‘పెద్ది’ వివాదంపై సోనా మోహపాత్ర సంచలన వ్యాఖ్యలు..

Peddi Controversy: తెలుగు చలనచిత్ర పరిశ్రమలో రాబోతున్న ‘పెద్ది’ సినిమాలో హీరోయిన్ జాన్వీ కపూర్ పాత్రను చూపించిన విధానంపై, దాని చుట్టూ ముసురుకున్న వివాదంపై ప్రముఖ బాలీవుడ్ సింగర్ సోనా మోహపాత్ర తీవ్రస్థాయిలో స్పందించారు. మన ప్రధాన స్రవంతి (మెయిన్‌స్ట్రీమ్) సినిమాల్లో మహిళలను కేవలం ఒక గ్లామర్ వస్తువులా, అలంకారప్రాయమైన బొమ్మలుగా మార్చేస్తున్నారని ఆమె విమర్శించారు. తన నిక్కచ్చిగా మాట్లాడే తత్వానికి పేరుగాంచిన సోనా, ఇటీవల సోషల్ మీడియా వేదికగా ఒక సుదీర్ఘ వీడియోను పంచుకున్నారు. అందులో ఆమె ‘పెద్ది’ సినిమా పోస్టర్లు, అందులో హీరోయిన్ పాత్ర చిత్రీకరణపై నెటిజన్లు, ప్రేక్షకుల నుండి వ్యక్తమవుతున్న నిరసనలపై హర్షం వ్యక్తం చేశారు. సమాజంలో సినిమా చూసే కోణంలో ఒక పెను మార్పు వస్తోందని చెప్పడానికి ఈ తిరుగుబాటే ఒక నిదర్శనమని ఆమె అభిప్రాయపడ్డారు.

“ఎంతో ఆర్భాటంగా ప్రమోట్ చేయబడుతున్న ఒక పెద్ద కమర్షియల్ సినిమాలో హీరోయిన్‌ను కేవలం అంగాంగ ప్రదర్శనకే పరిమితం చేయడంపై ప్రేక్షకులు తిరగబడటం శుభపరిణామం. ప్రజల నుండి వచ్చిన ఈ బలమైన వ్యతిరేకత వల్లే, సదరు చిత్ర దర్శకుడు బుచ్చిబాబు సానా, చిత్ర బృందం ఇంటర్వ్యూలలో వివరణలు ఇచ్చుకోవాల్సి వస్తోంది. ఆ పాత్ర చాలా అమాయకమైనదని సమర్థించుకుంటూ, కొన్ని వివాదాస్పద సీన్లను తొలగిస్తామని ప్రకటిస్తున్నారు” అని ఆమె పేర్కొన్నారు. కమర్షియల్ సినిమాల స్క్రిప్ట్ డిజైన్‌ను ఎండగడుతూ, “నేను ఈ సినిమాను చూడలేదు, చూసే ప్లాన్ కూడా లేదు.

కానీ మన దేశంలో ఇలాంటి సినిమాల టెంప్లేట్ ఏంటో అందరికీ తెలుసు. సినిమాలో హీరో ఎప్పుడూ ఎంతో ఘనంగా జీవిస్తాడు. హీరోయిన్ పాత్ర కేవలం ఆ కథను సాగదీయడానికి ఒక అలంకారం మాత్రమే. ఆమెను కేవలం సెక్సువలైజ్ చేయడానికి, ఒక వస్తువులా చూపించడానికే ఈ సినిమాల్లో ప్రాధాన్యత ఇస్తారు. పురుషాధిక్యతను, మహిళల పట్ల దురుసుగా ప్రవర్తించడాన్ని ‘రొమాన్స్’ అని పిలుస్తారు” అని సోనా ఆవేదన వ్యక్తం చేశారు. చివరగా, ‘పెద్ది’ సినిమా వివాదం వల్ల మేకర్స్ క్షమాపణలు చెప్పే పరిస్థితి రావడం ఒక మంచి మార్పునకు నాంది అని, భవిష్యత్తులో మన సినిమాల్లో మహిళలకు మంచి ప్రాధాన్యత ఉన్న పాత్రలు లభిస్తాయని ఆశిస్తున్నట్లు సోనా మోహపాత్ర ముగించారు.