Feel Good Family Drama: ప్రేమంటే నమ్మకం… కుటుంబమంటే అనుబంధం… కానీ మనసులో దాగున్న పాత జ్ఞాపకాలు మాత్రం జీవితాన్ని ఎటు తీసుకెళ్తాయో చెప్పలేం. ప్రేమను నమ్మని ఓ అమ్మాయి జీవితంలోకి ప్రేమనే ప్రాణంగా భావించే ఓ యువకుడు వస్తే ? అదే సమయంలో ఓ కఠినమైన మనిషిని ఓ కుటుంబం చూపించే స్వచ్ఛమైన ప్రేమ మార్చేస్తే ? ప్రేమ, కుటుంబ బంధాలు, చిన్ననాటి జ్ఞాపకాలను కలిపి హృదయాన్ని హత్తుకునేలా తెరకెక్కించిన సినిమా ‘జ్ఞాపకాలు’ (Gnapakalu). తాజాగా ఓటీటీలో స్ట్రీమింగ్ అవుతున్న ఈ ఫీల్ గుడ్ ఫ్యామిలీ డ్రామా ఎలా ఉందో తెలుసుకోవాలంటే కథలోకి వెళ్లాల్సిందే.
తల్లిదండ్రులు చనిపోయిన చాలా కాలం తర్వాత శివ తన పల్లెటూరికి తిరిగి వస్తాడు. అక్కడ ఉన్న పాత ఇల్లు, పొలాలు, ఇతర ఆస్తులను అమ్మేసి ఇకపై నగరంలోనే స్థిరపడాలని నిర్ణయించుకుంటాడు. ఈ పనిలో భాగంగా ఇంట్లోని వస్తువులను ఒక్కొక్కటిగా సర్దుతుండగా అతని కంటికి ఓ పాత సైకిల్ కనిపిస్తుంది. అది మరెవరిదో కాదు… తన తండ్రి ఎంతోకాలం ఉపయోగించిన సైకిల్. ఆ సైకిల్‌ను చూడగానే శివకు తన చిన్ననాటి రోజులు గుర్తుకొస్తాయి.
తండ్రి సైకిల్‌పై కూర్చోబెట్టుకుని ఊరంతా తిప్పిన సందర్భాలు, స్నేహితులతో కలిసి చేసిన అల్లరి, పల్లెటూరిలో గడిపిన మధురమైన క్షణాలు ఒక్కొక్కటిగా కళ్లముందు మెదులుతాయి. ముఖ్యంగా సైకిల్ పట్టుకుని తనకు తొలిసారి సైకిల్ తొక్కడం నేర్పించిన తండ్రి జ్ఞాపకం శివను భావోద్వేగానికి గురిచేస్తుంది. శివ జీవితంలో ఈ సైకిల్‌కు మరో ప్రత్యేకమైన అనుబంధం కూడా ఉంటుంది. తండ్రి తనను సైకిల్‌పై తీసుకెళ్లి ఉద్యోగంలో చేర్పించిన రోజులు, అదే సైకిల్‌పై తనకు నచ్చిన అమ్మాయి చుట్టూ తిరిగిన జ్ఞాపకాలు.. ఇలా అతని జీవితంలోని ఎన్నో ముఖ్యమైన ఘట్టాలు ఆ సైకిల్‌తో ముడిపడి ఉంటాయి.
దీంతో అప్పటివరకు ఉన్న ఆస్తులను అమ్మేసి ఊరిని విడిచి వెళ్లాలన్న ఆలోచన శివలో పూర్తిగా మారిపోతుంది. అది కేవలం పాత సైకిల్ కాదని, తన బాల్యం, తండ్రి ప్రేమ, కుటుంబ అనుబంధాలకు గుర్తుగా నిలిచిన విలువైన జ్ఞాపకమని అతనికి అర్థమవుతుంది. చివరికి ఆ సైకిల్‌ను కొత్తగా రిపేర్ చేయించి జాగ్రత్తగా భద్రపరచుకోవాలని శివ నిర్ణయించుకుంటాడు. తన గతాన్ని అక్కడే వదిలిపెట్టకుండా… ఆ తండ్రి జ్ఞాపకాన్ని కూడా తనతో పాటు నగరానికి తీసుకెళ్లాలని భావిస్తాడు. మరి అనుకున్నట్టుగా ఆ సైకిల్ ను తనతో పాటు తీసుకెళ్లాడా ? చివరికి ఏమైంది ? అన్నది తెలియాలంటే సినిమాను చూడాల్సిందే.
‘జ్ఞాపకాలు’ ఈటీవీ విన్‌ లోని ‘కథా సుధ – సండే స్టోరీస్’ (Katha Sudha – Sunday Stories) ఆంథాలజీలో 73వ ఎపిసోడ్‌ గా 2026 సెప్టెంబర్ 6 నుంచి స్ట్రీమింగ్ అవుతోంది. జాతీయ అవార్డు గ్రహీత, ‘శతమానం భవతి’ వంటి చిత్రాల దర్శకుడు వేగేశ్న సతీష్ పర్యవేక్షణలో ఈ ఎమోషనల్ డ్రామా రూపొందింది. జైభారత్ రాజ్, జయశ్రీ, కవితా శ్రీరంగం, ప్రద్యుమ్న బిల్లూరి తదితరులు ఇందులో నటించారు. ముఖ్యంగా కుటుంబంతో కలిసి కూర్చొని చూసే ఫీల్ గుడ్ కథలను ఇష్టపడే వారికి ఈ సినిమా మంచి ఆప్షన్. తెలుగు ప్రేక్షకులకు ఎలాంటి భాషా ఇబ్బంది లేకుండా ఈటీవీ విన్‌లో నేరుగా తెలుగు ఆడియోలోనే చూడొచ్చు.
Read Also: 3024 కోట్లు కొల్లగొట్టిన హర్రర్ థ్రిల్లర్… ఓటీటీలోకి తెలుగులో వచ్చేసిన వణికించే వైరల్ హిట్
Share
లోకల్ ఎలక్షన్స్.. కూటమిలో కుమ్ములాట తప్పదా?
పాకిస్తాన్ లో ప‌ర్య‌టించనున్న టీమిండియా..మోడీ స‌ర్కార్ గ్రీన్ సిగ్నల్ ?
