Vehicle fitness test fees: పాత వాహన యజమానులకు కేంద్ర ప్రభుత్వం గట్టి షాక్ ఇచ్చింది. దేశవ్యాప్తంగా వాహనాల ఫిట్నెస్ పరీక్ష ఫీజులను భారీగా పెంచుతూ కేంద్ర రోడ్డు రవాణా, రహదారుల మంత్రిత్వ శాఖ (MoRTH) సంచలన నిర్ణయం తీసుకుంది. కొన్ని కేటగిరీలలో ఈ పెంపు పది రెట్ల వరకు ఉండటం గమనార్హం. కేంద్ర మోటారు వాహన నియమాల (ఐదవ సవరణ) కింద చేసిన ఈ మార్పులు తక్షణమే అమల్లోకి వస్తాయని మంత్రిత్వ శాఖ ప్రకటించింది. రోడ్ల పైనుంచి పాత, అసురక్షిత వాహనాలను తొలగించడమే లక్ష్యంగా ఈ కఠిన నిర్ణయం తీసుకున్నట్లు తెలుస్తోంది.
ఈ సవరణలలో అత్యంత ముఖ్యమైన మార్పు వయో పరిమితిని తగ్గించడం. గతంలో 15 ఏళ్లు దాటిన వాహనాలకు అధిక ఫీజులు వర్తింపజేయగా, ఇప్పుడు ఆ పరిమితిని 10 సంవత్సరాలకు తగ్గించారు. అంతేకాకుండా, వాహనాల వయసు ఆధారంగా మూడు కొత్త వర్గాలను ప్రవేశపెట్టారు: 10-15 ఏళ్లు, 15-20 ఏళ్లు, 20 ఏళ్లకు పైబడిన వాహనాలు. వయసు పెరిగే కొద్దీ ఫీజుల భారం కూడా గణనీయంగా పెరుగుతుంది. ఈ నిబంధనలు ద్విచక్ర వాహనాలు, ఆటోలు, కార్లు (LMV), మధ్యస్థ, భారీ వాణిజ్య వాహనాలు సహా అన్ని కేటగిరీలకు వర్తిస్తాయి.
ఫీజుల పెంపు ప్రభావం ముఖ్యంగా వాణిజ్య వాహనాలపై తీవ్రంగా ఉంది. 20 ఏళ్లు దాటిన భారీ వాణిజ్య వాహనాలకు (ట్రక్కులు, బస్సులు) ఫిట్నెస్ పరీక్ష ఫీజును గతంలోని రూ. 2,500 నుంచి ఏకంగా రూ. 25,000కి పెంచారు. అదేవిధంగా, 20 ఏళ్లు దాటిన మీడియం కమర్షియల్ వాహనాలకు ఫీజు రూ. 1,800 నుంచి రూ. 20,000కి పెరిగింది. ప్రైవేట్ వాహనాల విషయంలోనూ భారం తప్పలేదు. 20 ఏళ్లు పైబడిన తేలికపాటి మోటారు వాహనాలకు (కార్లు) ఫీజును రూ. 15,000గా, 20 ఏళ్లు దాటిన త్రిచక్ర వాహనాలకు రూ. 7,000గా నిర్ణయించారు. 20 ఏళ్లు దాటిన ద్విచక్ర వాహనాల ఫీజు రూ. 600 నుంచి రూ. 2,000కి పెరిగింది.
15 సంవత్సరాల లోపు వాహనాలకు కూడా ఫీజులు పెరిగాయి. కొత్త రూల్ 81 ప్రకారం, ఫిట్నెస్ సర్టిఫికేషన్ కోసం మోటార్సైకిల్కు రూ. 400, తేలికపాటి మోటారు వాహనాలకు (కార్లు) రూ. 600, మధ్యస్థ, భారీ వాణిజ్య వాహనాలకు రూ. 1,000 చొప్పున వసూలు చేయనున్నారు.
Read Also: Free Domestic Flights: పర్యాటకులకు విమానాల్లో ప్రయాణం ఉచితం.. థాయ్లాండ్ అదిరిపోయే ఆఫర్!
Share
Coconut Water: ప్రతి తల్లికీ ఉండే సందేహం.. ఆ వయసు పిల్లలకు కొబ్బరినీళ్లు ఇవ్వడం కరెక్టేనా?
Priyanka Chopra: మహేష్, పృథ్వీరాజ్ తో సెల్ఫీ.. ‘వారణాసి‘ గురించి ఆసక్తికర అప్డేట్ ఇచ్చిన ప్రియాంక
