Dhurandhar 2: రిలీజ్ రోజే ఆల్ టైమ్ రికార్డ్ క్రియేట్ చేసిన ‘ధురంధర్ 2’.. ఇది ఊచకోతే..

Dhurandhar 2: రణవీర్ సింగ్ నటించిన మోస్ట్ అవేటెడ్ స్పై థ్రిల్లర్ ‘ధురంధర్ 2’ (Dhurandhar: The Revenge) బాక్సాఫీస్ వద్ద సునామీ సృష్టిస్తోంది. ఈ చిత్రం కేవలం థియేటర్లలోనే కాకుండా, ఆన్‌లైన్ టికెట్ బుకింగ్ ప్లాట్‌ఫామ్ అయిన బుక్‌మైషో (BookMyShow)లో కళ్లు చెదిరే రికార్డులను తిరగరాస్తూ సరికొత్త చరిత్రను లిఖించింది. సినిమా విడుదలైన మొదటి రోజే భారతీయ చిత్ర పరిశ్రమలో అంతకుముందున్న అతిపెద్ద రికార్డులన్నీ ఈ సినిమా ధాటికి కొట్టుకుపోయాయి.

పుష్ప 2 రికార్డు బద్దలు

ఇప్పటివరకు బుక్‌మైషోలో ఒక గంటలో అత్యధిక టికెట్లు అమ్ముడైన చిత్రంగా ‘పుష్ప 2’ (107.65K) పేరిట ఉన్న రికార్డును ‘ధురంధర్ 2’ అధిగమించింది. ట్రేడ్ వర్గాల సమాచారం ప్రకారం, ధురంధర్ 2 పీక్ అవర్‌లో లక్షా పది వేలకు పైగా టికెట్లు విక్రయించి సెన్సేషన్ క్రియేట్ చేసింది. అడ్వాన్స్ బుకింగ్స్ ప్రారంభమైన క్షణం నుంచే ప్రేక్షకులు టికెట్ల కోసం పోటీ పడటంతో సర్వర్లు సైతం ఒత్తిడికి గురయ్యాయంటే ఈ సినిమాపై ఉన్న క్రేజ్ ఏంటో అర్థం చేసుకోవచ్చు. ప్రస్తుతం ధురంధర్ 2 సినిమా గంటకు 108 k టికెట్లు బుకై రికార్డ్ క్రియేట్ చేసింది.

అడ్వాన్స్ బుకింగ్స్‌లో ప్రభంజనం

కేవలం పీక్ అవర్ సేల్స్ మాత్రమే కాకుండా, మొత్తం అడ్వాన్స్ బుకింగ్స్ పరంగా కూడా ఈ చిత్రం రికార్డు స్థాయిలో నిలిచింది. ఇప్పటివరకు బుక్‌మైషోలో ఈ సినిమా సుమారు 2.41 మిలియన్ల (24 లక్షల పైచిలుకు) టికెట్లను విక్రయించింది. హిందీ చిత్ర పరిశ్రమలో 2 మిలియన్ మార్కును దాటిన తొలి చిత్రంగా రణవీర్ సింగ్ ఖాతాలో ఈ ఘనత చేరింది. సౌత్ సినిమాలైన పుష్ప 2, కూలీ వంటి భారీ చిత్రాల సరసన ఇప్పుడు ధురంధర్ 2 కూడా చేరిపోయింది.

బాక్సాఫీస్ వద్ద భారీ వసూళ్లు

ఆదిత్య ధర్ దర్శకత్వంలో తెరకెక్కిన ఈ చిత్రం మొదటి రోజే ప్రపంచవ్యాప్తంగా 150 కోట్ల నుంచి 200 కోట్ల రూపాయల గ్రాస్ వసూళ్లు సాధిస్తుందని ట్రేడ్ అనలిస్టులు అంచనా వేస్తున్నారు. మార్చి 18న జరిగిన పెయిడ్ ప్రీమియర్ల ద్వారానే ఈ సినిమా దాదాపు రూ.44 కోట్ల నెట్ వసూళ్లను రాబట్టి అందరినీ ఆశ్చర్యపరిచింది. భారీ యాక్షన్ సీక్వెన్సులు, రణవీర్ సింగ్ పవర్‌ఫుల్ పర్ఫార్మెన్స్ ప్రేక్షకులను థియేటర్లకు రప్పిస్తున్నాయి. మొదటి భాగం బాక్సాఫీస్ వద్ద 1300 కోట్లు వసూలు చేయగా, ఈ సీక్వెల్ అంతకు మించిన వసూళ్లను రాబట్టే దిశగా దూసుకుపోతోంది. సాంకేతిక కారణాల వల్ల కొన్ని చోట్ల ప్రీమియర్లు రద్దు అయినప్పటికీ, నేడు (మార్చి 19) విడుదలైన రెగ్యులర్ షోలకు అద్భుతమైన రెస్పాన్స్ వస్తోంది. ఈ ఏడాది బిగ్గెస్ట్ బ్లాక్ బస్టర్‌గా ధురంధర్ 2 నిలవడం ఖాయమని సినీ వర్గాలు స్పష్టం చేస్తున్నాయి.