Brain Health: మెదడుకు హాని చేసే అలవాట్లు ఇవే.. జాగ్రత్త పడకపోతే ప్రాణాలకే ప్రమాదం

Brain Health: మన మెదడు మన శరీరానికి నియంత్రణ కేంద్రం. మనం చేసే చిన్న చిన్న పనులు, అలవాట్లు మన మెదడు ఆరోగ్యంపై తీవ్ర ప్రభావం చూపుతాయి. చాలా సందర్భాల్లో మనం ఆరోగ్యకర మైన అలవాట్లు అనుకునేవి లేదా పట్టించుకోని రోజువారీ పనులు మెదడు పని తీరును నెమ్మదిచేస్తాయి. తెలియకుండానే మీ మెదడును దెబ్బతీసే ఆ 6 అలవాట్లు ఏంటో ఇప్పుడు వివరంగా తెలుసుకుందాం.

మెదడుకు హాని చేసే అలవాట్లు:

1. నిద్ర లేకపోవడం:

నేటి ఉరుకుల పరుగుల జీవితంలో చాలామంది నిద్రను త్యాగం చేస్తున్నారు. కానీ.. మనం నిద్రపోతున్నప్పుడు మెదడు తనను తాను శుభ్రం చేసుకుంటుంది. తద్వారా టాక్సిన్లను తొలగిస్తుంది. రోజుకు 7-8 గంటల నిద్ర లేకపోతే.. మెదడులోని కణాలు అలసిపోయి జ్ఞాపక శక్తి మందగించడం, ఏకాగ్రత తగ్గడం వంటి సమస్యలు వస్తాయి. దీర్ఘకాలంలో ఇది అల్జీమర్స్ వ్యాధికి దారితీయవచ్చు.

2. అతిగా చక్కెర తీసుకోవడం:

స్వీట్స్, సోడాలు, ప్రాసెస్ చేసిన ఆహారాల్లో ఉండే చక్కెర మెదడుకు శత్రువు. రక్తంలో చక్కెర స్థాయిలు పెరిగినప్పుడు, అది మెదడులో కొత్త కణాలు పుట్టకుండా అడ్డుకుంటుంది. ఇది నేర్చుకునే సామర్థ్యాన్ని తగ్గిస్తుంది. శరీరంలో ఇన్సులిన్ నిరోధకత పెరిగితే.. అది మెదడు వాపునకు కారణమవుతుంది.

3. సామాజికంగా ఒంటరితనం:

మనుషులు సంఘజీవులు. ఇతరులతో మాట్లాడటం, నవ్వడం మెదడుకు ఒక వ్యాయామం వంటిది. ఒంటరిగా గడిపే వారిలో మెదడు కుంచించుకుపోయే ప్రమాదం ఉందని పరిశోధనలు చెబుతున్నాయి. ఇతరులతో సామాజిక సంబంధాలు కలిగి ఉండటం వల్ల ఒత్తిడి తగ్గి, మెదడు చురుగ్గా ఉంటుంది.

4. అతిగా హెడ్‌ఫోన్స్ వాడటం:

చాలామంది గంటల తరబడి హెడ్‌ఫోన్స్‌లో పెద్ద శబ్దంతో సంగీతం వింటుంటారు. ఇది కేవలం చెవులకు మాత్రమే కాదు.. మెదడుకు కూడా ప్రమాదకరం. శ్రవణ శక్తి తగ్గడం వల్ల మెదడు శబ్దాలను విశ్లేషించడానికి ఎక్కువ శ్రమించాల్సి వస్తుంది. దీని వల్ల మెదడు త్వరగా అలసిపోవడమే కాకుండా.. వృద్ధాప్యంలో జ్ఞాపక శక్తి కోల్పోయే ప్రమాదం పెరుగుతుంది.

5. శారీరక శ్రమ లేకపోవడం:

రోజంతా ఒకే చోట కూర్చుని ఉండటం వల్ల రక్త ప్రసరణ తగ్గుతుంది. మెదడుకు సరిపడా ఆక్సిజన్, పోషకాలు అందాలంటే నడక లేదా వ్యాయామం తప్పనిసరి. శారీరక శ్రమ లేకపోవడం వల్ల మెదడులో ‘డోపమైన్’ వంటి హ్యాపీ హార్మోన్లు తగ్గి, మానసిక ఆందోళన, డిప్రెషన్ వంటి సమస్యలు తలెత్తుతాయి.

Also Read: గడువు ముగిసిన మందులను వాడటం ప్రమాదకరమా ?

6. చీకటిలో గడపడం:

సహజమైన సూర్యరశ్మి మన మెదడులోని ‘సిర్కాడియన్ రిథమ్’ ను క్రమబద్ధీకరిస్తుంది. పగటిపూట వెలుతురు తగలకపోతే మెదడు అయోమయానికి గురవుతుంది. దీని వల్ల నిద్రలేమి, ఏకాగ్రత లోపించడం జరుగుతుంది. సూర్యరశ్మి ద్వారా లభించే విటమిన్-డి మెదడు రక్షణకు చాలా ముఖ్యం.

మెదడు ఆరోగ్యం మన చేతుల్లోనే ఉంది. ఈ అలవాట్లను మార్చుకుని, మంచి ఆహారం, తగినంత నిద్ర, ప్రతిరోజూ వ్యాయామం అలవాటు చేసుకుంటే మెదడును యవ్వనంగా, చురుగ్గా ఉంచుకోవచ్చు.

Also Read: ఈ ఆరోగ్య సమస్యలు ఉన్న వారు పొరపాటున కూడా మఖానా తినొద్దు

Share

• 
• 
• 
• 
• 
•