Fingernails: మీ ఆరోగ్యం ఎలా ఉందో గోళ్లే చెబుతాయి.. ఈ లక్షణాలను గమనించండి !

Fingernails: మీ గోళ్లు కేవలం మీ అందాన్ని పెంచేవి మాత్రమే కాదు. అవి మీ శరీర అంతర్గత ఆరోగ్యానికి అద్దం పడతాయి. చాలా మంది గోళ్లలో వచ్చే మార్పులను కేవలం పైపైన సమస్యలుగా భావించి నిర్లక్ష్యం చేస్తారు. కానీ.. గోళ్ల రంగు, ఆకృతి లేదా మందంలో వచ్చే మార్పులు గుండె, కాలేయం, ఊపిరితిత్తుల వంటి తీవ్రమైన వ్యాధులకు తొలి సంకేతాలు కావచ్చు. మన ఆరోగ్యం గురించి మన గోళ్లు ఏం చెబుతున్నాయో ఇప్పుడు వివరంగా తెలుసుకుందాం.

మీ గోళ్లు మీ ఆరోగ్యం గురించి ఏం చెబుతున్నాయి ?

చాలాసార్లు మనం గోళ్లను కత్తిరించుకునేటప్పుడో లేదా నెయిల్ పాలిష్ వేసుకునేటప్పుడో వాటిని గమనిస్తాం. కానీ వాటిలో వచ్చే మార్పుల వెనుక పెద్ద ఆరోగ్య రహస్యాలే దాగి ఉంటాయి.

1. గోళ్ల రంగు మారడం:

పసుపు రంగు గోళ్లు: గోళ్లు పసుపు పచ్చగా మారడానికి అత్యంత సాధారణ కారణం ఫంగల్ ఇన్ఫెక్షన్. అయితే, కొన్నిసార్లు ఇది ఊపిరితిత్తుల వ్యాధులు, సోరియాసిస్ లేదా థైరాయిడ్ సమస్యలను కూడా సూచిస్తుంది.

తెల్లటి గోళ్లు : గోళ్లు ఎక్కువగా తెల్లగా మారి, చివర్లో కేవలం గులాబీ రంగు రేఖ ఉంటే అది కాలేయ సంబంధిత వ్యాధులు, కిడ్నీ ఫెయిల్యూర్ లేదా గుండె జబ్బులకు సంకేతం కావచ్చు.

నీలి రంగు గోళ్లు: శరీరానికి సరిపడా ఆక్సిజన్ అందనప్పుడు గోళ్లు నీలి రంగులోకి మారుతాయి. ఇది ఊపిరితిత్తుల సమస్యలు లేదా గుండె సంబంధిత ఇబ్బందులను తెలియజేస్తుంది.

2. గోళ్లపై మచ్చలు, చారలు:

తెల్లటి మచ్చలు: చాలా మంది ఇది కాల్షియం లోపం అనుకుంటారు. కానీ ఇవి చిన్నపాటి దెబ్బలు తగిలినప్పుడు లేదా జింక్ లోపం వల్ల కూడా రావచ్చు.

నల్లటి చారలు: గోళ్ల కింద నల్లటి చారలు కనిపిస్తే అస్సలు నిర్లక్ష్యం చేయకూడదు. ఇది ‘మెలనోమా’ అనే ప్రమాదకరమైన చర్మ క్యాన్సర్ లక్షణం అయ్యే అవకాశం ఉంది. వెంటనే డాక్టర్‌ను సంప్రదించడం మంచిది.

Also Read: వృద్ధాప్యాన్ని వేగవంతం చేసే నిద్రలేమి.. దీని నుంచి ఎలా బయటపడాలి ?

3. ఆకృతిలో మార్పులు:

స్పూన్ నెయిల్స్ : గోళ్లు చెంచా ఆకారంలో లోపలికి వంగి ఉంటే, అది మీ శరీరంలో ఐరన్ లోపం లేదా రక్తహీనత ఉందని అర్థం.

క్లబ్బింగ్ : వేలి చివరలు ఉబ్బి, గోళ్లు కిందకు వంగి ఉంటే అది రక్తంలో ఆక్సిజన్ తక్కువగా ఉందని లేదా ఊపిరితిత్తులు, గుండె వ్యాధుల తీవ్రతను సూచిస్తుంది.

గోళ్లపై గుంటలు: గోళ్లపై చిన్న చిన్న గుంటలు పడటం సోరియాసిస్ లేదా అలోపేసియా (జుట్టు రాలడం) వంటి సమస్యల లక్షణం.

4. బలహీనమైన గోళ్లు:

గోళ్లు పదే పదే విరిగిపోతుంటే లేదా పొరలుగా ఊడిపోతుంటే శరీరంలో విటమిన్ బి7 (Biotin), సి, ప్రోటీన్ల లోపం ఉందని గుర్తించాలి. అలాగే అతిగా నీటిలో పని చేయడం లేదా నెయిల్ పాలిష్ రిమూవర్లను వాడటం వల్ల కూడా ఇలా జరుగుతుంది.

Also Read: రాత్రి పూట బొప్పాయి తింటే ఏమవుతుంది? ఆరోగ్య నిపుణులు చెబుతున్న ఆసక్తికర విషయాలు !

Share

• 
• 
• 
• 
• 
•