KV Anudeep: ‘ఫంకీ’ అనే టైటిల్ అందుకే పెట్టా.. లాజిక్ లేకుండా కామెడీ ఉండదు

KV Anudeep: కెవి అనుదీప్ ఈ పేరు టాలీవుడ్ ప్రేక్షకులందరికీ పరిచయమే. ‘జాతిరత్నాలు’ చిత్రంతో హాస్య చిత్రాలలో కొత్త పంథాను సృష్టించిన దర్శకుడు కె.వి. అనుదీప్. ఇప్పుడో మరోసారి అలాంటి మ్యాజిక్ చేసేందుకు ‘ఫంకీ’ (Funky)తో రాబోతున్నారు. టైటిల్‌తోనే మంచి ఆసక్తిని కనబరిచిన అనుదీప్.. ఈ సినిమాతో మరోసారి థియేటర్లలో నవ్వుల వర్షం కురిపించడానికి వస్తున్నాడనేలా ప్రమోషనల్ కంటెంట్‌తో మెప్పించాడు. మాస్ కా దాస్ విశ్వక్ సేన్ (Vishwak Sen) హీరోగా నటిస్తున్న ఈ సినిమాలో హాట్ బ్యూటీ కయాదు లోహర్‌ (Kayaadu Lohar) హీరోయిన్‌గా నటిస్తుంది. శ్రీకర స్టూడియోస్ సమర్పణలో సితార ఎంటర్‌టైన్‌మెంట్స్, ఫార్చూన్ ఫోర్ సినిమాస్ పతాకాలపై సూర్యదేవర నాగవంశీ, సాయి సౌజన్య ఈ చిత్రాన్ని నిర్మిస్తున్నారు. భీమ్స్ సిసిరోలియో సంగీతం అందిస్తున్నారు. ఈ సినిమా ప్రేమికుల దినోత్సవం కానుకగా ఒకరోజు ముందుగా ఫిబ్రవరి 13న విడుదలకాబోతోంది. ఈ క్రమంలో మేకర్స్ ప్రమోషన్స్ జోరు పెంచారు. అందులో భాగంగా కెవి అనుదీప్ (KV Anudeep) మీడియాకు చిత్ర విశేషాలను తెలిపారు. అందులో ఈ సినిమాకు ‘ఫంకీ’ అనే పేరు పెట్టడానికి గల కారణాన్ని తెలిపారు.

Also Read- Tollywood: మరో కొరియోగ్రాఫర్ దర్శకుడిగా.. ఎవరో తెలుసా?

కామెడీ టైమింగ్ బాగా నచ్చింది

‘‘ఈ సినిమాకు ‘ఫంకీ’ అనే టైటిల్ పెట్టడానికి పెద్ద కారణం ఏం లేదు. టైటిల్ వినడానికి చాలా క్యాచీగా ఉంది. అలాగే ఈ తరం అభిరుచులకు తగ్గట్టుగా ఉంటుందని ఈ టైటిల్‌ను ఎంచుకున్నాం. అంతేకాదు, హీరో పాత్రకు కూడా ఈ టైటిల్ కరెక్ట్‌గా సరిపోతుంది. రేపు సినిమా చూసిన తర్వాత ప్రతి ఒక్కరూ కచ్చితంగా పర్ఫెక్ట్ టైటిల్ అనే అంటారు. విశ్వక్ సేన్ ఇందులో ఒక సినిమా దర్శకుడి పాత్రలో కనిపిస్తారు. ఈ పాత్రను రాసుకున్నప్పుడే విశ్వక్ అయితే బాగుంటాడని అనిపించింది. ‘ఈ నగరానికి ఏమైంది’ సినిమా చూశాను.. అందులో ఆయన కామెడీ టైమింగ్ నాకు బాగా నచ్చింది. అందుకే నేను కథని ఆయన కోణంలోనే రాసుకున్నాను.

Also Read- Film Distribution: అన్నపూర్ణ ఎంట్రీ వెనుక దిల్ రాజు వ్యూహమిదేనా? వారికి చెక్ పెట్టేందుకేనా?

లాజిక్ ఉంటుంది

‘జాతిరత్నాలు’తో పోలిస్తే ‘ఫంకీ’ చిత్రం చాలా కొత్తగా ఉంటుంది. ఇది అవుట్ అండ్ అవుట్ రొమాంటిక్ కామెడీ, ఫ్యామిలీ ఎంటర్‌టైనర్. ఇందులో దర్శకుల జీవితాల్లో జరిగే కొన్ని సంఘటనలను సాధారణ ప్రేక్షకులకు కూడా అర్థమయ్యేలా చాలా సరదాగా చూపించాను. అలాగే ప్రేమ కథతో పాటు కుటుంబానికి సంబంధించిన మంచి భావోద్వేగ సన్నివేశాలు ఇందులో ఉంటాయి. నిజ జీవితంలో కూడా ఆడియెన్స్‌కు బాగా కనెక్ట్ అయ్యే సీన్స్ ఉంటాయి. అన్ని వర్గాల ప్రేక్షకులు మెచ్చేలా ఈ సినిమా ఉంటుంది. ఈ సినిమాలో ప్రతి సన్నివేశానికి ఖచ్చితంగా లాజిక్ ఉంటుంది. నా సినిమాల్లో కామెడీ ఎక్కువగా ఉంటుంది కాబట్టి, లాజిక్ ఉండదని అందరికీ అనిపిస్తుంది. కానీ అన్ని సినిమాల్లో లాజిక్ ఉంటుంది. లాజిక్ లేకుండా కామెడీ ఉండదు. ఇందులో నేను కూడా అతిథి పాత్రలో కనిపిస్తాను. నాకు నటుడిగా కంటే దర్శకుడిగా సినిమాలు చేయడమే ఆసక్తి. ప్రస్తుతం మూడు సినిమాలకు కమిటయ్యాను. విక్టరీ వెంకటేష్‌తో ఒక సినిమా ఉంటుంది’’ అని కెవి అనుదీప్ చెప్పుకొచ్చారు.

Also Read- Brahmanandam: ఐశ్వర్య అర్జున్ పుట్టినరోజు .. సర్ప్రైజ్ గిఫ్ట్ ఇచ్చిన బ్రహ్మానందం!