Apple Leaks: యాపిల్ నుంచి కొత్త ఐఫోన్ వస్తుందంటే చాలు.. టెక్ ప్రియుల్లో అంచనాలు మామూలుగా ఉండవు. ఇప్పుడు iPhone 18 సిరీస్కు సంబంధించి వస్తున్న లీకులు కూడా నెట్టింట తెగ హల్చల్ చేస్తున్నాయి. ఈసారి Pro మోడల్స్ కెమెరా డిజైన్లో కీలక మార్పులు ఉండబోతున్నాయని, అలాగే ఎంతో కాలంగా ఎదురుచూస్తున్న యాపిల్ తొలి ఫోల్డబుల్ ఫోన్ Ultra కూడా రాబోతోందని వార్తలు వినిపిస్తున్నాయి. ప్రముఖ మాక్స్ టెక్ యూట్యూబ్ ఛానెల్ బయటపెట్టిన వివరాల ప్రకారం iPhone 18 ఫీచర్లు ఎలా ఉండబోతున్నాయో ఇప్పుడు చూద్దాం.
iPhone 18 Pro మోడల్స్ చూడటానికి మన పాత ఐఫోన్ల లాగే ఉన్నా.. వెనుక వైపు కెమెరా సెటప్ను గమనిస్తే ఒక విషయం అర్థమవుతుంది. ఈసారి కెమెరా మాడ్యూల్ గతంలో కంటే కొంచెం ఎత్తుగా, మందంగా ఉండబోతోంది. శాంసంగ్ వంటి ఇతర కంపెనీలు కెమెరాను వీలైనంత ఫ్లాట్గా చేసే ప్రయత్నం చేస్తుంటే.. యాపిల్ మాత్రం కెమెరా క్వాలిటీ కోసం ఆ బంప్ను పెంచడానికే మొగ్గు చూపుతోంది. దీంతో ఈసారి ఫొటోలు, వీడియోలు నెక్ట్స్ లెవల్లో ఉండబోతున్నాయన్నమాట.
Also Read: Redmi Note 17 Pro Max.. 200MP కెమెరా, 10,000mAh బ్యాటరీ, ఈ రేంజ్ ఫీచర్లను ఎప్పుడైనా చూశారా?
ఫోన్ మొత్తం సైజులో పెద్దగా మార్పులేమీ లేవు కానీ, iPhone 18 Pro Max ఎత్తు, వెడల్పులో చాలా స్వల్పంగా (మిల్లీమీటర్లలో) మార్పులు ఉండవచ్చు. దాదాపు 0.36 మిమీ ఎత్తు, 0.39 మిమీ వెడల్పు పెరిగే ఛాన్స్ ఉందని లీకులు చెబుతున్నాయి. ఇది కంటికి పెద్దగా కనిపించకపోయినా.. ఫోన్ పట్టుకున్నప్పుడు చేతికి ఇచ్చే గ్రిప్ విషయంలో యూజర్లకు కొంచెం కొత్తగా అనిపించవచ్చు.
అన్నింటికంటే ఎక్కువగా ఫోల్డబుల్ Ultra మోడల్ ఇప్పుడు అందరినీ ఆశ్చర్యపరుస్తోంది. యాపిల్ నుంచి వస్తున్న తొలి ఫోల్డబుల్ ఫోన్ ఇదే అని ప్రచారం జరుగుతోంది. అయితే ఈ మోడల్లో కేవలం రెండు కెమెరాలు మాత్రమే ఉండటం, కనీసం మ్యాగ్సేఫ్ ఛార్జింగ్ ఫీచర్ కూడా కనిపించకపోవడం టెక్ వర్గాల్లో చర్చకు దారితీస్తోంది. బహుశా ఇది ఇంకా టెస్టింగ్ స్టేజ్లో ఉన్న డిజైన్ కావచ్చు. కాబట్టి ఫైనల్ వెర్షన్ వచ్చేసరికి మరిన్ని మార్పులు ఉన్నా ఆశ్చర్యపోనక్కర్లేదు.
మీరు గనుక ఇప్పటికే iPhone 16 లేదంటే 17 వాడుతుంటే.. ఈ చిన్న మార్పుల కోసం అప్గ్రేడ్ అవ్వాలా అని ఆలోచించవచ్చు. కానీ ఐఫోన్తో ప్రొఫెషనల్ ఫొటోగ్రఫీ చేసేవారికి, అలాగే పాత మోడల్స్ వాడుతున్న వారికి iPhone 18 Pro బెస్ట్ ఛాయిస్ అవుతుంది. ఇక ఫోల్డబుల్ ఫోన్ అంటే ఇష్టపడే వారికి Ultra మోడల్ సరికొత్త లోకాన్ని పరిచయం చేయనుంది. మొత్తానికి యాపిల్ ఈసారి కెమెరా ప్రియులను దృష్టిలో పెట్టుకునే ఈ మార్పులు చేస్తున్నట్లు కనిపిస్తోంది.
Also Read: బడ్జెట్ ధరలో ఇలాంటి ఫీచర్లా? 10,000mAh బ్యాటరీ, 200MP కెమెరాతో రెడ్మీ సరికొత్త రికార్డ్!
Share
వేసవిలో కెమికల్ సన్స్క్రీన్లు ఎందుకు? ప్రకృతి ఇచ్చిన ఈ 'గంధం' చిట్కా ట్రై చేయండి!
టాలీవుడ్ ఫిలిం ఇండస్ట్రీ ఎంప్లాయిస్ ఫెడరేషన్ ఎన్నికల ఫలితాలు విడుదల!
