Feel Good Drama: ప్రేమ కోసం ప్లాన్ చేసిన ఓ ట్రిప్… పెళ్లి ప్రపోజల్ కు సిద్ధమవుతున్న ప్రియుడు… కానీ ఆ ప్రపోజల్ను తప్పించుకోవాలని చూస్తున్న ప్రేయసి. ఇంతలో అనుకోకుండా విమాన సర్వీసులన్నీ ఆగిపోతే ? ఇంటికి తిరిగి వెళ్లే దారి మూసుకుపోయిన సమయంలో, గతంలో తనకు ఎంతో దగ్గరైన ఓ వ్యక్తిని కలిస్తే ? అప్పటి వరకు తనలోనే దాచుకున్న భావాలు మళ్లీ బయటకు వస్తే ? తన జీవితంలో అసలు ఏం కావాలో ఓ యువతి తెలుసుకునే ప్రయాణమే ‘ఎరుప్సియా’ (Erupcja).మరి ఈ ఫీల్ గుడ్ డ్రామాను ఏ ఓటీటీలో చూడవచ్చు ? అన్నది తెలుసుకుందాం పదండి.
బ్రిటిష్ పర్యాటకురాలు బెథానీ తన ప్రియుడు రాబ్తో కలిసి పోలాండ్ రాజధాని వార్సాకు రొమాంటిక్ వెకేషన్ కోసం వస్తుంది. రాబ్కు మాత్రం ఈ ట్రిప్ చాలా ప్రత్యేకం. బెథానీకి ప్రపోజ్ చేసి, ఆమెను పెళ్లి చేసుకోవాలని అతను నిర్ణయించుకుంటాడు. కానీ బెథానీ మాత్రం పెళ్లి అనే బాధ్యత గురించి ఆలోచించగానే వెనక్కి తగ్గుతుంది. రాబ్ తనకు ప్రపోజ్ చేయబోతున్నాడని తెలుసుకున్న ఆమె, ఆ పరిస్థితి నుంచి ఎలా తప్పించుకోవాలా అని ఆలోచిస్తుంది. అదే సమయంలో ఊహించని పరిణామం ఎదురవుతుంది.
ఓ అగ్నిపర్వతం బద్దలవడంతో విమాన సర్వీసులకు అంతరాయం ఏర్పడుతుంది. దీంతో బెథానీ, రాబ్ వార్సాలోనే ఉండిపోవాల్సి వస్తుంది. ఇంటికి వెళ్లే అవకాశం లేకపోవడంతో ఈ పరిణామాన్ని బెథానీ ఒక సంకేతంగా భావిస్తుంది. రాబ్ ను కొంతకాలం పక్కన పెట్టి, వార్సాలో ఫ్లవర్ షాప్ నడుపుతున్న తన చిన్ననాటి స్నేహితురాలు నెల్ ను కలవాలని నిర్ణయించుకుంటుంది. ఎన్నో ఏళ్ల తర్వాత ఇద్దరూ కలుసుకోవడంతో పాత జ్ఞాపకాలు మళ్లీ గుర్తుకొస్తాయి. నగర వీధుల్లో తిరుగుతూ, పార్టీలకు వెళ్తూ, గతాన్ని గుర్తు చేసుకుంటూ గడిపే క్రమంలో బెథానీ, నెల్ మధ్య ఉన్న అనుబంధం మరోసారి బలపడుతుంది.
అయితే ఈసారి ఆ బంధంలో స్నేహం మాత్రమే ఉండదు. ఇద్దరి మధ్య దాచిపెట్టిన ఆకర్షణ, ప్రేమ భావనలు బయట పడతాయి. దీంతో బెథానీ మరింత గందరగోళంలో పడుతుంది. ఒకవైపు తనను ప్రేమించే రాబ్, మరోవైపు తనలోని మరో కోణాన్ని బయటకు తీసుకొస్తున్న నెల్. అసలు తాను కోరుకునే జీవితం ఏంటి ? తన ప్రేమ, తన ఐడెంటిటీ విషయంలో ఇప్పటివరకు తాను నిజంగా ఏం కోరుకుంది ? అనే ప్రశ్నలు ఆమెను వెంటాడతాయి. చివరికి ఈ అనుకోని ప్రయాణం బెథానీ జీవితంలో ఓ కీలక నిర్ణయం తీసుకునే స్థాయికి తీసుకెళ్తుంది. తన మనసును తానే అర్థం చేసుకునే ఈ ఎమోషనల్ జర్నీనే ‘ఎరుప్సియా’ అసలు కథ.
‘ఎరుప్సియా’ (Erupcja) ప్రస్తుతం MUBIలో స్ట్రీమింగ్ అవుతోంది. ప్రముఖ పాప్ స్టార్ చార్లీ ఎక్స్సిఎక్స్ (Charli XCX) తొలిసారి ప్రధాన పాత్రలో నటించిన చిత్రమిది. అయితే తెలుగు ఆడియో అందుబాటులో లేదు. ఒరిజినల్ ఇంగ్లీష్, పోలిష్ భాషల్లో మాత్రమే చూడొచ్చు. సాధారణ కమర్షియల్ లవ్ స్టోరీల కంటే భిన్నంగా, రిలేషన్షిప్స్, ఐడెంటిటీ, స్వీయ శోధన చుట్టూ సాగే ఇండీ డ్రామాలను చూడాలి అనుకునే వాళ్ళకి ఈ సినిమా నచ్చొచ్చు.
Read Also: మనుషుల నిజస్వరూపాలను కళ్లకు కట్టే కథ… హృదయాలను తాకే డాక్యుమెంటరీ స్టైల్ ఎమోషనల్ ఫిల్మ్
Share
ట్రెండింగ్లో బెస్ట్ స్లిమ్ పవర్ బ్యాంక్.. అసలు ధర తెలిస్తే షాక్ అవుతారు!
‘బిగ్ బాస్’ హౌస్లోకి జంటగా బాలు, మీనా.. మరి ‘గుండె నిండా గుడి గంటలు’ పరిస్థితి ఏమిటీ?
