Korean Suspense Thriller OTT : చావు బతుకుల మధ్య ఉన్నవాళ్ళకు మాత్రమే కన్పించే షాప్… దిమ్మతిరిగే ట్విస్టులు

Korean Suspense Thriller OTT : ఓటీటీలో కొరియన్ సిరీస్ లకు ఉండే క్రేజ్ ప్రత్యేకంగా చెప్పక్కరలేదు. వీటికి ఇప్పుడు ప్రపంచవ్యాప్తంగా అభిమానులు ఉన్నారు. ఒక్కసారి చూస్తే మళ్లీ మళ్లీ చూడాలనిపించే సిరీస్ లు చాలానే ఉన్నాయి. అలాంటి వాటిలో ఒకదాని గురించి ఇప్పుడు చెప్పుకుందాం. ఈ కథ ప్రధానంగా ఒక బస్సు ప్రమాదం చుట్టూ, ఆ ప్రమాదంలో కోమాలో ఉన్న వ్యక్తుల చుట్టూ తిరుగుతుంది. కోమా నుంచి బయట పడటానికి వీళ్ళ ఆత్మలు చేసే పోరాటమే ఈ సిరీస్. దీనిని చూస్తే అలా చూస్తుండిపోతారు అంతే. ఈ సిరీస్ పేరు ఏమిటి ? ఏ ఓటీటీలో ఉంది ? అనే వివరాల్లోకి వెళ్తే ..

ఎందులో స్ట్రీమింగ్ అంటే

2024లో వచ్చిన దక్షిణ కొరియా మిస్టరీ హర్రర్ టెలివిజన్ సిరీస్ ‘లైట్ షాప్’ (Light Shop). దీనికి హీ-వాన్ దర్శకత్వం వహించారు. ఇందులో జు జి-హూన్, పార్క్ బో-యంగ్, కిమ్ సియోల్-హ్యూన్, బే సంగ్-వు వంటి నటులు నటించారు. ఇది 2024 డిసెంబర్ 4న Jio hotstarలో విడుదలైంది. ఇది Jio hotstarలో అతిపెద్ద కొరియన్ ఒరిజినల్ ప్రీమియర్‌గా మారింది. ప్రపంచవ్యాప్తంగా రెండవ అతిపెద్ద కొరియన్ సిరీస్ గా నిలిచింది.

కథ ఏమిటి అంటే

ఈ లైట్ షాప్’ కథ ఒక భయంకరమైన బస్సు ప్రమాదం చుట్టూ తిరుగుతుంది. ఈ ప్రమాదంలో గాయపడి కోమాలోకి వెళ్లిన వ్యక్తులు, భూలోకానికి, పరలోకానికి మధ్య ఉండే ఒక వింతైన ‘లింబో’ (Limbo) ప్రపంచంలో చిక్కుకుపోతారు. ఆ చీకటి ప్రపంచంలో ఒక లైట్ల దుకాణం ఉంటుంది. దాని యజమాని వోన్-యంగ్ అక్కడికి వచ్చే ఆత్మలకు మార్గదర్శిగా ఉంటాడు. అక్కడ ఉన్న వ్యక్తులు తిరిగి ప్రాణాలతో భూమిపైకి వెళ్లాలంటే, ఆ షాపులోని లైట్ బల్బులను వెలిగించుకోవాలి. ఆ బల్బులు వాళ్ళకి తిరిగి ప్రాణం పోస్తాయి.

ఈ క్రమంలో హ్యున్-మిన్ అనే యువకుడు తన ప్రియురాలు జి-యంగ్ మరణించిందనే బాధతో కృంగిపోతుంటాడు. అతను కూడా కోమాలోకి పోతాడు. కానీ వాస్తవానికి ఆమె ఆత్మగా మారి అతన్ని కాపాడటానికి ప్రయత్నిస్తుంటుంది. కోమాలో ఉండి చావుబతుకుల మధ్య కొట్టుమిట్టాడుతున్న వాళ్ళు, మరణాన్ని ఎదురించి తిరిగి రావడానికి చేసే పోరాటమే ఈ సిరీస్.