‘ధురంధర్ 2’లో ‘ఓయే ఓయే’ పాటపై వివాదం.. ఏంటి బాసూ అలా చేశారు..

Song Controversy: బాక్సాఫీస్ వద్ద రికార్డు వసూళ్లతో దూసుకుపోతున్న రణవీర్ సింగ్ నటించిన ‘ధురంధర్ 2: ద రివెంజ్’ (Dhurandhar 2: The Revenge) చిత్రం చట్టపరమైన చిక్కుల్లో చిక్కుకుంది. చిత్రంలోని ఒక ప్రసిద్ధ పాటను అనుమతి లేకుండా వాడారంటూ ‘త్రిమూర్తి ఫిల్మ్స్’ నిర్మాణ సంస్థ న్యాయపోరాటానికి దిగింది.

వివాదం ఏమిటి?

1989లో విడుదలైన బ్లాక్‌బస్టర్ సినిమా ‘త్రిదేవ్’ లోని అత్యంత ప్రజాదరణ పొందిన “రంగ్ దే లాల్” (ఓయే ఓయే) పాట హక్కులే ఇప్పుడు ఈ వివాదానికి కేంద్రబిందువు. ఈ పాట ఒరిజినల్ వెర్షన్‌ను కానీ, లేదా దానికి సమానంగా ఉండే వెర్షన్‌ను కానీ తమ అనుమతి లేకుండా ‘ధురంధర్ 2’ మేకర్స్ వాడారని త్రిమూర్తి ఫిల్మ్స్ ఆరోపించింది.

న్యాయస్థానంలో పిటిషన్

దర్శకుడు ఆదిత్య ధర్ నేతృత్వంలోని ‘B62 స్టూడియోస్’ పై త్రిమూర్తి ఫిల్మ్స్ కోర్టులో దావా వేసింది. పాట మ్యూజికల్ వర్క్, సౌండ్ రికార్డింగ్ హక్కులు తమ వద్దే ఉన్నాయని, సినిమా మేకర్స్ నిబంధనలను అతిక్రమించారని పేర్కొన్నారు. థియేటర్లలో, ఓటీటీ ప్లాట్‌ఫామ్‌లలో ప్రచార చిత్రాలలో ఈ పాటను వాడకుండా తక్షణమే నిలిపివేయాలని కోరారు. అనుమతి లేకుండా పాటను వాణిజ్యపరంగా వాడుకున్నందుకు భారీ నష్టపరిహారం చెల్లించాలని డిమాండ్ చేశారు.

రికార్డు వసూళ్ల మధ్య

ఆదిత్య ధర్ దర్శకత్వంలో జియో స్టూడియోస్, B62 స్టూడియోస్ సంయుక్తంగా నిర్మించిన ఈ స్పై యాక్షన్ థ్రిల్లర్, ప్రస్తుతం భారత బాక్సాఫీస్ వద్ద రూ. 1000 కోట్ల క్లబ్‌లో చేరి సంచలనం సృష్టిస్తోంది. ఈ సినిమాలో రణవీర్ సింగ్‌తో పాటు సంజయ్ దత్, ఆర్. మాధవన్, అర్జున్ రాంపాల్ వంటి భారీ తారాగణం ఉంది. సినిమా ఇంతటి ఘనవిజయం సాధించిన సమయంలో ఈ లీగల్ నోటీసులు రావడం బాలీవుడ్ వర్గాల్లో చర్చనీయాంశమైంది.

పాట నేపథ్యం

‘ఓయే ఓయే’ పాటను కళ్యాణ్ జీ – ఆనంద్ జీ విజు షా స్వరపరచగా, ఆనంద్ బక్షి సాహిత్యం అందించారు. అమిత్ కుమార్, సప్నా ముఖర్జీ పాడిన ఈ పాట అప్పట్లో ఒక ఊపు ఊపింది. ఇప్పుడు అదే పాట ‘ధురంధర్ 2’ చిత్రంలో కీలక సందర్భంలో వినిపిస్తుంది. ప్రస్తుతం ఈ కేసు కోర్టు పరిధిలో ఉంది. చిత్ర యూనిట్ దీనిపై ఎలా స్పందిస్తుందో సినిమా ప్రదర్శనపై దీని ప్రభావం ఎంతవరకు ఉంటుందో వేచి చూడాలి.