Crime Drama Series: 25 ఏళ్లు జైలులో మగ్గి బయటకు వచ్చిన ఓ మాఫియా డాన్‌… పాత గ్యాంగ్‌ తనను పక్కన పెట్టడంతో కొత్త నగరంలోనే మరో సామ్రాజ్యాన్ని నిర్మించుకుంటాడు. డబ్బు, అధికారం, పలుకుబడి అన్నీ సంపాదిస్తాడు. కానీ ఎంత ఎదిగినా శత్రువులు మాత్రం తగ్గరు. ఓవైపు తన సామ్రాజ్యాన్ని కూల్చేయాలని చూసే ప్రత్యర్థులు, మరోవైపు అతడి వ్యాపారాన్ని తమ గుప్పిట్లో పెట్టుకోవాలని చూసే రాజకీయ నాయకులు. ఇలాంటి పరిస్థితుల్లో తన వాళ్లను కాపాడుకుంటూ శత్రువుల ఆట కట్టించాలంటే ఆ డాన్‌ ఎంతకైనా తెగించాల్సిందే. తనదైన స్టైల్‌, పదునైన వ్యూహాలతో మరోసారి ప్రత్యర్థులపై విరుచుకుపడుతున్న డ్వైట్‌ మాన్‌ఫ్రెడి కథే ‘తుల్సా కింగ్‌ సీజన్‌ 4’ (Tulsa King Season 4). మరి ఈ సిరీస్ స్ట్రీమింగ్ ఎక్కడంటే ?
డ్వైట్‌ ది జనరల్‌ మాన్‌ఫ్రెడి అంటే న్యూయార్క్‌ మాఫియాలో ఒకప్పుడు తిరుగులేని పేరు. కానీ 25 ఏళ్ల జైలు జీవితం అతడి స్థానాన్ని పూర్తిగా మార్చేస్తుంది. బయటకు వచ్చిన తర్వాత తన పాత గ్యాంగ్‌ తనను గౌరవంగా చూసుకుంటుందని ఆశిస్తాడు. కానీ అక్కడ అతడికి ఎదురయ్యేది అవమానం. న్యూయార్క్‌లో ఉండనివ్వకుండా ఓక్లహోమాలోని తుల్సాకు పంపించేస్తారు. తన వాళ్లే తనను పక్కన పెట్టడం డ్వైట్‌ను తీవ్రంగా కలచివేస్తుంది. అయితే ఓటమిని అంగీకరించడం అతడి నైజం కాదు. తనను వద్దనుకున్న వాళ్లకు తన సత్తా ఏంటో చూపించాలని నిర్ణయించుకుంటాడు.
తుల్సాలో అడుగు పెట్టిన డ్వైట్‌ దగ్గర పెద్దగా పరిచయాలు ఉండవు. అండగా నిలిచే గ్యాంగ్‌ ఉండదు. అయినా తన తెలివితేటలతో స్థానికంగా కొందరిని తనవైపు తిప్పుకుంటాడు. బోధి, టైసన్‌, మిచ్‌ వంటి వ్యక్తులతో కలిసి చిన్నచిన్న వ్యాపారాల నుంచి తన కార్యకలాపాలను విస్తరిస్తాడు. అతడికి డబ్బు సంపాదించడం మాత్రమే లక్ష్యం కాదు. తనను తక్కువ అంచనా వేసిన ప్రపంచానికి తన విలువ ఏంటో నిరూపించుకోవాలి. అలా మొదలైన ప్రయాణం క్రమంగా తుల్సాలో ఓ బలమైన సామ్రాజ్యానికి పునాది వేస్తుంది.
అయితే డ్వైట్‌ ఎదుగుతున్న కొద్దీ ప్రమాదాలు కూడా పెరుగుతాయి. తన వ్యాపారాన్ని దెబ్బతీయాలని చూసే ప్రత్యర్థులు, అతడి బలాన్ని తమకు అనుకూలంగా మార్చుకోవాలని ప్రయత్నించే వ్యక్తులు ఒక్కొక్కరుగా రంగంలోకి దిగుతారు. బయటకు నవ్వుతూ పలకరించే వాళ్లలో ఎవరు నిజమైన మిత్రులో, ఎవరు వెన్నుపోటు పొడిచే శత్రువులో గుర్తించడం కష్టమవుతుంది. ఒక చిన్న పొరపాటు చేసినా ఇన్నాళ్లు కష్టపడి నిర్మించుకున్న సామ్రాజ్యం కుప్పకూలిపోయే ప్రమాదం ఎదురవుతుంది.
నాలుగో సీజన్‌లో డ్వైట్‌కు అసలైన పరీక్ష ఎదురవుతుంది. వ్యక్తిగత జీవితంలో ఎదురయ్యే నష్టాలు ఒకవైపు, సామ్రాజ్యాన్ని కూల్చేయాలని చూసే శత్రువులు మరోవైపు అతడిని ఉక్కిరిబిక్కిరి చేస్తారు. ఇలాంటి సమయంలో ఎవరిని నమ్మాలి ? ఎవరిని వదులుకోవాలి ? తన వాళ్లను రక్షించుకోవడానికి ఎంత దూరం వెళతాడు ? తన అనుభవం, ధైర్యం, క్రూరమైన నిర్ణయాలతో దీని నుంచి హీరో బయటపడతాడా? లేక తానే నిర్మించుకున్న సామ్రాజ్యం అతడి చేతుల్లోంచి జారిపోతుందా? అన్నదే ఈ సీజన్‌లో ఉత్కంఠను పెంచే అంశం.
‘తుల్సా కింగ్‌ సీజన్‌ 4’ (Tulsa King Season 4) JIo Hotstarతో పాటు Amazon Prime videoలో కూడా స్ట్రీమింగ్ అవుతోంది. ఇందులో సిల్వెస్టర్‌ స్టాలోన్‌ (Sylvester Stallone) ప్రధాన పాత్రలో నటించిన ఈ సిరీస్‌లో మార్టిన్‌ స్టార్‌ (Martin Starr), జే విల్‌ (Jay Will), విన్సెంట్‌ పియాజ్జా (Vincent Piazza), ఫ్రాంక్‌ గ్రిల్లో (Frank Grillo) తదితరులు కీలక పాత్రల్లో కనిపిస్తారు. మాఫియా ప్రపంచంలోని ఎత్తుగడలు, ఊహించని ద్రోహాలు, అధికార పోరాటాలు, డ్వైట్‌ మార్క్‌ కామెడీతో సాగే ఈ క్రైమ్ డ్రామాను సిరీస్ అభిమానులు అస్సలు మిస్ అవ్వొద్దు.
Share
మాజీ సీఎం కోసం.. 9 హత్యలు చేశా.. లైవ్‌లో ఒప్పుకున్న ఎమ్మెల్యే!
సాలూరు జనసేనలో భగ్గుమన్న చైర్మన్ టికెట్ వివాదం.. కేడర్ తీవ్ర ఆగ్రహం!
