ఒకప్పుడు చాక్లెట్లు అమ్మిన అమ్మాయి.. నేడు సౌత్ ఇండస్ట్రీలోనే స్టార్ హీరోయిన్!

Aishwarya Rajesh: సినిమా వెండితెరపై కనిపించే గ్లామర్ వెనుక ఎన్నో గుండెకోతలు, కన్నీటి గాథలు ఉంటాయనేది జగమెరిగిన సత్యం. ప్రస్తుతం సౌత్ ఇండస్ట్రీలో విలక్షణ నటిగా గుర్తింపు తెచ్చుకున్న ఐశ్వర్య రాజేష్ విజయాల వెనుక.. కొండంత అండగా నిలబడిన ఆమె తల్లి నాగమణి గారి కష్టం, త్యాగం ఉన్నాయి. నడి సముద్రంలో నావ మునిగిపోయినట్లు జీవితం ఒక్కసారిగా అస్తవ్యస్తమైనా, గుండె నిండా దుఃఖాన్ని మోస్తూ నలుగురు పిల్లల కోసం ఆమె పడిన కష్టం ప్రతి ఒక్కరికీ కన్నీళ్లు తెప్పిస్తుంది.

నావికురాలిగా నిలబడి!

ప్రముఖ నటుడు రాజేష్‌తో వివాహం జరిగిన తర్వాత నాగమణి గారు తన నృత్య రంగాన్ని వదిలేసి ఇల్లాలుగా స్థిరపడ్డారు. అంతా సవ్యంగా సాగుతుందనుకున్న సమయంలో, ఐశ్వర్య రాజేష్‌కు కేవలం 8 ఏళ్ల వయసున్నప్పుడే భర్త రాజేష్ కన్నుమూశారు. దాంతో నలుగురు చిన్న పిల్లల బాధ్యత మొత్తం నాగమణి భుజాలపై పడింది. ఒక వైపు భర్తను కోల్పోయిన బాధ, మరోవైపు కుటుంబాన్ని ఎలా పోషించాలనే ఆందోళన. అయినా ఆమె అధైర్యపడలేదు. ఒక మగవాడు కూడా చేయలేనంతగా శ్రమించారు. కుటుంబాన్ని సాకడానికి ఆమె చేయని పని లేదు. ఇంటింటికీ తిరిగి చీరలు అమ్మడం. ఎల్ఐసీ (LIC) ఏజెంట్‌గా మారి పాలసీలు చేయించడం. రియల్ ఎస్టేట్ రంగంలోకి అడుగుపెట్టి కస్టమర్లను సంపాదించడం. ఇలా పిల్లల చదువుల కోసం, తిండి కోసం ఒక ‘ఐరన్ లేడీ’లా నాగమణి పోరాటం సాగించారు.

కడుపు కోత…

ఆర్థిక కష్టాలు ఒక వైపు వేధిస్తుంటే, విధి ఆమెను మరోలా దెబ్బతీసింది. ఐశ్వర్యకు 11 ఏళ్లు ఉన్నప్పుడు పెద్ద కొడుకు అనుమానాస్పద స్థితిలో చనిపోయాడు. ఆ గాయం మానకముందే, ఐశ్వర్యకు 14 ఏళ్లు వచ్చేసరికి రెండో కొడుకు రోడ్డు ప్రమాదంలో కన్నుమూశాడు. కన్నబిడ్డలను ఒకరి తర్వాత ఒకరిని కోల్పోవడం ఏ తల్లికైనా నరకప్రాయం. “ఇక జీవితమే లేదు, అంతా అయిపోయింది” అనుకున్న క్షణంలో.. మిగిలిన ఇద్దరు పిల్లలు (ఐశ్వర్య, మరో కొడుకు) వైపు చూసి నాగమణి మళ్లీ ధైర్యం తెచ్చుకున్నారు. వారికోసమే తన ప్రాణాలను చేతిలో పెట్టుకుని జీవించారు.

చాక్లెట్లు అమ్మిన ఐశ్వర్య

అమ్మ పడుతున్న ఇంతటి ఘోరమైన కష్టాన్ని కళ్లారా చూస్తూ పెరిగింది ఐశ్వర్య రాజేష్. చిన్న వయసులోనే కుటుంబ బాధ్యతను, డబ్బు విలువను తెలుసుకుంది. అమ్మకు తోడుగా నిలబడాలని నిశ్చయించుకుంది. “మనం పడే కష్టాలు చాలా చిన్నవి అనిపించేలా ఐశ్వర్య రాజేష్ చిన్నతనంలోనే ఎన్నో పనులు చేసింది.”

స్కూల్, కాలేజ్ వయసులోనే ఐశ్వర్య మార్కెటింగ్ ఉద్యోగాల్లోకి అడుగుపెట్టింది. పెద్ద పెద్ద సూపర్ మార్కెట్ల ముందు నిలబడి, వచ్చే కస్టమర్లకు చాక్లెట్లను చూపిస్తూ.. “ఈ చాక్లెట్లు టేస్ట్ చూడండి.. కొనండి” అంటూ ప్రమోట్ చేసే చిన్న స్థాయి ఉద్యోగాలను కూడా ఆమె ఎంతో గౌరవంగా చేసింది. స్టార్ నటుల కుటుంబంలో పుట్టినా, అహంకారానికి పోకుండా అమ్మ కష్టాన్ని తగ్గించడానికి ఐశ్వర్య చేసిన ఆ మార్కెటింగ్ పనులే ఆమెను మానసికంగా ఎంతో దృఢంగా మార్చాయి.

అలా సూపర్ మార్కెట్ల ముందు నిలబడి చాక్లెట్లు అమ్మిన ఆ చిన్నారే.. నేడు తన అద్భుతమైన నటనతో సౌత్ ఇండియాలోనే బెస్ట్ యాక్ట్రెస్‌గా గుర్తింపు తెచ్చుకుంది. ప్రస్తుతం ఐశ్వర్య రాజేష్ ఇంట్లో కొలువై ఉన్న వందలాది అవార్డులు కేవలం ఆమె నటనకు వచ్చినవి కావు.. విధి ఎదురొచ్చినా లొంగకుండా పోరాడిన ఒక తల్లి కష్టానికి, చిన్న వయసులోనే శ్రమను నమ్ముకున్న ఒక కూతురి పట్టుదలకు దక్కిన గౌరవం!