ఢిల్లీ ఎయిర్‌పోర్ట్‌లో విమానాల ఢీ.. హైదరాబాద్ రావాల్సిన ఆకాశ ఎయిర్‌కు తప్పిన ప్రమాదం

Delhi Airport flight collision: దేశ రాజధాని ఢిల్లీలోని ఇందిరా గాంధీ అంతర్జాతీయ విమానాశ్రయం (IGI)లో గురువారం ఒక భారీ విమాన ప్రమాదం తృటిలో తప్పింది. ఆకాశ ఎయిర్ (Akasa Air), స్పైస్ జెట్ (SpiceJet) విమానాలు రన్‌వే సమీపంలో ఒకదానికొకటి ఢీకొన్నాయి. అయితే అదృష్టవశాత్తూ ఎవరికీ ఎటువంటి గాయాలు కాలేదు. ఈ ఘటనతో ప్రయాణికులు ఒక్కసారిగా భయాందోళనలకు గురయ్యారు.

ఢిల్లీ నుంచి హైదరాబాద్‌కు బయలుదేరడానికి సిద్ధంగా ఉన్న ఆకాశ ఎయిర్ విమానం (QP 1406) పార్కింగ్ బేలో నిలిపి ఉంచబడింది. అదే సమయంలో వెనక్కి వస్తున్న స్పైస్ జెట్ విమానం తోక భాగం, ఆగి ఉన్న ఆకాశ విమానాన్ని బలంగా ఢీకొట్టింది. ఈ తాకిడికి రెండు విమానాల రెక్కలు, వెనుక భాగాలు స్వల్పంగా దెబ్బతిన్నాయి. విమానం టేకాఫ్ కావడానికి ముందే ఈ ఘటన జరగడంతో పెద్ద ప్రమాదం తప్పిందని అధికారులు భావిస్తున్నారు.

ప్రమాదం జరిగిన వెంటనే అప్రమత్తమైన ఎయిర్‌పోర్ట్ సిబ్బంది, ఆకాశ ఎయిర్ విమానంలో ఉన్న ప్రయాణికులందరినీ అత్యవసరంగా కిందకు దించేశారు. వారిని సురక్షితంగా ఎయిర్‌పోర్ట్ టెర్మినల్‌కు తరలించి, ప్రత్యామ్నాయ విమాన ఏర్పాట్లు చేశారు. ఈ ఘటనపై డైరెక్టరేట్ జనరల్ ఆఫ్ సివిల్ ఏవియేషన్ (DGCA) అప్ర‌మ‌త్తం అయింది. గ్రౌండ్ స్టాఫ్ లేదా పైలట్ల నిర్లక్ష్యం వల్ల ఇది జరిగిందా అనే కోణంలో ఉన్నత స్థాయి విచారణకు ఆదేశించింది. సాంకేతిక లోపమా లేక సిగ్నలింగ్ వ్యవస్థలో లోపమా అనేది విచారణలో తేలాల్సి ఉంది. ప్రస్తుతం రెండు విమానాలను మరమ్మతుల కోసం హ్యాంగర్‌కు తరలించారు.