Memorable Train Journey: ఒక ప్రాంతం నుంచి మరో ప్రాంతానికి త్వరగా వెళ్లాలంటే.. సాధారణంగా విమాన ప్రయాణాన్ని ఎంచుకుంటారు. కానీ, కొందరికి ప్రయాణంలో కనిపించే ప్రకృతి అందాలు, కొత్త వ్యక్తులతో పరిచయాలు, క్రేజీ ఎక్స్ పీరియెన్స్ అసలైన ఆనందాన్ని ఇస్తాయి. ఇలాంటి ఆలోచనతోనే ఓ ఫ్యామిలీ రెండు గంటల్లో చేరుకునే ప్రయాణం కోసం ఏకంగా 32 గంటలు రైలులో గడిపింది. మంగోలియా నుంచి చైనా వరకు సాగిన ఈ ప్రయాణం ఇప్పుడు సోషల్ మీడియాలో వైరల్ అవుతోంది.
జెరీ విల్మాట్, ఆమె భర్త పీటర్ తమ పిల్లలతో కలిసి ప్రపంచ వ్యాప్తంగా కొత్త ప్రాంతాలను సందర్శిస్తుంటారు. ఇటీవల మంగోలియా రాజధాని ఉలాన్‌బాతర్ నుంచి చైనాలోని బీజింగ్‌కు వెళ్లేందుకు వాళ్లు ప్రత్యేకమైన నిర్ణయం తీసుకున్నారు. విమానంలో వెళ్తే దాదాపు రెండు గంటల్లో చేరుకునే అవకాశం ఉన్నప్పటికీ, ఈ కుటుంబం రైల్లో ప్రయాణించాలనుకుంది. దాదాపు 32 గంటల పాటు సాగిన ఈ ప్రయాణంలో ఎన్నో కొత్త అనుభవాలను సొంతం చేసుకుంది.
ఈ ప్రయాణంలో అత్యంత ఆసక్తికరమైన విషయం మంగోలియా, చైనా సరిహద్దు దగ్గర ఎదురైన ఎక్స్ పీరియెన్స్. పాస్‌ పోర్ట్ చెకింగ్స్ కోసం రైలు సుమారు నాలుగు గంటల పాటు ఆగినట్లు జెరీ వివరించారు. అంతేకాదు, మంగోలియా, చైనా దేశాల్లో రైల్వే పట్టాల మధ్య వెడల్పు ఒకేలా ఉండదు. అందువల్ల సరిహద్దు వద్ద రైలు చక్రాలకు సంబంధించిన ప్రత్యేక మార్పులు చేయాల్సి వచ్చింది. ఈ ప్రక్రియ కూడా ప్రయాణంలో ఒక ఎక్స్ పీరియెన్స్ అందించింది. ఆ తర్వాత ఎరెన్‌హాట్, జినింగ్, జాంగ్‌జియాకౌ లాంటి ప్రాంతాల మీదుగా రైలు ప్రయాణించి చివరకు బీజింగ్‌కు చేరుకుంది. మంగోలియన్ మైదానాలు, మారుతూ కనిపించే ప్రకృతి దృశ్యాలు ఆ ఫ్యామిలీకి మధుర జ్ఞాపకాలను మిగిల్చాయి.
ఈ ప్రయాణానికి సంబంధించిన వివరాలను జెరీ సోషల్ మీడియాలో పంచుకున్నారు. విమానంలో వెళ్తే సమయం ఆదా అయ్యేదని, కానీ, రైలులో ప్రయాణించడం వల్ల కొత్త ప్రదేశాలను చూడటం, వివిధ దేశాల ప్రజలను కలవడం, అంతర్జాతీయ సరిహద్దును రైలులో దాటిన అనుభవాన్ని పిల్లలకు వివరించడం సాధ్యమైందన్నారు. ఇప్పటికే ఆగ్నేయాసియాలో పలు స్లీపర్ రైళ్లలో ప్రయాణించిన ఈ కుటుంబానికి, 32 గంటల ప్రయాణమే ఇప్పటి వరకు అత్యంత సుదీర్ఘమైనదిగా గుర్తింపు పొందింది.
ఈ ప్రయాణం గురించి తెలుసుకున్న నెటిజన్లు ఆ కుటుంబాన్ని అభినందిస్తున్నారు. పిల్లలకు ఇలాంటి ప్రయాణాలు జీవితాంతం గుర్తుండిపోయే జ్ఞాపకాలను అందిస్తాయని పలువురు కామెంట్స్ చేశారు. మరికొందరు రైలు ప్రయాణాల్లో కనిపించే అందాలు, అనుభవాలు విమాన ప్రయాణంలో దొరకవన్నారు. వేగంగా గమ్యాన్ని చేరుకోవడమే ప్రయాణం కాదు.. దారిలో ఎదురయ్యే అనుభవాలే జీవితంలో చెరగని జ్ఞాపకాలుగా మిగులుతాయని.. జెరీ కుటుంబం నిరూపించింది.
Read Also: 20 ఏళ్ల కష్టం.. రైల్వే స్టేషన్‌ను అందమైన పూలవనంగా మార్చిన వృద్ధ దంపతులు!
Share
ఎప్పుడూ పకోడీలేనా? ఈసారి పచ్చి అరటికాయతో ఇలా షామీ కబాబ్ చేసి చూడండి!
రామ్ పోతినేని సినిమాలో జెనిలియా భర్త.. వీడియో వైరల్!
