Surat man falls from 10th floor: మృత్యువుతో పోరాడి గెలిచాడు.. 10వ అంతస్తు నుంచి జారిపడినా ప్రాణాలతో బయటపడ్డ వైనం

Surat man falls from 10th floor : విధి రాత బాగుంటే మృత్యువు కూడా ఓడిపోతుంది అనడానికి ఈ ఘటనే ప్రత్యక్ష నిదర్శనం. గుజరాత్‌లోని సూరత్‌లో ఒక వ్యక్తి ఏకంగా 10వ అంతస్తు నుంచి ప్రమాదవశాత్తు జారిపడినా, అదృష్టవశాత్తు ప్రాణాలతో బయటపడ్డారు. సినిమా రేంజ్ లో జరిగిన ఈ ఘటన స్థానికంగా సంచలనం సృష్టించింది.

సూరత్‌కు చెందిన 57 ఏళ్ల నితిన్‌ అదియా ఓ ఎత్తైన అపార్ట్‌మెంట్‌లో 10వ అంతస్తులో నివసిస్తున్నారు. ఎప్పటిలాగే ఆయన తన ఫ్లాట్‌లోని కిటీకీ పక్కన నిద్రిస్తున్నారు. అయితే, నిద్ర మత్తులో ఆయన కిటికీ వైపు దొర్లడంతో ప్రమాదవశాత్తు కిందకు జారిపోయారు. 10వ అంతస్తు నుండి ఒక్కసారిగా కిందకు పడిపోతున్న సమయంలో, అనూహ్యంగా 8వ అంతస్తులోని కిటికీ గ్రిల్స్‌లో ఆయన కాలు బలంగా ఇరుక్కుపోయింది.

దీంతో ఆయన 8వ అంతస్తు గ్రిల్స్‌కు తలకిందులుగా వేలాడుతూ ఉండిపోయారు. ప్రాణభయంతో ఆయన చేసిన ఆర్తనాదాలు విన్న స్థానికులు, అపార్ట్‌మెంట్ వాసులు వెంటనే అప్రమత్తమై అగ్నిమాపక సిబ్బందికి సమాచారం అందించారు. ఘటనా స్థలానికి చేరుకున్న ఫైర్ సిబ్బంది హైడ్రాలిక్ క్రేన్ సాయంతో అత్యంత శ్రమించి ఆయన్ను రక్షించారు. గ్రిల్స్ మధ్య ఇరుక్కున్న కాలును జాగ్రత్తగా వెలికితీసి, ఆయన్ను క్షేమంగా కిందకు దించారు.

ఈ ప్రమాదంలో నితిన్ కాలుకు, శరీరానికి స్వల్ప గాయాలయ్యాయి. వెంటనే ఆయన్ను చికిత్స నిమిత్తం సమీప ఆసుపత్రికి తరలించారు. ప్రస్తుతం ఆయన ఆరోగ్యం నిలకడగా ఉన్నట్లు వైద్యులు తెలిపారు. 10వ అంతస్తు నుంచి పడినా, కేవలం కాలు ఇరుక్కోవడం వల్ల ఆయన బతికిపోవడం నిజంగా అద్భుతమని, ఆయన మృత్యుంజయుడని స్థానికులు చర్చించుకుంటున్నారు. అగ్నిమాపక సిబ్బంది సమయస్ఫూర్తిని అందరూ కొనియాడారు. ఎత్తైన భవనాల్లో నివసించేవారు కిటికీల విషయంలో జాగ్రత్తగా ఉండాలని, ముఖ్యంగా నిద్రించేటప్పుడు కిటికీలకు దూరంగా ఉండాలని అధికారులు సూచిస్తున్నారు.