించిన అరటికాయతో పాటు శనగపప్పు, ఉల్లిపాయ, పచ్చిమిర్చి, కొన్ని మసాలా దినుసులు కలిపి తయారు చేయడం వల్ల మంచి రుచి వస్తుంది. సాయంత్రం చిరుతిండిగా మాత్రమే కాకుండా ఇంటికి అతిథులు వచ్చినప్పుడు కూడా వీటిని చేసి పెట్టవచ్చు. టమాటా సాస్ లేదా పుదీనా చట్నీతో తింటే మరింత రుచిగా ఉంటాయి. మరి ఈ అరటికాయ షామీ కబాబ్‌ను ఇంట్లోనే ఎలా తయారు చేసుకోవాలో తెలుసుకుందాం.

Also Read: ఘాటు ఘాటుగా మష్రూమ్ పెప్పర్ ఫ్రై.. ఒక్కసారి ఇలా ట్రై చేస్తే టేస్ట్ అద్భుతం!

కావాల్సిన పదార్థాలు:

పచ్చి అరటికాయలు – 2
శనగపప్పు – అర కప్పు
ఉల్లిపాయ – 1
పచ్చిమిర్చి – 3
అల్లం – చిన్న ముక్క
కొత్తిమీర – 2 టేబుల్ స్పూన్లు
గరం మసాలా – అర టీస్పూన్
ధనియాల పొడి – అర టీస్పూన్
జీలకర్ర పొడి – అర టీస్పూన్
కారం – అర టీస్పూన్
పసుపు – పావు టీస్పూన్
మొక్కజొన్న పిండి – 2 టేబుల్ స్పూన్లు
నిమ్మరసం – 1 టీస్పూన్
ఉప్పు – తగినంత
నూనె – వేయించడానికి సరిపడా

తయారీ విధానం:

పచ్చి అరటికాయలను శుభ్రంగా కడిగి, తొక్క తీయకుండా నీటిలో వేసి మెత్తగా ఉడికించాలి. మరో పాత్రలో శనగపప్పును కూడా మెత్తగా ఉడికించాలి. అరటికాయలు చల్లారిన తర్వాత తొక్క తీసి ఒక గిన్నెలో వేసి మెత్తగా మెదపాలి. శనగపప్పులో నీరు ఎక్కువగా ఉంటే వడకట్టి, దానిని కూడా మెత్తగా చేసి అరటికాయ ముద్దలో కలపాలి.

ఇప్పుడు ఈ మిశ్రమంలో సన్నగా తరిగిన ఉల్లిపాయ, పచ్చిమిర్చి, అల్లం, కొత్తిమీర వేయాలి. గరం మసాలా, ధనియాల పొడి, జీలకర్ర పొడి, కారం, పసుపు, ఉప్పు, నిమ్మరసం కూడా వేసి బాగా కలపాలి. మిశ్రమం మరీ మెత్తగా ఉంటే మొక్కజొన్న పిండి కలపాలి. చేతులకు కొద్దిగా నూనె రాసుకుని మిశ్రమాన్ని చిన్న ఉండలుగా చేసి, అరచేతితో నొక్కి కబాబ్‌ల ఆకారంలో తయారు చేసుకోవాలి.

బాణలిలో నూనె వేడి చేసి కబాబ్‌లను మధ్యస్థ మంటపై రెండు వైపులా బంగారు రంగు వచ్చే వరకు వేయించాలి. అవి విరిగిపోకుండా జాగ్రత్తగా తిప్పాలి. బయటకు తీసి అదనపు నూనె పోయేలా కాసేపు ఉంచాలి.

అరటికాయలు, శనగపప్పు ఉడికించిన తర్వాత వాటిలో నీరు లేకుండా చూసుకోవాలి. మిశ్రమం గట్టిగా ఉంటే కబాబ్‌లు సులభంగా ఆకారం వస్తాయి. నూనె మరీ ఎక్కువ వేడిగా ఉన్నా, తక్కువ వేడిగా ఉన్నా కబాబ్‌లు సరిగ్గా వేగవు. అందుకే మధ్యస్థ మంటపై వేయించాలి. వేడివేడిగా టమాటా సాస్ లేదా పుదీనా చట్నీతో వడ్డిస్తే ఈ అరటికాయ షామీ కబాబ్‌లు ఎంతో రుచిగా ఉంటాయి.

Also Read: వంట రాని వాళ్లు కూడా నిమిషాల్లో చేసేయగల సూపర్ టేస్టీ పన్నీర్ భుర్జీ రెసిపీ!