India Smartphones: స్మార్ట్‌ఫోన్ తయారీలో భారత్ మరో కీలక అడుగు వేయబోతోంది. ఇప్పటివరకు ఇతర దేశాల కంపెనీల ఫోన్ల తయారీలో కీలక పాత్ర పోషిస్తున్న మన దేశం.. త్వరలో సొంత బ్రాండ్లతో ప్రపంచ మార్కెట్‌లోకి అడుగుపెట్టాలని చూస్తోంది. 2028 నాటికి భారత్‌లోనే డిజైన్ చేసి, తయారు చేసి, భారతీయ బ్రాండ్ పేరుతో ఫోన్లను తీసుకొస్తామని కేంద్ర ఐటీ మంత్రి అశ్విని వైష్ణవ్ వెల్లడించారు. దీంతో రాబోయే రెండేళ్లలో భారత స్మార్ట్‌ఫోన్ రంగంలో ఎలాంటి మార్పులు వస్తాయనే ఆసక్తి పెరిగింది.
అక్టోబర్ 23న ఢిల్లీలో జరిగిన NDTV World Summitలో అశ్విని వైష్ణవ్ ఈ విషయాన్ని ప్రకటించారు. 2028 అక్టోబర్ 23 నాటికి భారతీయ డిజైన్, భారతీయ తయారీ, భారతీయ బ్రాండ్‌తో మొబైల్ ఫోన్లు అందుబాటులోకి వస్తాయని ధీమా వ్యక్తం చేశారు. యాపిల్, శాంసంగ్ వంటి ప్రపంచ స్థాయి కంపెనీలకు దీటుగా భారతీయ బ్రాండ్లు ఎదగాలన్నది ఈ లక్ష్యం వెనుక ఉన్న ఆలోచన. అయితే ఈ లక్ష్యాన్ని చేరుకోవడానికి ఇంకా సాంకేతికంగా చాలా పని చేయాల్సి ఉంటుంది.
Also Read: ట్రెండింగ్ డిజైన్‌తో వస్తున్న OnePlus Buds Clip.. ఫీచర్లు చూస్తే ఎవరైనా ఫిదా కావాల్సిందే!
ఒక స్మార్ట్‌ఫోన్ బయటకు చిన్నగా కనిపించినా.. దాని లోపల ఎన్నో భాగాలు కలిసి పనిచేస్తాయి. నెట్‌వర్క్ సిగ్నల్స్ కోసం యాంటెన్నాలు, ప్రాసెసర్, మెమరీ, కెమెరా, డిస్‌ప్లే, పవర్ మేనేజ్‌మెంట్ వ్యవస్థ వంటి వాటిని పరిమిత స్థలంలో అమర్చాలి. ఫోన్ బరువు ఎక్కువ కాకుండా, బ్యాటరీ శక్తి సమర్థంగా ఉపయోగపడేలా చూసుకోవాలి. ఈ భాగాలన్నీ సరిగ్గా పనిచేసేలా డిజైన్ చేయడం పెద్ద సవాలేనని మంత్రి వివరించారు.
భారత్‌లో సొంత స్మార్ట్‌ఫోన్ తయారీకి అవసరమైన నైపుణ్యాలను పెంచే ప్రయత్నాలు కొన్నేళ్ల క్రితమే మొదలయ్యాయి. మూడేళ్ల క్రితం భారతీయ ఇంజినీర్లు, టెక్నాలజీ సంస్థలకు మొబైల్ ఫోన్‌లోని ప్రధాన సర్క్యూట్ బోర్డు అయిన పీసీబీని సొంతంగా డిజైన్ చేయాలని సవాల్ విసిరినట్లు మంత్రి చెప్పారు. ఫోన్‌లోని కీలక భాగాలను అనుసంధానించే ఈ బోర్డు డిజైన్‌లో పట్టు సాధించడం, పూర్తి ఫోన్ అభివృద్ధికి ఉపయోగపడుతుంది.
సొంత బ్రాండ్లతో ఫోన్లు తీసుకురావడం వల్ల భారత్ కేవలం తయారీ కేంద్రంగా కాకుండా.. డిజైన్‌లోనూ తన సామర్థ్యాన్ని చూపించే అవకాశం ఉంటుంది. అయితే ప్రపంచ మార్కెట్‌లో నిలదొక్కుకోవాలంటే నాణ్యత, ధర, పనితీరు, సాఫ్ట్‌వేర్ మద్దతు వంటి అంశాల్లోనూ పోటీ పడాలి. 2028 నాటికి ఈ లక్ష్యం ఎంతవరకు సాధ్యమవుతుందో చూడాలి. భారతీయ కంపెనీలు ఈ సవాలును విజయవంతంగా ఎదుర్కొంటే, దేశ స్మార్ట్‌ఫోన్ రంగానికి అది పెద్ద ముందడుగు అవుతుంది.
Also Read: ఇక వాట్సప్ చాట్ నుంచే డైరెక్ట్‌గా రీల్స్ షేరింగ్.. కొత్త ఫీచర్ వచ్చేస్తోంది మామా!
Share
ప్రసవం తరువాత పెరిగిన బరువు తగ్గాలా? ఇంట్లోనే సులభంగా ఈ 3 వ్యాయామాలు చేయండి
‘ఫౌజీ’లో నేతాజీగా కనిపించిన ఈ నటుడు ఎవరో తెలుసా?
