‘పుష్ప 2’లో ఆ పాత్ర ఎందుకు మిస్సయిందంటే?.. అసలు విషయం చెప్పిన జగపతి బాబు!

Pushpa 3 Role: ఐకాన్ స్టార్ అల్లు అర్జున్, సుకుమార్ కాంబినేషన్‌లో వచ్చిన మోస్ట్ అవేటెడ్ సీక్వెల్ ‘పుష్ప 2’ బాక్సాఫీస్ వద్ద ఎలాంటి సంచలనాలు సృష్టిస్తోందో ప్రత్యేకంగా చెప్పక్కర్లేదు. అయితే, ఈ సినిమాలో సీనియర్ నటుడు జగపతి బాబు కూడా ఒక పవర్‌ఫుల్ పాత్ర చేస్తున్నట్లు సినిమా విడుదలకు ముందు గట్టి ప్రచారమే జరిగింది. స్వయంగా జగపతి బాబు కూడా ‘రంగస్థలం’ ప్రెసిడెంట్ పాత్రను మించేలా ఈ రోల్ ఉంటుందని హింట్స్ ఇచ్చారు. తీరా థియేటర్లలో చూస్తే ఆయన పాత్ర చాలా చిన్నదిగా డిజైన్ చేయడంతో ఆడియన్స్ కాస్త నిరాశకు గురయ్యారు. తాజాగా ఓ ఇంటర్వ్యూలో పాల్గొన్న జగపతి బాబు.. ‘పుష్ప 2’ లో తన పాత్రకు ఏం జరిగింది? సుకుమార్ తనకు ఎలాంటి ప్రామిస్ చేశారు? అనే విషయాలపై ఓపెన్ అయ్యారు.

లెంగ్త్ సమస్య వల్లే.. అంతా ‘పుష్ప 3’ లోనే!

‘పుష్ప 2’ లో తన క్యారెక్టర్ అనుకున్నంత రేంజ్‌లో లేకపోవడంపై జగపతి బాబు క్లారిటీ ఇచ్చారు. “దర్శకుడి క్రియేటివిటీ విషయంలో నేను ఎప్పుడూ వేలు పెట్టను. సుక్కు ఎప్పుడూ నాకు న్యాయమే చేశాడు. సినిమా చూశాక తనే స్వయంగా నా దగ్గరకు వచ్చి.. ‘సార్ అనుకున్నది అవ్వలేదు, నెక్స్ట్ పార్ట్‌లో కాంపెన్సేట్ చేస్తాను’ అని చెప్పాడు. నిజానికి పార్ట్ 2, పార్ట్ 3 రెండింటిలోనూ ఉండాల్సిన క్యారెక్టర్ నాది. కానీ లెంగ్త్ ఎక్కువైపోవడంతో పార్ట్ 2 లో నా పాత్రను తగ్గించి, ఆ కథను ‘పుష్ప 3’ కి పోస్ట్‌పోన్ చేశారు. ‘పుష్ప 3’ లో నా క్యారెక్టర్ ఖచ్చితంగా ఉంటుంది” అని జగపతి బాబు స్పష్టం చేశారు.

నేను ‘డైరెక్టర్స్ యాక్టర్’..

తాను పాత్రల కోసం ఎలాంటి హోంవర్క్ చేయనని, కేవలం డైరెక్టర్ విజన్‌ను నమ్మి కెమెరా ముందుకు వెళ్తానని జగపతి బాబు చెప్పారు. తన కెరీర్‌లో మైల్‌స్టోన్‌గా నిలిచిన ‘అంతఃపురం’ సినిమాలో ఎంట్రీ సీన్ అంతలా క్లిక్ అవ్వడానికి వంశీ రాసుకున్న స్క్రీన్ ప్లే టైమింగే కారణమన్నారు.

ఇదే క్రమంలో రామ్ గోపాల్ వర్మ దర్శకత్వంలో వచ్చిన ‘గాయం’ సినిమా షూటింగ్ రోజులను ఆయన గుర్తు చేసుకున్నారు. “ఆ సమయంలో నాకు జాండీస్ (కామెర్లు) వచ్చి లేవలేని పరిస్థితిలో ఉన్నాను. కానీ షూటింగ్ పూర్తి చేయాలి. నా పరిస్థితి చూసి ఆర్జీవీ చాలా తెలివిగా మైండ్ గేమ్ ఆడాడు. ‘నువ్వు చేయలేవు జగపతి.. క్యారెక్టర్ మార్చేస్తాను, నువ్వు రెస్ట్ తీసుకో’ అని నా ఒళ్లు మండేలా చేశాడు. దాంతో నాకు కోపమొచ్చి, రోగాన్ని కూడా మర్చిపోయి సీన్లలో విలన్‌పై విరుచుకుపడ్డాను. నేను వేరే మూడ్‌లో ఉంటే వర్మ కట్ చెప్పకుండా షాట్ తీసేశాడు. అదీ ఆర్జీవీ స్టైల్” అంటూ అప్పటి విషయాలను పంచుకున్నారు.

జీవితంలో అప్స్ అండ్ డౌన్స్ సహజం..

తన కెరీర్ గ్రాఫ్ గురించి మాట్లాడుతూ.. “నా జీవితంలో ప్రతిదీ లేట్‌గానే వస్తుంది. అది నా జాతకం లేదా డెస్టినీ అనుకోవచ్చు. 2011 నుండి 2013 మధ్య కాలంలో నేను అనుభవించిన రెండేళ్ల కష్టానికి, పెయిన్‌కు తగ్గ ప్రతిఫలమే ఇప్పుడు దక్కుతోంది. నా టైమ్ మళ్లీ మొదలైందని నమ్ముతున్నాను. లైఫ్‌లో అప్స్ అండ్ డౌన్స్ అందరికీ చాలా కామన్. సచిన్ అయినా, బుమ్రా అయినా ఒకరోజు సెంచరీ కొడితే.. మరోరోజు జీరోకు అవుట్ అవ్వచ్చు. దేన్నైనా ఈజీగా తీసుకోవడమే నా ఫిలాసఫీ” అని జగపతి బాబు చెప్పుకొచ్చారు. జగపతి బాబు ఇచ్చిన ఈ క్లారిటీతో, ‘పుష్ప 2’ లో ఆయన క్యారెక్టర్ నిడివి తగ్గడానికి గల కారణం అభిమానులకు అర్ధమైంది. మరి ‘పుష్ప 3’ లో సుకుమార్ ఈ సీనియర్ నటుడిని ఏ రేంజ్‌లో చూపిస్తారో చూడాలి!