Health Tips: మాటిమాటికీ నీరసం, జ్వరం వస్తున్నాయా? ఈ జాగ్రత్తలు మీ కోసమే!

Health Tips: కొంతమందిని చూస్తే ముక్కు మీద వేలేసుకుంటాం.. ఏ కాలమైనా వారు చాలా హెల్తీగా ఉంటారు. కానీ మరికొందరు మాత్రం వాతావరణం కొంచెం మారినా.. పక్కన ఎవరికైనా జలుబు చేసినా వెంటనే బెడ్ ఎక్కేస్తారు. “నాకే ఎందుకు ఇలా జరుగుతోంది?” అని వాపోతుంటారు. నిజానికి తరచూ జబ్బు పడటం అనేది మన శరీర రక్షణ వ్యవస్థ బలహీనపడిందనడానికి ఒక సంకేతం. మనం చేసే చిన్న చిన్న పొరపాట్లే పెద్ద అనారోగ్యాలకు దారితీస్తాయి. అసలు మనం ఎందుకు తరచూ వ్యాధుల బారిన పడుతున్నామో, దాన్ని ఎలా అడ్డుకోవాలో ఇప్పుడు తెలుసుకుందాం.

తరచూ అనారోగ్యం బారిన పడుతున్నారా? కారణాలు , జాగ్రత్తలు:
నేటి ఉరుకుల పరుగుల జీవితంలో డబ్బు సంపాదించడంపై ఉన్న శ్రద్ధ ఆరోగ్యంపై ఉండటం లేదు. ఫలితంగా బాడీ వీక్ అయిపోయి, వైరస్లు సులభంగా మనపై దాడి చేస్తున్నాయి.

అసలు కారణాలేంటి?
నిద్రలేమి: మీరు రోజుకు 7-8 గంటలు నిద్రపోకపోతే.. మీ శరీరం ఇన్ఫెక్షన్లతో పోరాడే ‘సైటోకిైన్స్’ అనే ప్రోటీన్లను ఉత్పత్తి చేయలేదు. నిద్ర తక్కువైతే ఇమ్యూనిటీ దెబ్బతింటుంది.

అతిగా స్ట్రెస్ తీసుకోవడం: మానసిక ఒత్తిడి వల్ల శరీరంలో ‘కార్టిసోల్’ అనే హార్మోన్ పెరుగుతుంది. ఇది రోగనిరోధక శక్తిని మొద్దుబారేలా చేస్తుంది.

నీరు తక్కువగా తాగడం: బాడీలో టాక్సిన్స్ (వ్యర్థాలు) బయటకు పోవాలంటే నీరు చాలా ముఖ్యం. డీహైడ్రేషన్ వల్ల త్వరగా ఇన్ఫెక్షన్లు సోకుతాయి.

పోషకాహార లోపం: జంక్ ఫుడ్, షుగర్ ఎక్కువగా ఉండే ఆహారం తీసుకోవడం వల్ల విటమిన్ సి, డి , జింక్ లోపించి బాడీ వీక్ అవుతుంది.

వ్యాయామం లేకపోవడం: రోజంతా కూర్చునే ఉండటం వల్ల రక్త ప్రసరణ తగ్గి, కణాలు చురుగ్గా ఉండవు.

తీసుకోవాల్సిన జాగ్రత్తలు:
1. పౌష్టికాహారమే ప్రాణం:
మీ ప్లేట్‌లో రంగురంగుల కూరగాయలు, పండ్లు ఉండేలా చూసుకోండి. సిట్రస్ జాతి పండ్లు (నిమ్మ, నారింజ), ఉసిరి, గుడ్లు, నట్స్ (బాదం, వాల్‌నట్స్) రోజూ తీసుకోవాలి. ఇవి సహజ సిద్ధమైన ఇమ్యూనిటీ బూస్టర్లు.

2. క్వాలిటీ స్లీప్:
రాత్రి 10 గంటలకల్లా నిద్రపోవడానికి ప్రయత్నించండి. గాఢ నిద్ర వల్ల శరీరం తనను తాను రిపేర్ చేసుకుంటుంది. ఉదయాన్నే లేవగానే ఫ్రెష్‌గా అనిపించడం మీరు ఆరోగ్యంగా ఉన్నారనడానికి సంకేతం.

3. పరిశుభ్రత పాటించండి:
చాలా వ్యాధులు చేతుల ద్వారానే లోపలికి వెళ్తాయి. భోజనానికి ముందు, బయట నుంచి వచ్చిన తర్వాత చేతులను శుభ్రంగా కడుక్కోవడం అలవాటు చేసుకోండి.

4. ఎండలో కొద్దిసేపు ఉండండి:
విటమిన్ డి లోపం వల్ల కూడా తరచూ జబ్బులు వస్తాయి. ఉదయం పూట పది నిమిషాల ఎండ తగిలితే శరీరానికి కావలసిన విటమిన్ డి అందుతుంది.

5. పేగు ఆరోగ్యం :
మన రోగనిరోధక శక్తిలో 70% పొట్టలోనే ఉంటుంది. కాబట్టి పెరుగు, మజ్జిగ వంటి ప్రోబయోటిక్ ఆహారం తీసుకోవడం వల్ల జీర్ణక్రియ బాగుండి. వ్యాధులు రాకుండా ఉంటాయి.

Also Read: బ్యూటీ పార్లర్ వెళ్లక్కర్లేదు.. ఈ కలబంద ఐస్ క్యూబ్స్‌తో ఇంట్లోనే ఫేషియల్ !

ట్రెండింగ్ హెల్త్ హ్యాక్స్:
ప్రస్తుతం “మైండ్‌ఫుల్ ఈటింగ్” బాగా పాపులర్ అవుతోంది. అంటే టీవీ చూస్తూనో.. ఫోన్ వాడుతూనో కాకుండా.. ఆహారాన్ని బాగా నమిలి, దాని రుచిని ఆస్వాదిస్తూ తినడం. దీని వల్ల పోషకాలు శరీరానికి బాగా అందుతాయి. అలాగే వారానికి ఒకసారి “డిజిటల్ డిటాక్స్” (ఫోన్‌కు దూరంగా ఉండటం) చేయడం వల్ల మానసిక ప్రశాంతత పెరిగి ఆరోగ్యం మెరుగుపడుతుంది.