Gemini Assistant: ఫోన్ టచ్ చేయకుండానే ఫుడ్ ఆర్డర్, క్యాబ్ బుకింగ్.. గూగుల్ జెమిని అన్ని పనులు చేస్తుంది.. ఎలాగంటే

Gemini Assistant| గూగుల్ జెమిని త్వరలో ఒక పవర్‌ఫుల్ పర్సనల్ అసిస్టెంట్‌గా మారబోతోంది. కేవలం సమాధానాలు చెప్పడమే కాకుండా, మీ తరపున ఫోన్‌లో పనులను కూడా ఈ అసిస్టెంట్ పూర్తి చేస్తుంది. యూజర్లు తమ ఫోన్‌ టచ్ చేయాల్సిన అవసరం కూడా ఉండదు. కేవలం వాయిస్ కమాండ్ల ద్వారా క్యాబ్‌లు బుక్ చేయడం, జొమాటో, స్విగ్గీలో ఫుడ్ ఆర్డర్ చేయడం వంటి పనులు చేయవచ్చు.

కొత్త ఆటోమేషన్ ఫీచర్‌ను అభివృద్ధి చేస్తున్న గూగుల్

గూగుల్ తన ఏఐ యాప్‌లో ఒక కొత్త ఆటోమేషన్ ఫీచర్‌ను సిద్ధం చేస్తోంది. ఇది ఫోన్ స్క్రీన్‌పై ఉన్న కంటెంట్‌ను అర్థం చేసుకుని, వివిధ యాప్‌లతో నేరుగా కమ్యూనికేట్ చేయగలదు. టెక్ రిపోర్ట్స్ ప్రకారం, గూగుల్ ప్రస్తుతం ఈ కొత్త ఫీచర్‌ ట్రయల్స్ చేస్తోంది. ఇది ఒకేసారి పలు రకాల పనులను ఎలాంటి అంతరాయం లేకుండా చేయగలదు.

యాప్ బీటా వెర్షన్‌లో కనిపించిన కొత్త ఫీచర్

గూగుల్ యాప్ 17.4 వెర్షన్‌లో ఈ కొత్త ఫీచర్‌ను నిపుణులు గుర్తించారు. దీనికి “Bonobo” (బోనోబో) అనే కోడ్ నేమ్ పెట్టినట్లు సమాచారం. ఈ ఫీచర్ జెమిని ఉపయోగించి ఫోన్ స్క్రీన్‌పై జరిగే మార్పులను గమనిస్తుంది, అవసరమైన చర్యలను తీసుకుంటుంది. అంటే మీరు మాట్లాడితే చాలు, అది యాప్‌లను నియంత్రిస్తుంది.

ఆండ్రాయిడ్ 16 వెర్షన్‌లో ఈ సదుపాయం వచ్చే అవకాశం

ఈ కొత్త ఆటోమేషన్ ఫీచర్ ఆండ్రాయిడ్ 16 (Android 16 QPR3) ఉన్న ఫోన్లలో మాత్రమే పని చేసే అవకాశం ఉంది. ప్రారంభంలో కొన్ని ఎంపిక చేసిన యాప్‌లకు మాత్రమే ఈ సదుపాయం కల్పిస్తారు. కాలక్రమేణా మరిన్ని యాప్‌లకు దీన్ని విస్తరించవచ్చని భావిస్తున్నారు.

ఫోన్ తాకకుండానే జెమిని చేసే అద్భుతాలు

ఈ ఫీచర్ అందుబాటులోకి వస్తే, మీరు ఫుడ్ డెలివరీ యాప్ ఓపెన్ చేయకుండానే ఆహారాన్ని ఆర్డర్ చేయవచ్చు. వాయిస్ ద్వారా క్యాబ్ బుక్ చేయవచ్చు లేదా షాపింగ్ చేయవచ్చు. ఫోన్ కాల్స్ చేయడం వంటి పనులు కూడా సులభం అవుతాయి. ఇది వినియోగదారులకు పూర్తిగా హ్యాండ్స్-ఫ్రీ ఎక్స్‌పీరియన్స్ ఇస్తుంది.

Also Read: పాత సిమ్ కార్డ్‌తో లక్షలు విలువ చేసే బంగారం.. రూ.కోట్లు సంపాదించే అవకాశం.. ట్రై చేయండి

ఆటోమేషన్ విషయంలో జాగ్రత్తలు అవసరం

ఈ ఫీచర్ వల్ల పనులు సులభమైనప్పటికీ, కొన్ని సవాళ్లు కూడా ఉన్నాయి. జెమిని చేసే పనులను వినియోగదారులు గమనిస్తూ ఉండాలి. పొరపాటున ఏదైనా తప్పుడు ఆర్డర్ వెళ్లకుండా చూసుకోవడం యూజర్ల బాధ్యత. అయితే, ఒకవేళ జెమిని ఏదైనా తప్పుగా చేస్తున్నట్లు అనిపిస్తే, వినియోగదారులు ఆ పనిని మధ్యలోనే ఆపివేసే అవకాశం ఉంటుంది.

సెక్యూరిటీ, విడుదల వివరాలు

పేమెంట్ వివరాలను సేవ్ చేయవద్దని, అత్యవసర పరిస్థితుల్లో సొంతంగా నిర్ణయాలు తీసుకోవాలని గూగుల్ సూచిస్తోంది. ఈ ఫీచర్ ఎప్పుడు విడుదల అవుతుందనే విషయంపై గూగుల్ ఇంకా స్పష్టత ఇవ్వలేదు. త్వరలోనే దీని గురించి మరిన్ని వివరాలు తెలిసే అవకాశం ఉంది.